“சீட் கிடைக்காதது வருத்தமல்ல, புறக்கணிப்புதான் வலி”...! முன்னாள் சபாநாயகர் தனபால்..! மகன் தவெக...!

by Vignesh Perumal on | 2026-04-03 09:43 PM

Share:

“சீட் கிடைக்காதது வருத்தமல்ல, புறக்கணிப்புதான் வலி”...! முன்னாள் சபாநாயகர் தனபால்..! மகன் தவெக...!

அதிமுக முன்னாள் சபாநாயகரும், அக்கட்சியின் மூத்த தலைவருமான பி. தனபால் அவர்கள், தனது மகன் லோகேஷ் தமிழ்செல்வன் விஜய் தலைமையிலான தமிழக வெற்றிக் கழகத்தில் (தவெக) இணைந்தது குறித்து உருக்கமான அறிக்கை ஒன்றை வெளியிட்டுள்ளார்.

அதிமுகவின் மூத்த தலைவர்களில் ஒருவரான தனபால், கடந்த சில நாட்களாக நிலவி வரும் அரசியல் சூழல் மற்றும் தனது மகனின் கட்சி மாற்றம் குறித்து தனது மனவேதனையை வெளிப்படுத்தியுள்ளார்.

முன்னாள் சபாநாயகர் தனபால் தனது அறிக்கையில் பின்வரும் முக்கியக் கருத்துகளைப் பகிர்ந்துள்ளார்: "வரும் சட்டமன்றத் தேர்தலில் போட்டியிட கட்சித் தலைமையிடம் நான் வாய்ப்பு கேட்டது உண்மைதான். ஆனால் எனக்கு வாய்ப்பு வழங்கப்படவில்லை. பலமுறை சட்டமன்ற உறுப்பினராகவும், அமைச்சராகவும், சபாநாயகராகவும் பணியாற்றிய எனக்கு இந்த முறை 'சீட்' கிடைக்காததில் எனக்கு எந்த வருத்தமும் இல்லை. கட்சியின் முடிவை நான் மதிக்கிறேன்.

எனக்குத் தேர்தலில் போட்டியிட வாய்ப்பு கிடைக்காததை விட, கடந்த சில மாதங்களாக நான் உடல்நலம் குன்றி இருந்தபோது, கட்சியின் முக்கியத் தலைவர்கள் யாரும் என்னை நேரில் வந்து பார்க்கவில்லை என்பதுதான் எனக்குப் பெரும் மனவருத்தத்தை அளிக்கிறது. பல தசாப்தங்களாகக் கட்சிக்கு உழைத்த ஒரு சீனியர் தலைவரை இவ்வளவு எளிதாகப் புறக்கணித்தது வலியைத் தருகிறது.

எனக்கு நேர்ந்த இந்தப் புறக்கணிப்பையும், அவமதிப்பையும் பார்த்த என் மகன் லோகேஷ் மிகுந்த மனவேதனை அடைந்தார். இதனால் ஏற்பட்ட விரக்தியின் காரணமாகவே, அவர் தனது அரசியல் எதிர்காலத்தைக் கருத்தில் கொண்டு 'தமிழக வெற்றிக் கழகத்தில்' இணைய முடிவு செய்தார். இது அவருடைய தனிப்பட்ட விருப்பம்."

இவர் அதிமுகவில் மாநில இளைஞர் அணி இணைச் செயலாளராகப் பணியாற்றியவர். கடந்த பிப்ரவரி 21, 2026 அன்று சென்னையில் விஜய் முன்னிலையில் தன்னை தவெக-வில் இணைத்துக் கொண்டார்.

கட்சியின் தலித் முகமாகவும், விசுவாசியாகவும் அறியப்பட்ட தனபாலின் குடும்பத்திலிருந்து ஒருவர் விலகியது, குறிப்பாக கொங்கு மண்டல அதிமுகவில் சலசலப்பை ஏற்படுத்தியுள்ளது.

தனபால் ஒரு 'கட்சி விசுவாசி' என்பதால் அவர் அதிமுகவிலேயே தொடர்ந்தாலும், அவரது மகன் மூலம் ஒரு பெரிய ஆதரவாளர் வட்டம் தவெக-வுக்குச் செல்ல வாய்ப்புள்ளதாகக் கருதப்படுகிறது. குறிப்பாக, அதிமுகவில் உள்ள இரண்டாம் கட்ட நிர்வாகிகள் மற்றும் சீனியர் தலைவர்களின் குடும்பத்தினர் மத்தியில் நிலவும் அதிருப்தியை இந்தச் சம்பவம் வெளிச்சம் போட்டுக் காட்டியுள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now