அரசியல் வரலாற்றில் முதல் முறையாக...! சட்டமன்றத்தில்...! பொறுப்புகள்...!

by Vignesh Perumal on | 2026-05-21 02:46 PM

Share:

அரசியல் வரலாற்றில் முதல் முறையாக...! சட்டமன்றத்தில்...! பொறுப்புகள்...!

தமிழக அரசியல் வரலாற்றில், தற்போது புதிதாக அமைந்துள்ள தமிழக அமைச்சரவையில் முன்னெப்போதும் இல்லாத வகையில் 7 பட்டியலின (SC) சமூகத்தைச் சேர்ந்தவர்களுக்கு அமைச்சர்களாகப் பணியாற்றும் வாய்ப்பு வழங்கப்பட்டுள்ளது மிகப்பெரிய வரலாற்றுச் சாதனையாகவும், சமூக நீதிப் பார்வையில் முக்கிய மைல்கல்லாகவும் பார்க்கப்படுகிறது.

தமிழகத்தில் அண்மையில் நடைபெற்ற ஆட்சி மாற்றத்தைத் தொடர்ந்து மாண்புமிகு முதலமைச்சர் சி. ஜோசப் விஜய் தலைமையில் அமைந்துள்ள அமைச்சரவை விரிவாக்கத்தின் போது இந்த வரலாற்றுச் சிறப்புமிக்க முடிவு நடைமுறைப்படுத்தப்பட்டுள்ளது.

இதற்கு முன்பு வரை தமிழகத்தில் அமைக்கப்பட்ட அமைச்சரவைகளில் ஆதிதிராவிடர் நலத்துறை, செய்தி மக்கள் தொடர்புத்துறை அல்லது கதர் மற்றும் கைத்தறி போன்ற ஒரு சில குறிப்பிட்ட துறைகளே பட்டியலின சமூகத்தைச் சேர்ந்த அமைச்சர்களுக்கு ஒதுக்கப்பட்டு வந்தன. அவர்களின் எண்ணிக்கையும் பொதுவாக 2 முதல் அதிகபட்சமாக 3 அல்லது 4 என்ற அளவிலேயே இருந்து வந்தது.

ஆனால், தற்போதைய அமைச்சரவையில் முதன்முறையாக 7 பட்டியலின சட்டமன்ற உறுப்பினர்களுக்கு அமைச்சர் பதவிகள் வழங்கப்பட்டுள்ளதுடன், அவர்களுக்குக் கணிசமான மற்றும் முக்கியத்துவம் வாய்ந்த துறைகளும் ஒதுக்கீடு செய்யப்பட்டுள்ளன.

தற்போது பொறுப்பேற்றுள்ள அமைச்சரவையில் இடம்பெற்றுள்ள அமைச்சர்கள், ஆதவ் அர்ஜுனா வில்லிவாக்கம், கே. ஜி. அருண்ராஜ் திருச்செங்கோடு, கமலி. S அவினாசி (தனி தொகுதி), வி. காந்திராஜ் அரக்கோணம் (தனி தொகுதி), பி. மதன்ராஜா ஒட்டப்பிடாரம் (தனி தொகுதி), லோகேஷ் தமிழ்செல்வன் ராசிபுரம் (தனி தொகுதி), ராஜ்மோகன் ஆறுமுகம் எழும்பூர் ஆகியோர் இடம்பெற்றுள்ளனர்

எழும்பூர், வில்லிவாக்கம் போன்ற பொது மற்றும் தனித் தொகுதிகளிலிருந்து வென்ற திறமையான இளைஞர்கள் மற்றும் பல்வேறு துறைகளில் நிபுணத்துவம் பெற்ற பட்டியலினப் பிரதிநிதிகளுக்கு இந்த அமைச்சரவையில் பிரதிநிதித்துவம் அளிக்கப்பட்டுள்ளது.

"அதிகாரத்தில் பங்கு" என்ற சமூக நீதி முழக்கத்தை வெறும் மேடைப் பேச்சாக நிறுத்தாமல், அமைச்சரவை உருவாக்கத்தில் மக்கள் தொகை விகிதாச்சாரத்தின் அடிப்படையில் பிரதிநிதித்துவம் வழங்கப்பட்டுள்ளது. இது பட்டியலின மக்களின் அரசியல் அதிகாரத்தை அடிமட்டத்திலிருந்து பலப்படுத்தும் முயற்சியாகப் பார்க்கப்படுகிறது.

வழக்கமான ஆதிதிராவிடர் நலத்துறையோடு மட்டுப்படுத்தாமல், பொதுப்பணித்துறை, நெடுஞ்சாலைகள், விளையாட்டு மேம்பாட்டுத்துறை (அமைச்சர் ஆதவ் அர்ஜுனா), சுகாதாரம் மற்றும் மருத்துவக் கல்வித்துறை (அமைச்சர் கே. ஜி. அருண்ராஜ்) மற்றும் பள்ளி கல்வித்துறை (அமைச்சர் ராஜ்மோகன் ஆறுமுகம்) போன்ற மாநிலத்தின் மிக முக்கிய கட்டமைப்பு மற்றும் சேவை சார்ந்த பொதுத் துறைகள் இவர்களுக்கு வழங்கப்பட்டுள்ளன.

அமைச்சரவையில் இடம்பெற்றுள்ள பட்டியலின பிரதிநிதிகளில் பெரும்பாலானோர் நன்கு படித்த, இளம் மற்றும் புதிய முகங்கள் ஆவர். இது நிர்வாகத்தில் புதிய வேகத்தையும், நவீன அணுகுமுறையையும் கொண்டு வரும் என எதிர்பார்க்கப்படுகிறது.

தமிழக அரசியல் வரலாற்றில் திராவிட ஆட்சிக் காலங்களிலும் சரி, அதற்குப் பின்னரும் சரி, அமைச்சரவையில் சமூகச் சமநிலையைப் பேணுவது என்பது எப்போதும் சவாலான ஒன்றாகவே இருந்து வந்துள்ளது. இந்தச் சூழலில், புதிய அமைச்சரவையில் 7 பட்டியலின அமைச்சர்களை அமர வைத்திருப்பது தற்போதைய புதிய அரசின் கொள்கை ரீதியான சமூக நீதிப் பார்வைக்குக் கிடைத்த பெரிய அடையாளமாக அரசியல் வட்டாரங்களில் பரவலாகப் பாராட்டப்பட்டு வருகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now