களைகட்டும் பாரம்பரிய திருவிழா..! என்னென்ன சிறப்பு தெரியுமா...?

by Vignesh Perumal on | 2025-05-09 07:58 AM

Share:

களைகட்டும் பாரம்பரிய திருவிழா..! என்னென்ன சிறப்பு தெரியுமா...?

திண்டுக்கல் மாவட்டம் கொடைக்கானல் அருகே உள்ள போலூர் கிராமத்தில் அருள்மிகு ஸ்ரீ முத்துமாரியம்மன் கோயில் திருவிழா இன்று (09.05.2025), வெள்ளிக்கிழமை வெகு விமரிசையாக நடைபெற்று வருகிறது.

திருவிழாவின் முக்கிய நிகழ்வாக இன்று அம்மனுக்கு மாவிளக்கு எடுத்தல், பக்தர்கள் தீச்சட்டி ஏந்தி நேர்த்திக்கடன் செலுத்துதல், சிறப்பு அபிஷேக ஆராதனைகள் மற்றும் கிடாவெட்டுதல் போன்ற பல்வேறு வழிபாடுகள் நடைபெற்று வருகின்றன. காலை முதலே திரளான பக்தர்கள் கோயிலில் குவிந்து, தங்களது நேர்த்திக்கடனை செலுத்தியும், அம்மனை தரிசித்தும் வருகின்றனர்.

நாளை (10.05.2025), சனிக்கிழமை திருவிழாவின் கொண்டாட்டமான நிகழ்வாக கரகாட்டத்துடன் முளைப்பாரி ஊர்வலம் நடைபெற உள்ளது. கிராமத்தின் முக்கிய வீதிகள் வழியாக இந்த ஊர்வலம் வெகு சிறப்பாக நடைபெறும் என எதிர்பார்க்கப்படுகிறது.

திருவிழாவின் நிறைவாக, நாளை மறுநாள் (11.05.2025), ஞாயிற்றுக்கிழமை வீர விளையாட்டான மஞ்சுவிரட்டு நடைபெறும். சுற்றுவட்டார கிராமங்களில் இருந்து ஏராளமான காளைகளும், மாடுபிடி வீரர்களும் இதில் கலந்து கொள்வார்கள் என எதிர்பார்க்கப்படுகிறது.

போலூர் கிராமமே விழாக்கோலம் பூண்டுள்ள நிலையில், அனைத்து ஏற்பாடுகளும் சிறப்பாக செய்யப்பட்டுள்ளன. பக்தர்கள் எந்தவித இடையூறும் இன்றி சுவாமி தரிசனம் செய்யவும், திருவிழா நிகழ்வுகளில் கலந்து கொள்ளவும் ஏற்பாடுகள் செய்யப்பட்டுள்ளன. இந்த ஆண்டு முத்துமாரியம்மன் கோயில் திருவிழா போலூர் மற்றும் சுற்றுவட்டார கிராம மக்களுக்கு ஒரு பக்திப்பூர்வமான மற்றும் மகிழ்ச்சியான கொண்டாட்டமாக அமைந்துள்ளது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now