தீக்குளித்து தற்கொலை செய்துகொள்ள அனுமதி கேட்டு கலெக்டரிடம் மனு...! பரபரப்பு...!

by Vignesh Perumal on | 2025-05-31 01:36 PM

Share:

தீக்குளித்து தற்கொலை செய்துகொள்ள அனுமதி கேட்டு கலெக்டரிடம் மனு...! பரபரப்பு...!

திண்டுக்கல் மாவட்டம், வேடசந்தூர் தாலுகா, வடமதுரை பேரூராட்சிக்குட்பட்ட ஆதம்ஸ் நகர், பால்கேனி பகுதியைச் சேர்ந்த பொதுமக்கள், கடந்த 30 ஆண்டுகளுக்கும் மேலாக தங்களுக்கு அத்தியாவசிய அடிப்படை வசதிகள் செய்து தரப்படவில்லை என்றும், மாவட்ட நிர்வாகம் தீண்டாமைப் போக்கைக் கடைப்பிடிப்பதாகவும் குற்றம்சாட்டி, தீக்குளித்து தற்கொலை செய்து கொள்ள அனுமதி கோரி மாவட்ட ஆட்சியரிடம் மனு அளித்துள்ளனர்.

"திண்டுக்கல் மாவட்ட அரசு நிர்வாகத்தால் தீண்டாமையால் பாதிக்கப்பட்ட மக்கள்" என்ற பெயரில் அளிக்கப்பட்ட இந்த மனு, அப்பகுதியில் பெரும் பரபரப்பை ஏற்படுத்தியுள்ளது. மனுவில், "கடந்த முப்பது ஆண்டுகளுக்கும் மேலாக ஆதம்ஸ் நகர், பால்கேனி பகுதியில் வசிக்கும் மக்களுக்கு குடிநீர், சாலை, மின்சாரம், கழிவுநீர் வசதி போன்ற அத்தியாவசிய அடிப்படை வசதிகள் செய்து தரப்படவில்லை. இதுகுறித்து பலமுறை மாவட்ட நிர்வாகத்திடம் கோரிக்கை விடுத்தும் எவ்வித நடவடிக்கையும் எடுக்கப்படவில்லை. மாவட்ட நிர்வாகம் தொடர்ந்து எங்களை புறக்கணித்து, தீண்டாமைப் போக்கைக் கடைபிடித்து வருகிறது" என்று குறிப்பிடப்பட்டுள்ளது.

மேலும், "எங்களது வாழ்வாதாரம் கடுமையாக பாதிக்கப்பட்டுள்ளது. அடிப்படை வசதிகள் இல்லாமல் வாழ்வது மிகவும் சிரமமாக உள்ளது. எனவே, மாவட்ட நிர்வாகத்தின் இந்த அலட்சியப் போக்கைக் கண்டித்தும், எங்களது நிலையை எடுத்துரைத்தும், நாங்கள் தீக்குளித்து தற்கொலை செய்து கொள்ள அனுமதி வழங்குமாறு தங்களை கேட்டுக்கொள்கிறோம்" என்றும் அந்த மனுவில் மக்கள் உருக்கமாகக் கோரிக்கை விடுத்துள்ளனர்.

இந்த மனு குறித்து திண்டுக்கல் மாவட்ட நிர்வாகம் உடனடியாக உரிய விசாரணை நடத்தி, பாதிக்கப்பட்ட மக்களின் குறைகளை நிவர்த்தி செய்ய வேண்டும் என சமூக ஆர்வலர்கள் கோரிக்கை விடுத்துள்ளனர். இத்தகைய ஒரு கடுமையான முடிவை எடுக்க மக்கள் துணிகிறார்கள் என்றால், அவர்களின் மன உளைச்சலும், இயலாமையும் எந்த அளவுக்கு உள்ளது என்பதை உணர்ந்து, மாவட்ட நிர்வாகம் விரைந்து செயல்பட வேண்டும் என்பதே அனைவரின் எதிர்பார்ப்பாக உள்ளது.

நிர்வாக ஆசிரியர்-பா.விக்னேஷ்பெருமாள்.

WhatsApp Group Join Now