சிபிஐ, தவெக நிர்வாகிகளிடம் 2-வது நாளாக தொடர் விசாரணை...!

by Vignesh Perumal on | 2025-12-30 11:44 AM

Share:

சிபிஐ, தவெக நிர்வாகிகளிடம் 2-வது நாளாக தொடர் விசாரணை...!

தமிழக வெற்றிக் கழகத் (தவெக) தலைவர் விஜய் அவர்களின் தேர்தல் பரப்புரையின் போது கரூரில் நிகழ்ந்த கோரமான கூட்ட நெரிசல் விபத்து தொடர்பாக, மத்திய புலனாய்வுத் துறை (CBI) தனது விசாரணையைத் தீவிரப்படுத்தியுள்ளது. டெல்லியில் உள்ள சிபிஐ தலைமையகத்தில் இன்று தவெக நிர்வாகிகள் மற்றும் கரூர் மாவட்ட உயர் அதிகாரிகள் நேரில் ஆஜராகி விளக்கம் அளித்தனர்.இந்த வழக்கில் 2-வது நாளாக இன்றும் தவெகவின் முக்கிய நிர்வாகிகள் சிபிஐ அதிகாரிகள் முன்னிலையில் ஆஜராகினர். குறிப்பாக, புஸ்ஸி ஆனந்த் (தவெக பொதுச்செயலாளர்), ஆதவ் அர்ஜுனா, சி.டி.ஆர். நிர்மல் குமார் (தவெக இணை பொதுச்செயலாளர்) ஆகியோரிடம் கட்சியின் சார்பில் செய்யப்பட்ட பாதுகாப்பு ஏற்பாடுகள், கூட்டத்தைக் கட்டுப்படுத்த நியமிக்கப்பட்ட தன்னார்வலர்களின் எண்ணிக்கை மற்றும் கூட்ட நெரிசல் ஏற்பட்டபோது எடுக்கப்பட்ட நடவடிக்கைகள் குறித்து அடுக்கடுக்கான கேள்விகள் எழுப்பப்பட்டதாகத் தெரிகிறது.கட்சியினர் மட்டுமன்றி, அரசுத் தரப்பு அதிகாரிகளிடமும் சிபிஐ விசாரணை நடத்தி வருகிறது.கரூர் மாவட்ட ஆட்சியர் தங்தவேலு மற்றும் அந்தப் பகுதியில் பாதுகாப்புப் பணியில் ஈடுபட்டிருந்த காவல்துறை உயர் அதிகாரிகள் இன்று சிபிஐ அலுவலகத்தில் ஆஜராகினர். 10,000 பேருக்கு மட்டுமே அனுமதி வழங்கப்பட்ட நிலையில், 25,000-க்கும் மேற்பட்டோர் திரண்டதை ஏன் தடுக்கவில்லை?பாதுகாப்புப் பணியில் இருந்த காவலர்களின் எண்ணிக்கை போதுமானதாக இருந்ததா? என்பது குறித்து அதிகாரிகளிடம் விளக்கம் கேட்கப்பட்டுள்ளது.கடந்த செப்டம்பர் 27, 2025 அன்று கரூர் - ஈரோடு நெடுஞ்சாலையில் உள்ள வேலுச்சாமிபுரத்தில் விஜய் பங்கேற்ற பரப்புரை நடைபெற்றது. சுமார் 7 மணி நேரம் காலதாமதமாக விஜய் வந்தபோது, அவரைப் பார்க்க முண்டியடித்த கூட்டத்தில் ஏற்பட்ட நெரிசலில் சிக்கி குழந்தைகள் மற்றும் பெண்கள் உட்பட 41 பேர் பரிதாபமாக உயிரிழந்தனர். இந்த விபத்து "தேசிய மனசாட்சியை உலுக்கிய ஒன்று" என வர்ணித்த உச்ச நீதிமன்றம், மாநில காவல்துறையின் விசாரணை திருப்தி அளிக்கவில்லை எனக் கூறி அக்டோபர் மாதம் வழக்கைச் சிபிஐ-க்கு மாற்றியது. ஓய்வுபெற்ற நீதிபதி அஜய் ரஸ்தோகி தலைமையிலான கண்காணிப்புக் குழு இந்த விசாரணையை மேற்பார்வையிட்டு வருகிறது.விஜய் பயன்படுத்திய பரப்புரை வாகனத்தில் இருந்த சிசிடிவி காட்சிகள் மற்றும் செல்போன் பதிவுகளைச் சிபிஐ அதிகாரிகள் ஏற்கனவே ஆய்வு செய்துள்ளனர். இந்த விசாரணையின் முடிவில், பாதுகாப்பு விதிமீறல்களில் ஈடுபட்டவர்கள் யார் என்பது குறித்துக் குற்றப்பத்திரிகை தாக்கல் செய்யப்படும் என எதிர்பார்க்கப்படுகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now