திரையுலகில் சோகம்...! நடிகர் மோகன்லாலின் தாயார் சாந்தகுமாரி காலமானார்...!

by Vignesh Perumal on | 2025-12-30 04:58 PM

Share:

திரையுலகில் சோகம்...! நடிகர் மோகன்லாலின் தாயார் சாந்தகுமாரி காலமானார்...!

மலையாளத் திரையுலகின் முன்னணி நட்சத்திரம் மோகன்லாலின் தாயார் சாந்தகுமாரி (90), இன்று செவ்வாய்க்கிழமை காலமானார். வயது முதிர்வு மற்றும் உடல்நலக் குறைவு காரணமாக நீண்ட நாட்களாகச் சிகிச்சை பெற்று வந்த நிலையில், கொச்சியில் உள்ள மோகன்லாலின் இல்லத்தில் அவரது உயிர் பிரிந்தது.சாந்தகுமாரி அவர்கள் கடந்த சில ஆண்டுகளாகவே வயது மூப்பு சார்ந்த உடல்நலப் பிரச்சினைகளால் அவதிப்பட்டு வந்தார். கொச்சி இளமக்கராவில் உள்ள மோகன்லாலின் இல்லத்திலேயே தங்கி அவர் சிகிச்சை பெற்று வந்தார். தாயாரின் உடல்நிலையைக் கருத்தில் கொண்டு, மோகன்லால் தனது படப்பிடிப்புகளுக்கு இடையிலும் அவரை அருகிலிருந்து கவனித்துக் கொள்வதை வழக்கமாகக் கொண்டிருந்தார்.சாந்தகுமாரி அவர்களின் கணவர் விஸ்வநாதன் நாயர் ஏற்கனவே காலமானார். இத்தம்பதியினரின் மூத்த மகன் பியாரிலால் கடந்த 2000-ம் ஆண்டில் உயிரிழந்தார். தற்போது மோகன்லால் தனது தாயாரைப் பராமரித்து வந்தார்.மோகன்லாலின் திரைப்பயணத்தில் அவரது தாயார் மிகப்பெரிய தூணாக இருந்துள்ளார். இதனைப் பல பேட்டிகளில் மோகன்லால் நெகிழ்ச்சியுடன் குறிப்பிட்டுள்ளார்.

தனது பிஸியான கால்ஷீட் நேரத்திலும், எவ்வளவு தூரத்தில் படப்பிடிப்பு நடந்தாலும் அடிக்கடி வீட்டிற்கு வந்து தாயாரைச் சந்திப்பதைத் தவறுவதில்லை.சமீபத்தில் தமக்கு வழங்கப்பட்ட உயரிய தாதாசாகேப் பால்கே விருதை, தனது தாயாருடன் பகிர்ந்துகொண்டது மிகப்பெரிய பாக்கியம் என மோகன்லால் உருக்கமாகத் தெரிவித்திருந்தார். இந்த விருது குறித்த அறிவிப்பு வந்தவுடன், அவர் முதலில் சென்று பார்த்தது தனது தாயாரைத் தான் என்பது குறிப்பிடத்தக்கது.

மோகன்லாலின் தாயார் மறைந்த செய்தி கேட்டு மலையாள மற்றும் தமிழ் திரையுலகைச் சேர்ந்த பல முன்னணி நடிகர்கள், இயக்குநர்கள் மற்றும் ரசிகர்கள் சமூக வலைதளங்கள் வாயிலாகத் தங்களது ஆழ்ந்த இரங்கல்களைத் தெரிவித்து வருகின்றனர். அவரது இறுதிச்சடங்குகள் குறித்த விவரங்கள் குடும்பத்தாரால் விரைவில் அறிவிக்கப்படும் என எதிர்பார்க்கப்படுகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now