கொடைக்கானலில் வாகனங்கள் நுழைய 12 மணி நேரம் தடை...!

by Vignesh Perumal on | 2025-12-31 07:19 PM

Share:

கொடைக்கானலில் வாகனங்கள் நுழைய 12 மணி நேரம் தடை...!

மலைகளின் இளவரசியான கொடைக்கானலில் புத்தாண்டு கொண்டாட்டங்களை முன்னிட்டு, சுற்றுலாப் பயணிகளின் பாதுகாப்பை உறுதி செய்யவும், அசம்பாவிதங்களைத் தவிர்க்கவும் நகரின் முக்கியப் பகுதியான ஏரிச் சாலையில் வாகனப் போக்குவரத்துக்குக் காவல்துறையினர் அதிரடித் தடை விதித்துள்ளனர்.கொடைக்கானலின் மிக முக்கியமான சுற்றுலாத் தலமான நட்சத்திர ஏரியைச் சுற்றியுள்ள ஏரிச் சாலையில் (Lake Road), இன்று மாலை முதல் நாளை காலை வரை கடும் கட்டுப்பாடுகள் அமல்படுத்தப்பட்டுள்ளன.இன்று (டிசம்பர் 31) மாலை 6:00 மணி முதல் நாளை (ஜனவரி 1) காலை 6:00 மணி வரை இந்தத் தடை அமலில் இருக்கும். இருசக்கர வாகனங்கள் மற்றும் நான்கு சக்கர வாகனங்கள் என அனைத்து வகையான தனியார் வாகனங்களும் ஏரிச் சாலைக்குள் நுழைய அனுமதி மறுக்கப்பட்டுள்ளது.புத்தாண்டு நள்ளிரவு கொண்டாட்டங்களின் போது ஏரிச் சாலையில் மக்கள் கூட்டம் அதிகமாக இருக்கும். அப்போது வாகனங்களால் விபத்துகள் ஏற்படுவதைத் தவிர்க்கவும், நெரிசலின்றி மக்கள் நடந்து சென்று கொண்டாடவும் இந்த முடிவு எடுக்கப்பட்டுள்ளது. புத்தாண்டு கொண்டாட்டத்திற்காகத் திண்டுக்கல் மாவட்டத்தின் பல்வேறு பகுதிகளில் இருந்தும், அண்டை மாநிலங்களான கேரளா மற்றும் கர்நாடகாவிலிருந்தும் ஆயிரக்கணக்கான சுற்றுலாப் பயணிகள் கொடைக்கானலில் குவிந்துள்ளனர்.மாவட்ட காவல் கண்காணிப்பாளரின் உத்தரவின் பேரில் கொடைக்கானல் நகர் முழுவதும் கூடுதல் போலீசார் பாதுகாப்புப் பணியில் ஈடுபடுத்தப்பட்டுள்ளனர்.நகரின் நுழைவு வாயில்கள் மற்றும் முக்கிய சந்திப்புகளில் வாகனத் தணிக்கை தீவிரப்படுத்தப்பட்டுள்ளது. குடிபோதையில் வாகனம் ஓட்டுபவர்களைக் கண்டறிய 'பிரத் அனலைசர்' கருவிகளுடன் போலீசார் ரோந்து சுற்றி வருகின்றனர்.ஹோட்டல்கள் மற்றும் தங்கும் விடுதிகளில் தங்கியுள்ள சுற்றுலாப் பயணிகள், மாலையிலேயே தங்களது வாகனங்களை உரிய இடங்களில் நிறுத்திவிட வேண்டும் என்றும், ஏரிச் சாலைப் பகுதிக்கு வரும்போது நடைப்பயணமாக வருமாறும் காவல்துறையினர் கேட்டுக் கொண்டுள்ளனர். மேலும், பொது இடங்களில் அநாகரிகமாக நடந்துகொள்பவர்கள் மற்றும் அதிவேகமாக வாகனங்களை ஓட்டுபவர்கள் மீது கடும் நடவடிக்கை எடுக்கப்படும் எனத் திண்டுக்கல் மாவட்ட காவல்துறை எச்சரிக்கை விடுத்துள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now