பெரும் சோகம்...! கணவன் மனைவி சம்பவ இடத்திலேயே மரணம்...! பரிதவித்த 3 குழந்தைகள்...!

by Vignesh Perumal on | 2026-02-11 07:41 PM

Share:

பெரும் சோகம்...! கணவன் மனைவி சம்பவ இடத்திலேயே மரணம்...! பரிதவித்த 3 குழந்தைகள்...!

சொந்த ஊரில் நடைபெற்ற துக்க நிகழ்வில் பங்கேற்பதற்காக மும்பையிலிருந்து ரயிலில் வந்த தம்பதி, ஆரணி அருகே ரயிலில் இருந்து கீழே விழுந்து உயிரிழந்த சம்பவம் பெரும் சோகத்தை ஏற்படுத்தியுள்ளது.

கள்ளக்குறிச்சி மாவட்டத்தைச் சேர்ந்தவர் சிவகண்டன் (37). இவரது மனைவி கலையரசி. இந்தத் தம்பதி தங்களது குடும்பத்துடன் மகாராஷ்டிர மாநிலம் மும்பையில் வசித்து வந்தனர். இந்நிலையில், கள்ளக்குறிச்சியில் உள்ள தங்களது சொந்த ஊரில் நடைபெற்ற ஒரு துக்க நிகழ்வில் கலந்து கொள்வதற்காக, இவர்கள் ரயிலில் தமிழகம் நோக்கி வந்து கொண்டிருந்தனர்.

இன்று அதிகாலை ரயில் திருவண்ணாமலை மாவட்டம், ஆரணி அடுத்த வடமாதிமங்கம் ரயில் நிலையம் அருகே வந்து கொண்டிருந்தது.

ரயிலின் வாசல் அருகே நின்று கொண்டிருந்த சிவகண்டன், அதிகாலை நேரத்தில் எதிர்பாராதவிதமாக நிலைதடுமாறி ரயிலில் இருந்து கீழே விழுந்தார்.

தனது கண் முன்னே கணவர் கீழே விழுவதைக் கண்டு அதிர்ச்சியடைந்த கலையரசி, அவரைப் பிடிக்க முயன்றுள்ளார். இதில் வேகம் குறையாமல் சென்று கொண்டிருந்த ரயிலில் இருந்து அவரும் நிலைதடுமாறி கீழே விழுந்தார்.

ரயிலில் இருந்து மிக வேகமாக கீழே விழுந்ததில், தம்பதி இருவரும் பலத்த காயமடைந்து சம்பவ இடத்திலேயே பரிதாபமாக உயிரிழந்தனர். விபத்து குறித்துத் தகவல் அறிந்த ரயில்வே போலீசார், சம்பவ இடத்திற்கு விரைந்து வந்து இருவரின் உடல்களையும் கைப்பற்றிப் பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.

உயிரிழந்த சிவகண்டன் - கலையரசி தம்பதிக்கு மூன்று பெண் குழந்தைகள் உள்ளனர். துக்க நிகழ்விற்காக வந்த பெற்றோர் வழியிலேயே உயிரிழந்த செய்தி கேட்டு, அவர்களது உறவினர்கள் மற்றும் குழந்தைகள் கதறி அழுதது காண்போரை கண் கலங்கச் செய்தது.

ரயில் பயணங்களின் போது, குறிப்பாக அதிகாலை மற்றும் இரவு நேரங்களில் ரயிலின் வாசல் அருகே நின்று பயணம் செய்வதைத் தவிர்க்க வேண்டும் என்று ரயில்வே போலீசார் மீண்டும் எச்சரிக்கை விடுத்துள்ளனர். ஒரு சிறிய கவனக்குறைவு ஒரு முழு குடும்பத்தையே நிலைகுலையச் செய்துவிடும் என்பதற்கு இந்தச் சம்பவம் ஒரு கசப்பான உதாரணமாக மாறியுள்ளது.

நிர்வாக ஆசிரியர் - பா.விக்னேஷ்பெருமாள்.

WhatsApp Group Join Now