போடியில் சூடுபிடிக்கும் தேர்தல் களம்...! ₹1 லட்சம், 5 பவுன் தங்கம்...! ஓபிஎஸ் அதிரடி ஆஃபர்...!

by Vignesh Perumal on | 2026-04-11 10:52 AM

Share:

போடியில் சூடுபிடிக்கும் தேர்தல் களம்...! ₹1 லட்சம், 5 பவுன் தங்கம்...! ஓபிஎஸ் அதிரடி ஆஃபர்...!

தேனி மாவட்டம் போடிநாயக்கனூர் சட்டமன்றத் தொகுதியில் திமுக வேட்பாளராகக் களம் காணும் முன்னாள் முதல்வர் ஓ. பன்னீர்செல்வம் (ஓபிஎஸ்), தனது பூத் கமிட்டி நிர்வாகிகளுக்கு அதிரடியான ஊக்கத்தொகை அறிவிப்புகளை வெளியிட்டுள்ளார்.

2026 சட்டமன்றத் தேர்தலில் போடி தொகுதியில் திமுக சார்பில் போட்டியிடும் ஓ. பன்னீர்செல்வம், தேர்தல் பணிகளை முடுக்கிவிடும் வகையில் மேலசொக்கநாதபுரம் பகுதியில் நேற்று நடைபெற்ற பூத் கமிட்டி நிர்வாகிகள் மற்றும் கட்சித் தொண்டர்கள் கூட்டத்தில் உரையாற்றினார்.

தேர்தலில் மற்ற வேட்பாளர்களை விடத் தனது தொகுதியில் அதிக வாக்குகளைப் பெற்றுத் தரும் நிர்வாகிகளுக்குப் பரிசு மழை பொழியும் என ஓபிஎஸ் அறிவித்துள்ளார்.

ஒவ்வொரு வாக்குச்சாவடியிலும் மற்ற வேட்பாளர்களை விட அதிக வாக்குகள் பெற்றுத் தரும் முகவர்களுக்குத் தலா ₹1,00,000 (ஒரு லட்சம் ரூபாய்) ரொக்கப் பரிசு வழங்கப்படும். தனது ஒன்றியத்தில் மிக அதிக வாக்குகளைப் பதிவு செய்ய வைக்கும் ஒன்றிய செயலாளர்களுக்கு 5 பவுன் தங்கப் பதக்கம் வழங்கப்படும்.

பூத் கமிட்டி கூட்டத்தில் அவர் பேசியதாவது: "இந்தத் தேர்தல் நமக்கு வாழ்வா சாவா போராட்டம் போன்றது. உதயசூரியன் சின்னத்தில் நாம் இங்கு மிகப்பெரிய வெற்றியைப் பதிவு செய்ய வேண்டும். நம்மை எதிர்த்து நிற்கும் வேட்பாளர்களை விட ஒரு வாக்குகூடக் குறையாமல் பார்த்துக் கொள்வது உங்கள் பொறுப்பு. உழைப்பவர்களுக்கு உரிய அங்கீகாரம் நிச்சயம் கிடைக்கும்."

அதிமுகவில் இருந்து நீக்கப்பட்ட பிறகு, ஓபிஎஸ் அவர்கள் திமுகவில் இணைந்து தற்போது அதன் வேட்பாளராகப் போடியில் களம் காண்கிறார். அவர் இம்முறை உதயசூரியன் சின்னத்தில் போட்டியிடுகிறார்.

அவரது முன்னாள் கோட்டையான போடியில், அதிமுக மற்றும் தவெக வேட்பாளர்களுடன் அவர் கடும் போட்டியை எதிர்கொண்டுள்ளார்.

தேர்தல் நேரத்தில் நிர்வாகிகளுக்குப் பணம் மற்றும் தங்கம் வழங்குவதாக அவர் அறிவித்துள்ளது, தேர்தல் நடத்தை விதிகளின்படி சர்ச்சையை ஏற்படுத்த வாய்ப்புள்ளதாக அரசியல் நோக்கர்கள் கருதுகின்றனர்.

எதிர்க்கட்சிகளின் விமர்சனங்களுக்கு மத்தியிலும், தனது ஆதரவாளர்களையும் திமுக தொண்டர்களையும் உற்சாகப்படுத்த ஓபிஎஸ் இத்தகைய வியூகங்களைக் கையாண்டு வருகிறார்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now