அதிமுக - பாஜக தொகுதிப் பங்கீடு...! நயினார் நாகேந்திரன் அதிரடிப் பேட்டி..!

by Vignesh Perumal on | 2026-01-09 11:16 AM

Share:

அதிமுக - பாஜக தொகுதிப் பங்கீடு...! நயினார் நாகேந்திரன் அதிரடிப் பேட்டி..!

தமிழக சட்டமன்றத் தேர்தல் நெருங்கி வரும் சூழலில், அதிமுக மற்றும் பாஜக இடையேயான முதற்கட்ட தொகுதிப் பங்கீடு பேச்சுவார்த்தை இன்று சென்னையில் நடைபெற்றது. சென்னை கிரீன்வேஸ் சாலையில் உள்ள அதிமுக பொதுச்செயலாளர் எடப்பாடி பழனிசாமி இல்லத்தில் நடைபெற்ற இந்த ஆலோசனையில், பாஜக மாநிலத் தலைவர் நயினார் நாகேந்திரன் நேரில் பங்கேற்றார்.

சுமார் ஒரு மணி நேரத்திற்கும் மேலாக நடைபெற்ற இந்த சந்திப்பிற்குப் பிறகு செய்தியாளர்களிடம் பேசிய நயினார் நாகேந்திரன், "தொகுதிப் பங்கீடு தொடர்பாக அதிமுக பொதுச்செயலாளர் எடப்பாடி பழனிசாமியுடன் விரிவாக ஆலோசித்தோம். இந்தப் பேச்சுவார்த்தை மிகவும் சுமூகமாக முடிந்தது. பாஜக எத்தனை தொகுதிகளில் போட்டியிடப் போகிறது? என்னென்ன தொகுதிகள்? என்ற விவரங்களை கட்சியின் மேலிடத்துடன் கலந்தாலோசித்த பிறகு பின்னர் அதிகாரப்பூர்வமாக அறிவிப்போம்," என்று தெரிவித்தார்.

இந்தச் சந்திப்பில் தொகுதிப் பங்கீடு மட்டுமின்றி, பிரதமர் நரேந்திர மோடியின் தமிழக வருகை குறித்தும் முக்கிய ஆலோசனைகள் மேற்கொள்ளப்பட்டன.

பிரதமர் வரும் தேதி இன்னும் இறுதி செய்யப்படவில்லை என்றாலும், இந்த மாத இறுதியில் (ஜனவரி 2026) அவர் தமிழகம் வருவது உறுதியாகியுள்ளது.

பிரதமர் பங்கேற்கும் பிரம்மாண்ட பொதுக்கூட்டத்தை எங்கு நடத்துவது? என்பது குறித்து ஆலோசிக்கப்பட்டது. விரைவில் இதற்கான இடம் இறுதி செய்யப்படும் என நயினார் நாகேந்திரன் தெரிவித்தார்.

சமீபத்தில் எடப்பாடி பழனிசாமி டெல்லி சென்று அமித் ஷாவைச் சந்தித்த நிலையில், இன்று சென்னையில் நயினார் நாகேந்திரன் நேரில் சந்தித்தது தேசிய ஜனநாயகக் கூட்டணியில் (NDA) தொகுதிப் பங்கீடு இறுதிக்கட்டத்தை எட்டியுள்ளதைக் காட்டுகிறது. குறிப்பாக, பாமக உள்ளிட்ட இதர கூட்டணிக் கட்சிகளுக்கான இடங்கள் குறித்தும் இக்கூட்டத்தில் விவாதிக்கப்பட்டதாகத் தெரிகிறது.

பிரதமர் மோடி தனது தமிழக வருகையின் போது பொங்கல் விழாவிலும், சென்னை மெட்ரோ ரயில் இரண்டாம் கட்டப் பணிகள் துவக்க விழாவிலும் பங்கேற்க வாய்ப்புள்ளதாகத் தகவல்கள் தெரிவிக்கின்றன.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now