இந்தியா நதி நீர் ஒப்பந்தத்தை ரத்து செய்தது.....! பாகிஸ்தானின் நீர் விநியோகத்தில் பெரும் பாதிப்பு....!

by Vignesh Perumal on | 2025-04-23 10:03 PM

Share:

இந்தியா நதி நீர் ஒப்பந்தத்தை ரத்து செய்தது.....! பாகிஸ்தானின் நீர் விநியோகத்தில் பெரும் பாதிப்பு....!

இந்தியாவுக்கும் பாகிஸ்தானுக்கும் இடையிலான சிந்து நதி நீர் ஒப்பந்தத்தை இந்தியா ரத்து செய்துள்ளது. மத்திய அமைச்சரவையின் பாதுகாப்புக்கான குழுவின் (CCS) கூட்டத்தில் இந்த அதிரடி முடிவு எடுக்கப்பட்டுள்ளது.

இந்த ஒப்பந்தம் ரத்து செய்யப்பட்டதன் மூலம் பாகிஸ்தானின் நீர்ப்பாசனம் கடுமையாக பாதிக்கப்படும் அபாயம் ஏற்பட்டுள்ளது. பாகிஸ்தானின் மொத்த நீர் விநியோகத்தில் சுமார் 80% இந்த ஒப்பந்தத்தின் மூலமே கிடைக்கிறது என்பது குறிப்பிடத்தக்கது.

இந்தியா இந்த முடிவை எடுத்ததற்கான காரணம் குறித்து அதிகாரப்பூர்வமாக எதுவும் தெரிவிக்கப்படவில்லை. இருப்பினும், சமீபத்தில் ஜம்மு காஷ்மீரின் பஹல்காமில் நடைபெற்ற பயங்கரவாத தாக்குதலில் 28 பேர் உயிரிழந்த சம்பவத்தின் பின்னணியில் இந்த முடிவு எடுக்கப்பட்டிருக்கலாம் என்று கருதப்படுகிறது.

இந்த முடிவு குறித்து கருத்து தெரிவித்துள்ள இந்திய அதிகாரிகள், "இரத்தமும் தண்ணீரும் ஒன்றாகச் செல்ல முடியாது என்று நாங்கள் முன்பே கூறியுள்ளோம். நமது சொந்த அறிவிக்கப்பட்ட நிலைப்பாட்டின்படி செயல்படுவோம்" என்று தெரிவித்துள்ளனர். இதன் மூலம், பயங்கரவாதத்திற்கு ஆதரவளிக்கும் பாகிஸ்தானுடன் எந்தவிதமான ஒப்பந்தத்தையும் தொடர முடியாது என்ற இந்தியாவின் உறுதியான நிலைப்பாடு வெளிப்படுகிறது.

சிந்து நதி நீர் ஒப்பந்தம் 1960 ஆம் ஆண்டு இந்தியாவுக்கும் பாகிஸ்தானுக்கும் இடையே உலக வங்கியின் கையெழுத்தானது. இந்த ஒப்பந்தத்தின்படி, சிந்து நதி மற்றும் அதன் கிளை நதிகளின் நீரை இரு நாடுகளும் குறிப்பிட்ட விகிதத்தில் பயன்படுத்த உரிமை வழங்கப்பட்டிருந்தது. இந்தியா இந்த ஒப்பந்தத்தை ரத்து செய்திருப்பது இரு நாடுகளுக்கும் இடையே ஏற்கனவே நிலவும் பதற்றத்தை மேலும் அதிகரிக்கக்கூடும். பாகிஸ்தான் இந்த நடவடிக்கைக்கு எவ்வாறு பதிலளிக்கும் என்பதை பொறுத்திருந்து பார்க்க வேண்டும். இந்த முடிவு சர்வதேச அளவில் பெரும் அதிர்வலைகளை ஏற்படுத்தியுள்ளது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now