ரூ.518 கோடி விற்பனை....! நயினார் நாகேந்திரன் கடும் விமர்சனம்..!

by Vignesh Perumal on | 2026-01-17 04:30 PM

Share:

ரூ.518 கோடி விற்பனை....! நயினார் நாகேந்திரன் கடும் விமர்சனம்..!

தமிழகத்தில் பொங்கல் பண்டிகையை முன்னிட்டு டாஸ்மாக் மது விற்பனை புதிய உச்சத்தைத் தொட்டுள்ளது. இதனை முன்வைத்து, திமுக அரசின் செயல்பாடுகளை 'நகை முரண்' என விமர்சித்துள்ள நயினார் நாகேந்திரன், தமிழக முதலமைச்சரின் இரட்டை வேடத்தைத் தோலுரிப்பதாகக் குறிப்பிட்டுள்ளார்.

முதலமைச்சர் மு.க.ஸ்டாலின் சமீபத்தில் "போதையில்லா தமிழகத்தை உருவாக்குவோம்" என்று உருக்கமாக ஒரு காணொளியை வெளியிட்டிருந்தார். ஆனால், அவர் ஆட்சியில் இந்த பொங்கல் பண்டிகைக்கு மட்டும் ரூ. 518 கோடிக்கும் அதிகமாக மது விற்பனை நடைபெற்றுள்ளது.

"உருகி உருகி காணொளி வெளியிட்ட முதலமைச்சரின் ஆட்சியில், மது விற்பனை களைகட்டியிருப்பது ஒரு சுவாரஸ்யமான நகை முரண்" என நயினார் நாகேந்திரன் விமர்சித்துள்ளார்.

திமுக அரசு பொறுப்பேற்றதிலிருந்து, பண்டிகை காலங்கள் என்றாலே அது சாராய வாடை வீசும் கொண்டாட்டங்களாக மாறிவிட்டதாக அவர் குற்றம் சாட்டியுள்ளார்.

"சாராய விற்பனையைப் பல மடங்குகளாக முடுக்கிவிட்டுக் கொண்டிருக்கிறது இந்த டாஸ்மாக் மாடல் அரசு" என்று சாடியுள்ள அவர், இது மக்கள் நல அரசு அல்ல, மது விற்பனை அரசு எனச் சுட்டிக்காட்டியுள்ளார்.

பொங்கல் பண்டிகைக்காக குடும்ப அட்டைதாரர்களுக்குத் தமிழக அரசு ரூ. 3,000 ரொக்கப்பணம் வழங்கியது.

"ஊரெல்லாம் தம்பட்டம் அடித்து ரூ. 3,000 கொடுத்துவிட்டு, அந்தப் பணத்தை அப்படியே டாஸ்மாக் வாயிலாக வசூலித்துள்ளனர்."

இந்தச் செயலை விளக்குவதற்கு, "இதற்குப் பருத்தி மூட்டை குடோனிலேயே இருந்திருக்கலாமே" என்ற புகழ்பெற்ற நகைச்சுவை வசனத்தைப் பயன்படுத்தி, அரசின் திட்டமிடலை அவர் கேலி செய்துள்ளார்.

பொதுவாகவே தமிழகத்தில் தீபாவளி, பொங்கல் போன்ற பண்டிகை காலங்களில் டாஸ்மாக் விற்பனை இலக்கு நிர்ணயிக்கப்பட்டு வசூல் செய்யப்படுவதாக எதிர்க்கட்சிகள் புகார் கூறி வருகின்றன.

கடந்த ஆண்டை விட இந்த ஆண்டு மது விற்பனை கணிசமாக உயர்ந்துள்ளதை புள்ளி விவரங்கள் காட்டுகின்றன.

போதைப் பொருள் புழக்கம் அதிகரித்துள்ளதாக ஏற்கனவே பாஜக உள்ளிட்ட எதிர்க்கட்சிகள் போராடி வரும் நிலையில், இந்த மது விற்பனை சாதனை திமுக அரசுக்கு தர்மசங்கடத்தை ஏற்படுத்தியுள்ளது.

நயினார் நாகேந்திரனின் இந்தப் பதிவு, திமுக அரசு ஒருபுறம் போதைக்கு எதிராகப் பேசுவது போலக் காட்டிக்கொண்டு, மறுபுறம் டாஸ்மாக் வருமானத்தை மட்டுமே குறியாகக் கொண்டு செயல்படுகிறது என்பதைத் தமிழக மக்களிடையே கொண்டு சேர்க்கும் முயற்சியாகப் பார்க்கப்படுகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now