சர்க்கரை போடாதீங்கன்னு சொன்னா கேக்க மாட்டீங்களா..? ஹோட்டலுக்கு ₹10,000 அபராதம்..!

by Vignesh Perumal on | 2026-01-30 12:07 PM

Share:

சர்க்கரை போடாதீங்கன்னு சொன்னா கேக்க மாட்டீங்களா..? ஹோட்டலுக்கு ₹10,000 அபராதம்..!

உணவகங்களுக்குச் சென்று நாம் கேட்கும் உணவைச் சரியாக வழங்குவது அந்த நிறுவனத்தின் கடமை. அதில் தவறும் பட்சத்தில் அது "சேவை குறைபாடு" எனக் கருதப்படும் என்பதை இந்தத் தீர்ப்பு மீண்டும் உறுதிப்படுத்தியுள்ளது.

நெல்லை மாவட்டத்தைச் சேர்ந்த தங்கதுரை என்ற வழக்கறிஞர், அங்குள்ள ஒரு ஹோட்டலுக்குச் சென்றுள்ளார். அவருக்குச் சர்க்கரை நோய் பாதிப்பு அல்லது உடல்நலக் காரணங்கள் இருக்கலாம் என்பதால், தனக்கு வழங்கப்படும் டீ மற்றும் ஜூஸில் சர்க்கரை சேர்க்க வேண்டாம் எனத் தெளிவாகவும், நிதானமாகவும் ஹோட்டல் ஊழியரிடம் கூறியுள்ளார்.

வாடிக்கையாளர் தெளிவாகக் கூறியும், ஹோட்டல் ஊழியர்கள் அதனைப் பொருட்படுத்தாமல் சர்க்கரை சேர்த்தே டீ மற்றும் ஜூஸைக் கொண்டு வந்து கொடுத்துள்ளனர். இது குறித்து அவர் முறையிட்டும் ஹோட்டல் நிர்வாகம் முறையான பதில் அளிக்கவில்லை எனக் கூறப்படுகிறது. தனது விருப்பத்திற்கு மாறாகவும், ஆரோக்கியத்திற்குப் பாதிப்பு ஏற்படுத்தும் வகையிலும் செயல்பட்ட ஹோட்டல் நிர்வாகத்தின் மீது நடவடிக்கை எடுக்கக் கோரி, தங்கதுரை நெல்லை மாவட்ட நுகர்வோர் குறைதீர் ஆணையத்தில் வழக்கு தொடர்ந்தார்.

இந்த வழக்கை விசாரித்த நுகர்வோர் ஆணையம், ஹோட்டல் நிர்வாகத்தின் செயலில் "சேவை குறைபாடு" இருப்பதை உறுதி செய்தது. ஒரு வாடிக்கையாளர் தனது உடல்நலம் சார்ந்து வைக்கும் கோரிக்கையை அலட்சியப்படுத்துவது கண்டிக்கத்தக்கது எனக் கூறி பின்வரும் உத்தரவைப் பிறப்பித்தது.

மன உளைச்சல் மற்றும் சேவை குறைபாட்டிற்கு இழப்பீடாக ரூ. 5,000.

இந்த வழக்கை நடத்தியதற்காக வழக்கறிஞர் கட்டணம் மற்றும் இதர செலவுகளுக்காக ரூ. 5,000.

ரூ. 10,000 தொகையை பாதிக்கப்பட்ட நுகர்வோருக்கு ஹோட்டல் நிர்வாகம் வழங்க வேண்டும் என உத்தரவிடப்பட்டது.

இந்தத் தீர்ப்பு உணவகங்களுக்குச் செல்லும் பொதுமக்களுக்கு ஒரு முக்கியச் செய்தியைச் சொல்கிறது. நாம் செலுத்தும் பணத்திற்குச் சரியான மற்றும் பாதுகாப்பான சேவையைப் பெறுவது நமது உரிமை. ஹோட்டல் உரிமையாளர்கள் இனி வாடிக்கையாளர்களின் சிறிய கோரிக்கைகளையும் கவனமுடன் கையாள வேண்டும் என்பதற்கு இந்த அபராதம் ஒரு எச்சரிக்கையாக அமைந்துள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now