பல்கலைக்கழக துணைவேந்தர் நியமனம்....! உச்சநீதிமன்றம் அதிரடி ரத்து....! கொண்டாடும் ஆளுங்கட்சி...!

by Vignesh Perumal on | 2026-02-04 04:31 PM

Share:

பல்கலைக்கழக துணைவேந்தர் நியமனம்....! உச்சநீதிமன்றம் அதிரடி ரத்து....! கொண்டாடும் ஆளுங்கட்சி...!

பல்கலைக்கழகத் துணைவேந்தர்களை மாநில அரசே (முதலமைச்சர்) நியமிக்க வகை செய்யும் சட்டத்திற்குச் சென்னை உயர் நீதிமன்றம் விதித்திருந்த தடையை உச்ச நீதிமன்றம் ரத்து செய்துள்ள விவகாரம், தமிழக அரசுக்கும் ஆளுநருக்கும் இடையிலான நீண்டகால அதிகாரப் போட்டியில் ஒரு முக்கியத் திருப்பமாகக் கருதப்படுகிறது.

தமிழகத்தில் உள்ள 13 அரசுப் பல்கலைக்கழகங்களின் துணைவேந்தர்களை ஆளுநரே நியமித்து வந்தார். ஆனால், துணைவேந்தர் நியமனத்தில் ஆளுநருக்கும் மாநில அரசுக்கும் இடையே நிலவி வந்த மோதல் காரணமாக, "துணைவேந்தர்களை மாநில அரசே நியமிக்கும்" சட்ட மசோதாவைத் தமிழக அரசு 2022-ல் சட்டப்பேரவையில் நிறைவேற்றியது.

ஆளுநரின் அதிகாரத்தைக் குறைப்பதாகக் கூறி, இந்தச் சட்டத்திற்கு எதிராகச் சென்னை உயர் நீதிமன்றத்தில் வழக்குத் தொடரப்பட்டது.

இந்த வழக்கை விசாரித்த சென்னை உயர் நீதிமன்றம், "பல்கலைக்கழக மானியக் குழுவின் (UGC) விதிகளுக்கு முரணாக மாநில அரசு சட்டம் இயற்ற முடியாது" என்றும், "துணைவேந்தர் நியமனத்தில் ஆளுநரின் பங்கு முக்கியமானது" என்றும் கூறி, அந்தச் சட்டத்தை அமல்படுத்த இடைக்காலத் தடை விதித்தது.

உயர் நீதிமன்றத்தின் இந்தத் தடையை எதிர்த்துத் தமிழக அரசு உச்ச நீதிமன்றத்தில் மேல்முறையீடு செய்தது. இந்த மனுவை விசாரித்த உச்ச நீதிமன்ற அமர்வில், 'மாநில அரசு நிறைவேற்றிய சட்டத்திற்கு உயர் நீதிமன்றம் விதித்த தடையை உச்ச நீதிமன்றம் ரத்து செய்தது. இதன் மூலம், தமிழக அரசு கொண்டு வந்த சட்டத்தை அமல்படுத்துவதில் இருந்த சட்டச் சிக்கல் தற்காலிகமாக நீங்கியுள்ளது.

கல்வி என்பது பொதுப் பட்டியலில் உள்ளதால், துணைவேந்தர் நியமன முறையை முடிவு செய்ய மாநில அரசுக்குச் சட்டப்பூர்வமான அதிகாரம் உள்ளது எனத் தெரிவிக்கப்பட்டது.

பல்கலைக்கழகங்களின் வேந்தராக ஆளுநர் இருப்பது ஒரு சட்டப்பூர்வமான உரிமைதானே தவிர, அது அவரது உள்ளார்ந்த அதிகாரம் அல்ல. மாநிலச் சட்டத்தின் மூலம் அந்த அதிகாரத்தை மாற்றியமைக்க முடியும் என்று வாதிடப்பட்டது.

இந்தத் தீர்ப்பு முதலமைச்சர் மு.க. ஸ்டாலின் தலைமையிலான அரசுக்குக் கிடைத்த மிகப்பெரிய சட்ட ரீதியான வெற்றியாகப் பார்க்கப்படுகிறது.

தமிழகத்தில் பல பல்கலைக்கழகங்களில் நீண்ட நாட்களாகத் துணைவேந்தர் பணியிடங்கள் காலியாக உள்ளன. இந்தத் தீர்ப்பைத் தொடர்ந்து, புதிய துணைவேந்தர்களை நியமிக்கும் பணிகளை மாநில அரசு விரைவுபடுத்த வாய்ப்புள்ளது.

ஆளுநர் ஆர்.என். ரவி அவர்களுக்கும் மாநில அரசுக்கும் இடையே நிலவும் 'அதிகாரப் போர்' இந்தத் தீர்ப்பின் மூலம் மீண்டும் தீவிரமடையக்கூடும்.

உச்ச நீதிமன்றம் தடையை நீக்கியிருந்தாலும், வழக்கின் இறுதி விசாரணை இன்னும் முடிவடையவில்லை. UGC விதிகளைப் பின்பற்றி இந்த நியமனங்கள் நடைபெறுகிறதா என்பதை நீதிமன்றம் தொடர்ந்து கண்காணிக்கும்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now