பாமக கூட்டணி....! விசிக அதிரடி அறிவிப்பு....!

by Vignesh Perumal on | 2026-02-07 11:43 AM

Share:

பாமக கூட்டணி....! விசிக அதிரடி அறிவிப்பு....!

2026 சட்டமன்றத் தேர்தலை முன்னிட்டுத் தமிழக அரசியல் களம் சூடுபிடித்துள்ள நிலையில், திமுக கூட்டணியில் பாமக இணைவது குறித்த ஊகங்களுக்குத் தங்களின் நிலைப்பாட்டை விசிக தலைவர் தொல். திருமாவளவன் மிகவும் அழுத்தமாகப் பதிவு செய்துள்ளார்.

திருச்சியில் அண்மையில் செய்தியாளர்களைச் சந்தித்த திருமாவளவன், திமுக கூட்டணியில் ராமதாஸ் தலைமையிலான பாமக இணைந்தால், தாங்கள் அந்தக் கூட்டணியைத் தொடரப்போவதில்லை என்பதைத் தெளிவுபடுத்தியுள்ளார்.

"பாமக மற்றும் பாஜக ஆகிய இரு கட்சிகளுடனும் ஒரே கூட்டணியில் இடம்பெறுவதில்லை என கடந்த 14 ஆண்டுகளுக்கு முன்பே (2011-ல்) விசிக ஒரு தெளிவான முடிவை எடுத்தது. அந்த முடிவில் நாங்கள் இன்றும் உறுதியாக இருக்கிறோம்" என அவர் தெரிவித்துள்ளார்.

பாமகவைச் சேர்த்துக்கொள்வது குறித்து திமுகதான் முடிவெடுக்க வேண்டும். ஆனால், அவர்கள் வரும் பட்சத்தில், எங்களின் பழைய நிலைப்பாட்டின்படி நாங்கள் கூட்டணியிலிருந்து வெளியேறுவது உறுதி" என்பது அவரது பேட்டியின் சாரமாக அமைந்தது.

விசிக மீதான மக்களின் நம்பிக்கையைச் சிதைக்கத் தயாராக இல்லை என்பதைத் திருமாவளவன் தனது பேட்டியில் பலமுறை வலியுறுத்தினார்.

விசிக ஒருபோதும் அதிகாரத்திற்காகவோ அல்லது கூடுதல் தொகுதிகளுக்காகவோ தனது கொள்கைகளை அடகு வைக்காது. மக்களின் மத்தியில் எங்களுக்கென்று ஒரு நம்பகத்தன்மை உள்ளது. அதை எந்தச் சூழலிலும் இழந்துவிடக் கூடாது என்பதில் நான் உறுதியாக இருக்கிறேன் என்றார்.

நாங்கள் வெறும் 'சீட்'களுக்காக அரசியல் செய்பவர்கள் அல்ல. திராவிட மாடல் ஆட்சியில் சமூக நீதியைக் காக்கவே திமுகவுடன் கைகோர்த்துள்ளோம். ஆனால், வெறுப்பு அரசியலை முன்னெடுக்கும் சக்திகளுடன் (பாமக) ஒரே மேடையில் அமர முடியாது" எனத் திட்டவட்டமாகக் கூறினார்.

2025-ன் இறுதியில் பாமக இரு பிரிவுகளாகப் பிரிந்தது. அன்புமணி ராமதாஸ் தலைமையிலான அணி அதிமுக-பாஜக கூட்டணியில் இணைந்த நிலையில், ராமதாஸ் தலைமையிலான அணிக்குத் தேர்தல் களம் நெருக்கடியாக மாறியுள்ளது.

ராமதாஸின் அணி திமுக கூட்டணியில் இணைய வாய்ப்பிருப்பதாக அரசியல் வட்டாரங்களில் செய்திகள் பரவின. இதற்கு முற்றுப்புள்ளி வைக்கும் விதமாகவே திருமாவளவனின் இந்த 'அல்டிமேட்டம்' பார்க்கப்படுகிறது.

தமிழக வெற்றிக் கழகத்தின் (தவெக) வருகைக்குப் பிறகு, திமுக தனது கூட்டணியைப் பலப்படுத்த புதிய கட்சிகளை இணைக்க முயல்வதாகக் கூறப்படும் சூழலில், விசிகவின் இந்த எதிர்ப்பு திமுக தலைமைக்கு ஒரு தர்மசங்கடத்தை ஏற்படுத்தியுள்ளது.

திருமாவளவனின் இந்த அறிவிப்பு திமுக கூட்டணிக்குள் இருக்கும் மற்ற கட்சிகளிடையே அதிர்வலைகளை ஏற்படுத்தியுள்ளது. பாமகவை உள்ளே இழுத்தால், தலித் மற்றும் சிறுபான்மையின வாக்கு வங்கியைப் பெற்றுத்தரும் விசிகவை இழக்க நேரிடும் என்பதால், திமுக தலைமை மிகவும் கவனமாகவே காய்களை நகர்த்தும் என எதிர்பார்க்கப்படுகிறது.

நிர்வாக ஆசிரியர் - பா. விக்னேஷ் பெருமாள்

WhatsApp Group Join Now