வதந்திகளுக்கு முற்றுப்புள்ளி வைத்த சிபிஐ..!

by Vignesh Perumal on | 2026-02-25 12:01 PM

Share:

வதந்திகளுக்கு முற்றுப்புள்ளி வைத்த சிபிஐ..!

இந்திய சுதந்திரப் போராட்ட வீரரும், இந்திய கம்யூனிஸ்ட் கட்சியின் மூத்த தலைவருமான 101 வயது நிறைந்த ஐயா நல்லகண்ணு அவர்கள், உடல்நலக் குறைவு காரணமாகச் சென்னை ராஜீவ் காந்தி அரசு பொது மருத்துவமனையில் அனுமதிக்கப்பட்டுத் தீவிர சிகிச்சை பெற்று வருகிறார்.

சென்னையில் வசித்து வரும் ஐயா நல்லகண்ணு அவர்களுக்கு, கடந்த பிப்ரவரி 1-ஆம் தேதி திடீரென மூச்சுத்திணறல் மற்றும் நுரையீரல் தொற்று பாதிப்பு ஏற்பட்டது. இதையடுத்து அவர் உடனடியாகச் சென்னை ராஜீவ் காந்தி அரசு மருத்துவமனையில் அனுமதிக்கப்பட்டார்.

அங்கு அவருக்கு மருத்துவர் குழுவினர் தீவிர சிகிச்சை அளித்து வரும் நிலையில், வயது முதிர்வு காரணமாக உடல்நிலையில் அவ்வப்போது பின்னடைவு ஏற்பட்டு வருகிறது. தற்போது அவர் தீவிர சிகிச்சைப் பிரிவில் (ICU) வெண்டிலேட்டர் உதவியுடன் சிகிச்சை பெற்று வருவதாகவும், மருத்துவர்கள் அவரை 24 மணி நேரமும் கண்காணித்து வருவதாகவும் மருத்துவமனை வட்டாரங்கள் தெரிவிக்கின்றன.

நல்லகண்ணு அவர்களின் உடல்நிலை குறித்து அறிந்த தமிழக முதல்வர் மு.க.ஸ்டாலின் அவர்கள், நேற்று முன்தினம் ராஜீவ் காந்தி மருத்துவமனைக்கு நேரில் சென்றார். அங்கு அவருக்கு அளிக்கப்பட்டு வரும் சிகிச்சைகள் குறித்து மருத்துவர்களிடம் கேட்டறிந்த முதல்வர், அவரது குடும்பத்தினருக்கு ஆறுதல் கூறி, தேவையான அனைத்து உயர்தர சிகிச்சைகளையும் உறுதி செய்யுமாறு அறிவுறுத்தினார்.

நல்லகண்ணு அவர்களின் உடல்நிலை கவலைக்கிடமாக இருப்பதாகத் தகவல் வெளியான நிலையில், நேற்று இரவு அவர் காலமானதாகச் சமூக வலைதளங்களில் சில தவறான செய்திகள் வேகமாகப் பரவின. இது தொண்டர்கள் மற்றும் பொதுமக்கள் மத்தியில் பெரும் அதிர்ச்சியை ஏற்படுத்தியது.

இந்த வதந்திகளைத் திட்டவட்டமாக மறுத்துள்ள இந்திய கம்யூனிஸ்ட் கட்சி (CPI), ஒரு முக்கிய அறிக்கையை வெளியிட்டுள்ளது: "ஐயா நல்லகண்ணு அவர்களின் உடல்நிலை குறித்துச் சமூக ஊடகங்களில் பரவும் தகவல் வேதனை அளிக்கிறது. அவரது உடல்நிலையில் அவ்வப்போது சிறு பின்னடைவு ஏற்பட்டாலும், தற்போது அவர் நிலைத்தன்மையுடன் இருக்கிறார். கட்சியின் அதிகாரப்பூர்வ அறிவிப்பு வரும் வரை யாரும் இத்தகைய வதந்திகளைப் பரப்ப வேண்டாம்; நம்பவும் வேண்டாம்."

101 வயதிலும் பொதுவாழ்வில் நேர்மையின் அடையாளமாகத் திகழும் ஐயா நல்லகண்ணு அவர்கள், விரைவில் நலம் பெற்றுத் திரும்ப வேண்டும் எனப் பல்வேறு அரசியல் கட்சித் தலைவர்களும், சமூக ஆர்வலர்களும் விருப்பம் தெரிவித்து வருகின்றனர்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now