"டிஜிட்டல் அரஸ்ட்" என்ற நூதன மோசடி...! ₹1.02 கோடி பறித்த கும்பல்...!

by Vignesh Perumal on | 2025-06-03 12:40 PM

Share:

"டிஜிட்டல் அரஸ்ட்" என்ற நூதன மோசடி...! ₹1.02 கோடி பறித்த கும்பல்...!

மத்தியப் பிரதேச மாநிலம் இந்தூரில், 80 வயது மூதாட்டி ஒருவரிடம் "டிஜிட்டல் அரஸ்ட்" என்ற புதிய வகை மோசடி மூலம் ரூ. 1.02 கோடி ரூபாய் பறித்த மோசடி கும்பலுக்கு காவல்துறையினர் வலைவீசியுள்ளனர். இந்தச் சம்பவம் இந்தூர் வட்டாரத்தில் பெரும் அதிர்ச்சியை ஏற்படுத்தியுள்ளது.

இந்தூரின் துகோகஞ்ச் பகுதியைச் சேர்ந்த நந்தினி சிப்லங்கர் (80) என்ற மூதாட்டியை, மோசடி கும்பல் தொலைபேசி மூலம் தொடர்பு கொண்டுள்ளனர். அப்போது, நந்தினி மீது 267 முதல் தகவல் அறிக்கைகள் (FIR) பதிவு செய்யப்பட்டுள்ளதாகவும், அவர் தீவிர குற்றச் செயல்களில் ஈடுபட்டுள்ளதாகவும் கூறி மிரட்டியுள்ளனர். இந்த வழக்குகளில் இருந்து தப்பிக்க வேண்டுமானால், இரண்டு நாட்களுக்கு "டிஜிட்டல் அரஸ்ட்" செய்யப்படுவார் என்றும், அதற்கு ஒரு குறிப்பிட்ட தொகையைச் செலுத்த வேண்டும் என்றும் அச்சுறுத்தியுள்ளனர். இதன் மூலம், நந்தினி சிப்லங்கர் தனது வங்கி கணக்கிலிருந்து ரூ. 1.02 கோடி ரூபாயை மோசடி கும்பலுக்கு அனுப்பியுள்ளார்.

நந்தினி சிப்லங்கர் சுமார் ரூ. 50 லட்சம் இழந்த நிலையில், அவரது வங்கி மேலாளர் சந்தேகமடைந்துள்ளார். வழக்கத்திற்கு மாறான பெரிய அளவிலான பணப் பரிவர்த்தனைகள் குறித்து வங்கி மேலாளர் நந்தினியை எச்சரித்து, இந்த மோசடி குறித்து விளக்கிக் கூறியுள்ளார். இதன் பின்னரே, தான் ஏமாற்றப்பட்டதை நந்தினி உணர்ந்துள்ளார். உடனடியாக, துகோகஞ்ச் காவல் நிலையத்தில் நந்தினி சிப்லங்கர் இது குறித்துப் புகார் அளித்துள்ளார்.

நந்தினி சிப்லங்கரின் புகாரின் பேரில், காவல்துறையினர் வழக்குப்பதிவு செய்து தீவிர விசாரணை நடத்தி வருகின்றனர். "டிஜிட்டல் அரஸ்ட்" என்ற பெயரில் செய்யப்படும் இந்த மோசடி, புதிதாகப் புழக்கத்திற்கு வந்துள்ளது. இதுபோன்ற மோசடி கும்பல்கள், குறிப்பாக வயதானவர்களைக் குறிவைத்து, சட்டரீதியான அச்சுறுத்தல்களைப் பயன்படுத்தி பணம் பறிப்பதில் ஈடுபட்டுள்ளன. இந்த மோசடி கும்பலைக் கைது செய்வதற்காக காவல்துறையினர் தனிப்படைகளை அமைத்து தீவிரமாகத் தேடி வருகின்றனர்.

பொதுமக்கள், குறிப்பாக வயதானவர்கள், இதுபோன்ற போலியான தொலைபேசி அழைப்புகள் மற்றும் இணையவழி மிரட்டல்கள் குறித்து எச்சரிக்கையாக இருக்க வேண்டும் என்றும், வங்கி கணக்கு விவரங்கள் அல்லது தனிப்பட்ட தகவல்களைத் தெரியாதவர்களிடம் பகிர வேண்டாம் என்றும் காவல்துறையினர் அறிவுறுத்தியுள்ளனர். சந்தேகத்திற்குரிய அழைப்புகள் வந்தால், உடனடியாக காவல் துறைக்கு தகவல் தெரிவிக்குமாறு கேட்டுக்கொள்ளப்பட்டுள்ளது.

நிர்வாக ஆசிரியர்-பா.விக்னேஷ்பெருமாள்.

WhatsApp Group Join Now