சூடு பிடிக்கும் விவகாரம்...! முன்னாள் அதிமுக நிர்வாகி..! மீண்டும் போலீஸ் காவல்...!

by Vignesh Perumal on | 2025-06-24 12:30 PM

Share:

சூடு பிடிக்கும் விவகாரம்...! முன்னாள் அதிமுக நிர்வாகி..! மீண்டும் போலீஸ் காவல்...!

நடிகர் ஸ்ரீகாந்த்திற்கு எட்டு முறை போதைப்பொருள் வாங்கி கொடுத்ததாகக் கூறப்படும் அதிமுக முன்னாள் நிர்வாகி பிரசாத்தை மீண்டும் போலீஸ் காவலில் எடுத்து விசாரிக்க சென்னை போதைப்பொருள் தடுப்பு நுண்ணறிவுப் பிரிவு போலீசார் திட்டமிட்டுள்ளனர். பிரசாத் ஏற்கனவே பல்வேறு குற்ற வழக்குகளில் சிக்கி குண்டர் சட்டத்தில் புழல் சிறையில் அடைக்கப்பட்டுள்ள நிலையில், இந்த போதைப்பொருள் விவகாரம் மேலும் பரபரப்பை ஏற்படுத்தியுள்ளது.

போதைப்பொருள் கடத்தல் மற்றும் விற்பனை தொடர்பான வழக்கில், சமீபத்தில் கானா நாட்டைச் சேர்ந்த ஒருவர் மற்றும் பிரதீப் குமார் உட்பட இருவர் கைது செய்யப்பட்டனர். இவர்களிடம் நடத்திய விசாரணையில், முன்னாள் அதிமுக பிரமுகர் பிரசாத் இந்த போதைப்பொருள் கும்பலுடன் தொடர்பு வைத்திருப்பது தெரியவந்தது. இதையடுத்து, பிரசாத் கைது செய்யப்பட்டார்.

பிரசாத்திடம் நடத்திய விசாரணையின்போது, நடிகர் ஸ்ரீகாந்த்துக்கு அவர் எட்டு முறை போதைப்பொருள் வாங்கி கொடுத்ததாக அதிர்ச்சித் தகவலை வெளிப்படுத்தினார். இந்தத் தகவலின் அடிப்படையில், நேற்று (ஜூன் 23, 2025) நடிகர் ஸ்ரீகாந்த்திடம் போதைப்பொருள் தடுப்பு நுண்ணறிவுப் பிரிவு போலீசார் தீவிர விசாரணை நடத்தினர். மேலும், அவர் மருத்துவப் பரிசோதனைக்கும் உட்படுத்தப்பட்டார்.

நடிகர் ஸ்ரீகாந்த் விவகாரத்தில் பிரசாத்தின் பங்கு மேலும் வெளிச்சத்திற்கு வந்ததையடுத்து, அவரை மீண்டும் போலீஸ் காவலில் எடுத்து, போதைப்பொருள் சங்கிலித் தொடர், ஸ்ரீகாந்த்துக்கு வழங்கப்பட்ட போதைப்பொருளின் வகை மற்றும் அளவு, இவர்களுடன் தொடர்புடைய பிற நபர்கள் யார் என்பது குறித்து விரிவாக விசாரிக்க போலீசார் முடிவு செய்துள்ளனர். இதற்கான சட்டப்பூர்வ நடவடிக்கைகளை போலீசார் மேற்கொண்டு வருகின்றனர்.

பிரசாத் ஏற்கனவே பல குற்ற வழக்குகளில் சிக்கியுள்ளார் என்பது குறிப்பிடத்தக்கது. அவர் மீது மதுபான விடுதிகளில் தகராறு செய்தது தொடர்பான வழக்குகள். பலரிடம் வேலை வாங்கித் தருவதாகக் கூறி பணம் பெற்று மோசடி செய்தது தொடர்பான வழக்குகள் என மொத்தம் 5 வழக்குகள் நிலுவையில் உள்ளன. இந்த வழக்குகளின் காரணமாக அவர் ஏற்கனவே குண்டர் சட்டத்தில் கைது செய்யப்பட்டு, தற்போது புழல் சிறையில் அடைக்கப்பட்டுள்ளார்.

சட்டவிரோத போதைப்பொருள் விற்பனையில் முக்கிய நபராக பிரசாத் செயல்பட்டிருக்கலாம் என்றும், திரையுலக பிரபலங்களுடனும் அவருக்கு தொடர்பு இருந்திருக்கலாம் என்றும் போலீசார் சந்தேகிக்கின்றனர். பிரசாத்தை காவலில் எடுத்து விசாரிக்கும்போது, மேலும் பல அதிர்ச்சியூட்டும் தகவல்கள் வெளியாகலாம் என எதிர்பார்க்கப்படுகிறது. இந்த விவகாரம், தமிழ் திரையுலகில் போதைப்பொருள் புழக்கம் குறித்த விவாதத்தை மீண்டும் தூண்டியுள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now