மக்களே உஷார்....! சென்னையில் H5N1 உறுதி...! ஆய்வாளர்கள் தகவல்...!

by Vignesh Perumal on | 2026-02-05 04:05 PM

Share:

மக்களே உஷார்....! சென்னையில் H5N1 உறுதி...! ஆய்வாளர்கள் தகவல்...!

சென்னையில் கடந்த சில நாட்களாக காகங்கள் மர்மமான முறையில் உயிரிழந்து வந்த நிலையில், தற்போது அதன் பின்னணியில் உள்ள அதிர்ச்சிகரமான காரணம் வெளியாகியுள்ளது. அடையாறு மற்றும் அதனைச் சுற்றியுள்ள பகுதிகளில் கண்டெடுக்கப்பட்ட காகங்களின் மாதிரிகளை ஆய்வு செய்ததில், அவற்றுக்கு H5N1 எனப்படும் பறவைக் காய்ச்சல் வைரஸ் தொற்று இருப்பது உறுதி செய்யப்பட்டுள்ளது.

சென்னை அடையாறு, பெசன்ட் நகர் மற்றும் திருவான்மியூர் உள்ளிட்ட பகுதிகளில் கடந்த சில தினங்களாகப் மரங்களில் இருந்து காகங்கள் திடீரென விழுந்து உயிரிழப்பதாகப் புகார்கள் எழுந்தன. இதனைத் தொடர்ந்து, உயிரிழந்த காகங்களின் மாதிரிகள் சேகரிக்கப்பட்டு, போபாலில் உள்ள தேசிய உயர் பாதுகாப்பு விலங்கு நோய்கள் நிறுவனத்திற்கு (NIHSAD) ஆய்வுக்கு அனுப்பப்பட்டன. அதன் முடிவில், காகங்கள் H5N1 வைரஸ் தாக்குதலால் உயிரிழந்தது அதிகாரப்பூர்வமாக உறுதி செய்யப்பட்டுள்ளது.

காகங்கள் செத்துக் கிடந்த பகுதிகளில் மாநகராட்சி மற்றும் கால்நடைத் துறை இணைந்து முழுமையாகக் கிருமிநாசினிகளைத் தெளிக்கும் பணியைத் தொடங்கியுள்ளன. பாதிக்கப்பட்ட இடத்தைச் சுற்றி 1 முதல் 3 கி.மீ தொலைவிற்கு உட்பட்ட பகுதிகளில் உள்ள மற்ற பறவைகள் மற்றும் கோழிப் பண்ணைகளை அதிகாரிகள் தீவிரமாகக் கண்காணித்து வருகின்றனர். பாதுகாப்பு உடைகள் அணிந்த ஊழியர்கள் மட்டுமே இறந்த பறவைகளை அகற்ற வேண்டும் என உத்தரவிடப்பட்டுள்ளது.

வைரஸ் தொற்று மனிதர்களுக்குப் பரவுவதைத் தவிர்க்கப் பின்வரும் முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளது.

வீதிகளிலோ அல்லது மொட்டை மாடிகளிலோ காகங்கள் அல்லது இதர பறவைகள் இறந்து கிடந்தால், அவற்றை எக்காரணம் கொண்டும் வெறும் கையால் தொட வேண்டாம்.

பறவைகள் இறந்து கிடப்பதைக் கண்டால் உடனடியாக அருகிலுள்ள கால்நடை மருத்துவமனைக்கோ அல்லது மாநகராட்சி அதிகாரிகளுக்கோ தகவல் தெரிவிக்கவும்.

பறவைகள் எச்சம் இட்ட இடங்கள் அல்லது அவை அமரும் இடங்களுக்கு அருகே சென்றால், கைகளைச் சோப்புப் போட்டுக் குறைந்தது 20 வினாடிகள் நன்கு கழுவ வேண்டும்.

உங்கள் வீட்டு வளர்ப்புப் பிராணிகள் (நாய், பூனை) இறந்த பறவைகளின் அருகே செல்லாதவாறு பார்த்துக் கொள்ளுங்கள்.

H5N1 என்பது பறவைகளைத் தாக்கும் ஒரு தீவிரமான வைரஸ் ஆகும். இது அரிதாக மனிதர்களுக்கும் பரவ வாய்ப்புள்ளதால் (Zoonotic), முன்னெச்சரிக்கையுடன் இருப்பது அவசியம். தற்போது சென்னையில் காகங்களுக்கு மட்டுமே இது உறுதி செய்யப்பட்டுள்ளது; கோழிகளுக்குப் பரவியதாக இதுவரை தகவல் இல்லை.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now