"ஓட்டு போட்டால் போடு.. இல்லைனா போ!" சீமான் அதிரடிப் பேச்சு..!

by Vignesh Perumal on | 2026-04-05 02:05 PM

Share:

"ஓட்டு போட்டால் போடு.. இல்லைனா போ!" சீமான் அதிரடிப் பேச்சு..!

பெரம்பலூர் சட்டமன்றத் தொகுதியில் நாம் தமிழர் கட்சி வேட்பாளரை ஆதரித்து நடைபெற்ற தேர்தல் பிரச்சாரக் கூட்டத்தில், அக்கட்சியின் தலைமை ஒருங்கிணைப்பாளர் சீமான் அவர்கள் ஆவேசமாகப் பேசிய பேச்சு சமூக வலைதளங்களில் பெரும் விவாதத்தை ஏற்படுத்தியுள்ளது.

2026 சட்டமன்றத் தேர்தலை முன்னிட்டு தமிழகம் முழுவதும் தீவிரப் பிரச்சாரத்தில் ஈடுபட்டு வரும் சீமான், இன்று பெரம்பலூர் பழைய பேருந்து நிலையம் அருகே நடைபெற்ற பொதுக்கூட்டத்தில் உரையாற்றினார்.

"நான் யாருக்காகவும், எதற்காகவும் எனது கொள்கைகளை விட்டுக்கொடுக்க மாட்டேன். நீ எனக்கு ஓட்டு போட்டால் போடு, இல்லையென்றால் போ. அதற்காக நான் யாரிடமும் கையேந்த மாட்டேன். என் உடலில் தெம்பு இருக்கும் வரை இதே இடத்தில் நின்று, மக்களுக்காகக் கத்திக் கத்திச் சாவதற்கும் நான் தயார்," என்று ஆவேசமாகத் தெரிவித்தார்.

மற்ற கட்சிகள் கூட்டணி (சீட்) மற்றும் பணத்திற்காக (நோட்டு) பெரிய கட்சிகளிடம் தங்களை அடகு வைப்பதாகக் குற்றம் சாட்டிய அவர், "சரணடைந்து வாழ்வதை விடச் சண்டையிட்டுச் சாவதே மேலானது. யாரிடமும் கைகட்டி நின்று அரசியல் செய்ய வேண்டிய அவசியம் எனக்கு இல்லை," என்றார்.

தமிழகத்தை ஆண்ட திராவிடக் கட்சிகள் மக்களைப் பிச்சைக்காரர்களாக மாற்றிவிட்டதாகவும், இலவசங்களைக் கொடுத்து மக்களின் தன்மானத்தைச் சிதைத்துவிட்டதாகவும் சாடினார். "காசு கொடுத்து வாக்கைப் பெறுவது மக்களாட்சி அல்ல, அது பணநாயகம்," எனச் சீறினார்.

சீமானின் இந்தப் பேச்சு கூட்டத்தில் இருந்த தொண்டர்களிடையே பெரும் உற்சாகத்தை ஏற்படுத்தியது. "ஓட்டு போட்டால் போடு இல்லையென்றால் போ" என்று அவர் பேசியது, தேர்தல் நேரத்தில் வாக்காளர்களை மிரட்டுவது போல் இருப்பதாகச் சில அரசியல் விமர்சகர்கள் கருத்துத் தெரிவித்து வருகின்றனர். இருப்பினும், "தன்மான அரசியல் பேசுபவர் எதற்கும் அஞ்சமாட்டார்" என்று அவரது ஆதரவாளர்கள் சமூக வலைதளங்களில் இதைப் பகிர்ந்து வருகின்றனர்.

பெரம்பலூர் தொகுதியில் நாம் தமிழர் கட்சி இம்முறை தனித்துப் போட்டியிடுகிறது. கடந்த தேர்தல்களில் அக்கட்சி பெற்ற வாக்கு சதவீதத்தை விட இம்முறை கூடுதல் வாக்குகளைப் பெற வேண்டும் என்ற இலக்கோடு சீமான் மாநிலம் முழுவதும் சூறாவளிப் பயணம் மேற்கொண்டு வருகிறார்.

"மாற்றம் ஒன்றே மாறாதது. அந்த மாற்றத்தை ஏற்படுத்தத் துணிச்சலான ஒரு தலைவனைத் தேர்ந்தெடுங்கள்" எனப் பெரம்பலூர் மக்களிடம் அவர் வேண்டுகோள் விடுத்தார்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now