தமிழை அடுத்த தலைமுறைக்கு கொண்டு சேர்ப்பது நம் கடமை..! முதல்வர் நெகிழ்ச்சிப் பதிவு..!

by Vignesh Perumal on | 2026-02-21 11:10 AM

Share:

தமிழை அடுத்த தலைமுறைக்கு கொண்டு சேர்ப்பது நம் கடமை..! முதல்வர் நெகிழ்ச்சிப் பதிவு..!

உலகத் தாய்மொழிகள் நாளையொட்டி, தமிழ்மொழியின் சிறப்பையும், அதை அடுத்தடுத்த தலைமுறைகளுக்குக் கொண்டு செல்ல வேண்டியதன் அவசியத்தையும் வலியுறுத்தி தமிழக முதல்வர் மு.க.ஸ்டாலின் அவர்கள் தனது சமூக வலைதளப் பக்கத்தில் வாழ்த்துச் செய்தியைப் பகிர்ந்துள்ளார்.

தனது பதிவில் தமிழ்மொழியின் பெருமையைப் போற்றிய முதல்வர், “ஏராளமானோர் உயிர் கொடுத்துக் காத்த நம் உயிர்நிகர் தமிழ்மொழியை எத்தனை சிறப்புகள் சொல்லி அழைத்தாலும், 'தமிழே' என்று அழைத்திடும்போது கிடைத்திடும் இன்பம் மகத்தானது” என்று குறிப்பிட்டுள்ளார். தமிழுக்காகத் தங்களை ஈகம் செய்த தியாகிகளை நினைவு கூர்ந்த அவர், தமிழ் மொழி என்பது வெறும் பேச்சு வழக்கானது மட்டுமல்ல, அது தமிழர்களின் உயிருக்கு நிகரானது என்பதையும் பதிவு செய்துள்ளார்.

முன்னாள் முதல்வர் கலைஞர் கருணாநிதி அவர்கள் தமிழைப் போற்றி எழுதிய வரிகள் தற்போது பாடலாக்கப்பட்டுள்ளன. அந்தப் பாடலை உருவாக்கிய கலைஞர்களுக்குத் தனது நன்றியைத் தெரிவித்துள்ள முதல்வர்: "தலைவர் கலைஞரின் இந்த வரிகளைப் பாடலாக்கிய அனைவரும் பாராட்டுக்குரியவர்கள். அவர்களுக்கு என் நன்றியைத் தெரிவித்துக் கொள்கிறேன்" என்று நெகிழ்ச்சியுடன் குறிப்பிட்டுள்ளார்.

இறுதியாக, தமிழைப் பாதுகாப்பது என்பது ஒரு குறிப்பிட்ட பகுதிக்கான கடமையல்ல, அது உலகளாவிய தமிழர்களின் பொறுப்பு என்று அவர் சுட்டிக்காட்டியுள்ளார்.

நம் தாய்மொழியாம் தமிழை அந்நிய ஆதிக்கங்களில் இருந்து காக்க வேண்டும். தமிழைச் செழிப்போடு வாழவைக்கத் தேவையான பணிகளை மேற்கொள்ள வேண்டும்.

மொழியைச் சிதையாமல் அடுத்தடுத்த தலைமுறைகளுக்குக் கொண்டு சேர்க்க வேண்டும்.

இந்த மூன்று முக்கியக் கடமைகளையும் உலகெங்கும் வாழும் அனைத்துத் தமிழர்களும் தங்கள் பொறுப்பாகக் கொண்டு செயல்பட வேண்டும் என முதல்வர் மு.க.ஸ்டாலின் தனது செய்தியில் கேட்டுக்கொண்டுள்ளார்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now