ஒட்டன்சத்திரம் அருகே பரபரப்பு...! ரூ.10 லட்சம் பறிமுதல்...!

by Vignesh Perumal on | 2026-03-21 07:09 PM

Share:

ஒட்டன்சத்திரம் அருகே பரபரப்பு...! ரூ.10 லட்சம் பறிமுதல்...!

தமிழகச் சட்டமன்றத் தேர்தலை முன்னிட்டுத் திண்டுக்கல் மாவட்டம் ஒட்டன்சத்திரம் சட்டமன்றத் தொகுதிக்குட்பட்ட பகுதியில், உரிய ஆவணங்களின்றி சரக்கு வேனில் கொண்டு செல்லப்பட்ட ரூ.10 லட்சம் ரொக்கப் பணத்தைத் தேர்தல் பறக்கும் படையினர் அதிரடியாகப் பறிமுதல் செய்தனர்.

2026 தமிழகச் சட்டமன்றத் தேர்தல் நன்னடத்தை விதிமுறைகள் அமலில் உள்ளதால், வாக்காளர்களுக்குப் பணம் மற்றும் பரிசுப் பொருட்கள் விநியோகிப்பதைத் தடுக்கத் திண்டுக்கல் மாவட்டம் முழுவதும் தேர்தல் பறக்கும் படையினர் 24 மணி நேரமும் தீவிரக் கண்காணிப்பில் ஈடுபட்டு வருகின்றனர். அதன் ஒரு பகுதியாக, இன்று ஒட்டன்சத்திரம் அருகே உள்ள நாகனம்பட்டி பகுதியில் தேர்தல் பறக்கும் படையினர் தீவிர வாகன சோதனையில் ஈடுபட்டனர்.

அப்போது அவ்வழியாக வந்த சரக்கு வேன் ஒன்றை அதிகாரிகள் மறித்துச் சோதனை செய்தனர். அந்த வாகனத்தில் வந்த நெய் கம்பெனி உரிமையாளர் சுபாஷ் என்பவரிடம் சோதனை நடத்தியபோது, அவரிடம் பெரிய அளவில் ரொக்கப் பணம் இருப்பது கண்டறியப்பட்டது.

அதிகாரிகள் நடத்திய விரிவான விசாரணையில், அவரிடம் இருந்த ரூ.10 லட்சம் ரொக்கப் பணத்திற்கு முறையான வங்கி ஆவணங்களோ அல்லது உரிய ஆதாரங்களோ இல்லை என்பது தெரியவந்தது. தேர்தல் விதிமுறைப்படி ரூ.50,000-க்கு மேல் உரிய ஆதாரமின்றிப் பணம் கொண்டு செல்ல அனுமதி இல்லை என்பதால், அந்தப் பணத்தைத் தேர்தல் பறக்கும் படையினர் முறைப்படி பறிமுதல் செய்தனர்.

பறிமுதல் செய்யப்பட்ட ரூ.10 லட்சம் பணத்தை அதிகாரிகள் உடனடியாக ஒட்டன்சத்திரம் வட்டாட்சியர் அலுவலகத்திற்கு கொண்டு சென்றனர். அங்கு ஒட்டன்சத்திரம் சட்டமன்றத் தொகுதி தேர்தல் நடத்தும் அலுவலர் பிரபு அவர்களிடம் அந்தப் பணம் ஒப்படைக்கப்பட்டது.

பறிமுதல் செய்யப்பட்ட தொகை ரூ.10 லட்சம் அல்லது அதற்கும் அதிகமாக இருக்கும் பட்சத்தில், அது குறித்து வருமான வரித்துறையினருக்குத் தகவல் தெரிவிக்க வேண்டும் என்ற விதிமுறை உள்ளது. அதன்படி, தேர்தல் நடத்தும் அலுவலர் பிரபு அந்தப் பணத்தை மேலதிக விசாரணைக்காக வருமான வரித்துறையினரிடம் ஒப்படைத்தார்.

பணத்தின் உரிமையாளர் சுபாஷ், உரிய வருமான வரித் தாக்கல் விவரங்கள் மற்றும் ஆவணங்களைச் சமர்ப்பித்து, விசாரணைக்குப் பிறகு பணத்தைத் திரும்பப் பெற்றுக்கொள்ளலாம் என அதிகாரிகள் தெரிவித்துள்ளனர். தேர்தல் களம் சூடுபிடித்துள்ள நிலையில், ஒட்டன்சத்திரத்தில் நடந்த இந்த மிகப்பெரியப் பறிமுதல் சம்பவம் வியாபாரிகள் மற்றும் அரசியல் வட்டாரத்தில் பெரும் பரபரப்பை ஏற்படுத்தியுள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now