பாலியல் வன்கொடுமை புகார்...! சிவாச்சாரியார் கைது...!

by Vignesh Perumal on | 2025-06-09 10:41 AM

Share:

பாலியல் வன்கொடுமை புகார்...! சிவாச்சாரியார் கைது...!

திருப்பத்தூர் மாவட்டம் ஆம்பூர் அருகே உள்ள பிரசித்தி பெற்ற அருள்மிகு ஸ்ரீ நாகநாத சுவாமி திருக்கோயிலில் உழவாரப் பணிக்குச் சென்ற பெண்ணை பாலியல் வன்கொடுமை செய்ததாக அளிக்கப்பட்ட புகாரில், அக்கோயிலின் சிவாச்சாரியாரான தியாகராஜன் என்பவர் புதுச்சேரியில் தலைமறைவாக இருந்த நிலையில் கைது செய்யப்பட்டுள்ளார். இந்தச் சம்பவம் திருப்பத்தூர் மாவட்டத்திலும், இந்து சமய அறநிலையத் துறை வட்டாரத்திலும் பெரும் அதிர்ச்சியை ஏற்படுத்தியுள்ளது.

ஆம்பூர் பஜார் பகுதியில் உள்ள நாகநாத சுவாமி திருக்கோயிலில், உழவாரப் பணி மற்றும் தூய்மைப் பணிகளை மேற்கொள்ள வந்த ஒரு இளம்பெண் (பெயர் மாற்றப்பட்டுள்ளது), கோயிலின் அர்ச்சகராகப் பணியாற்றி வந்த தியாகராஜன் மீது பாலியல் வன்கொடுமைப் புகார் அளித்துள்ளார். இந்தப் புகாரில், தியாகராஜன் தன்னை திருமணம் செய்து கொள்வதாக ஏமாற்றி கடந்த ஒரு வருடத்திற்கும் மேலாக பாலியல் ரீதியாகத் தொந்தரவு செய்து வந்ததாக அவர் குற்றம் சாட்டியுள்ளார்.

பாதிக்கப்பட்ட இளம்பெண் சில தினங்களுக்கு முன்பு மாவட்ட காவல் கண்காணிப்பாளர் அலுவலகத்தில் புகார் அளித்தார். மாவட்ட காவல் கண்காணிப்பாளர் ஸ்ரேயா குப்தாவின் உத்தரவின் பேரில், ஆம்பூர் அனைத்து மகளிர் காவல்துறையினர் கோயில் அர்ச்சகர் தியாகராஜன் மீது நான்கு பிரிவுகளின் கீழ் வழக்குப்பதிவு செய்தனர். இது பாலியல் சம்பந்தப்பட்ட விவகாரம் என்பதால், ஒரு பெண் டி.எஸ்.பி சிறப்பு அதிகாரியாக நியமிக்கப்பட்டு விசாரணை நடத்தப்பட்டு வந்தது.

வழக்குப்பதிவு செய்யப்பட்டதில் இருந்து அர்ச்சகர் தியாகராஜன் தலைமறைவாக இருந்தார். காவல்துறையினர் அவரைத் தீவிரமாகத் தேடி வந்த நிலையில், இந்து சமய அறநிலையத் துறையும் அவருக்கு ஜூன் 6-ம் தேதி விளக்க நோட்டீஸ் அனுப்பியது. இந்த நோட்டீஸை நேரில் வழங்குவதற்காக அதிகாரிகள் அவரது வீட்டிற்குச் சென்றபோது, அவர் வீட்டில் இருந்ததாகக் கூறப்படுகிறது. ஆனால், காவல்துறை அவரைத் தேடி வருவதாகத் தெரிவித்தது.

தொடர்ந்து நடத்தப்பட்ட விசாரணையில், தியாகராஜன் புதுச்சேரியில் தலைமறைவாக இருந்ததும், அங்குதான் பதுங்கியிருந்ததும் தெரியவந்தது. இதை அடுத்து, திருப்பத்தூர் காவல்துறையினர் புதுச்சேரி விரைந்து, தலைமறைவாக இருந்த சிவாச்சாரியார் தியாகராஜனை கைது செய்தனர்.

கைது செய்யப்பட்ட தியாகராஜனிடம் காவல்துறையினர் தீவிர விசாரணை நடத்தி வருகின்றனர். அவர் ஏற்கனவே திருமணமானவர் என்றும், குழந்தைகள் உள்ள நிலையில், ஏற்கனவே ஒரு பெண்ணை இதேபோல் காதலித்து திருமணம் செய்து கொண்டதாகவும், தற்போது மூன்றாவது பெண்ணிடம் இதுபோன்று நடந்து கொண்டுள்ளதாகவும் தகவல் வெளியாகியுள்ளது. அவரது அரசியல் தொடர்புகள் குறித்தும் விசாரணை நடைபெறுவதாகத் தகவல்கள் தெரிவிக்கின்றன. மேலும், இந்தச் சம்பவத்தில் வேறு யாருக்காவது தொடர்பு உள்ளதா என்பது குறித்தும் காவல்துறை விசாரித்து வருகிறது.

இந்தச் சம்பவம் தமிழகத்தில் பெண்கள், மாணவிகள் பாலியல் ரீதியாகத் துன்புறுத்தப்படும் நிலையில், கோயிலுக்குச் செல்லும் பெண்களுக்குக் கூட பாதுகாப்பு இல்லை என்ற கவலையை பொதுமக்கள் மத்தியில் ஏற்படுத்தியுள்ளது. இந்து அமைப்புகளும், தியாகராஜன் இந்து மதத்திற்கு விரோதமாக நடந்து கொண்டுள்ளார் என்றும், அவருக்கு அர்ச்சனை செய்யும் தகுதி இல்லை என்றும் கூறி, அவரை உடனடியாகப் பணிநீக்கம் செய்யக் கோரி அதிகாரிகளிடம் மனு அளித்துள்ளன..

நிர்வாக ஆசிரியர். பா.விக்னேஷ்பெருமாள்.

WhatsApp Group Join Now