திண்டுக்கல்லில் அதிகாரிகள் திடீர் ஆய்வு..!

by Vignesh Perumal on | 2026-01-14 01:16 PM

Share:

திண்டுக்கல்லில் அதிகாரிகள் திடீர் ஆய்வு..!

மத்திய அரசின் 'அமிர்த் பாரத்' திட்டத்தின் கீழ், திண்டுக்கல் மாவட்டம் பழனி ரயில் நிலையத்தில் நடைபெற்று வரும் நவீனமயமாக்கல் மற்றும் கட்டுமானப் பணிகளைத் தென்னக ரயில்வே பொது மேலாளர் (GM) ஆர்.என். சிங் இன்று நேரில் பார்வையிட்டு ஆய்வு செய்தார். பழனி ரயில் நிலையம், அறுபடை வீடுகளில் ஒன்றான தண்டாயுதபாணி சுவாமி கோயிலுக்கு வரும் பக்தர்களின் முக்கியப் போக்குவரத்து மையமாகத் திகழ்கிறது. இதனை உலகத் தரத்திற்கு உயர்த்துவதற்காக ஒதுக்கப்பட்டுள்ள நிதியில் நடைபெறும் பணிகளை அவர் ஒவ்வொன்றாக ஆய்வு செய்தார். ரயில் நிலையத்தின் முகப்புப் பகுதி (Facade) மாற்றியமைக்கப்படுவதுடன், பயணிகளுக்கான புதிய காத்திருப்பு அறைகள் மற்றும் நவீன வசதிகளுடன் கூடிய கட்டிடங்கள் கட்டப்பட்டு வருவதை அவர் பார்வையிட்டார். ரயில் நிலைய நடைமேடைகளில் தரைத்தளம் சீரமைக்கப்படுவது, மேற்கூரைகள் அமைப்பது மற்றும் பயணிகளின் வசதிக்காக கூடுதல் இருக்கைகள் அமைக்கும் பணிகளை ஆய்வு செய்தார். முதியவர்கள் மற்றும் மாற்றுத்திறனாளிகளுக்காக அமைக்கப்பட்டு வரும் மின் தூக்கிகள் மற்றும் நகரும் படிக்கட்டுகள் குறித்தும் கேட்டறிந்தார்.பயணிகளுக்குத் துல்லியமான தகவல்களை வழங்க அமைக்கப்பட்டு வரும் டிஜிட்டல் திரைகள் மற்றும் ஒலிபெருக்கி வசதிகளின் தரம் குறித்து அதிகாரிகளுடன் ஆலோசனை நடத்தினார். ஆய்வின் போது கட்டுமானப் பணிகளின் தரத்தில் எவ்வித சமரசமும் இருக்கக்கூடாது என அதிகாரிகளுக்கு ஆர்.என். சிங் உத்தரவிட்டார். குறிப்பாக, பழனிக்கு வரும் லட்சக்கணக்கான பக்தர்களைக் கருத்தில் கொண்டு, நெரிசல் இன்றி அவர்கள் வந்து செல்ல ஏதுவாக போதிய இடவசதி மற்றும் குடிநீர், கழிவறை வசதிகளை உறுதி செய்ய வேண்டும் என அறிவுறுத்தினார்.மேலும், திட்டமிடப்பட்ட காலத்திற்குள்ளாகவே பணிகளை முடித்து, பொதுமக்களின் பயன்பாட்டிற்கு அர்ப்பணிக்க வேண்டும் என்றும் அவர் கேட்டுக்கொண்டார்.இந்த ஆய்வின் போது மதுரை கோட்ட ரயில்வே மேலாளர் (DRM) மற்றும் உயர்மட்ட தொழில்நுட்ப அதிகாரிகள், பொறியாளர்கள் உடனிருந்தனர்.

அமிர்த் பாரத் திட்டத்தின் மூலம் பழனி ரயில் நிலையம் நவீன தோற்றம் பெறுவது, ஆன்மீகச் சுற்றுலாப் பயணிகளின் எண்ணிக்கையை அதிகரிக்கும் என்றும், ரயில்வே நிர்வாகத்தின் இந்த நேரடி ஆய்வு பணிகளை விரைவுபடுத்தும் என்றும் பழனி பகுதி மக்கள் மற்றும் பக்தர்கள் மகிழ்ச்சி தெரிவித்துள்ளனர்.

செய்தி - மோகன் கணேஷ் திண்டுக்கல்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now