வேறு எங்கேனும் தொட்டிருந்தால் என்னவாகி இருக்கும்..? அமைச்சர் பேச்சு...! சமாஜ்வாதி கட்சி புகார்..!

by Vignesh Perumal on | 2025-12-18 02:11 PM

Share:

வேறு எங்கேனும் தொட்டிருந்தால் என்னவாகி இருக்கும்..? அமைச்சர் பேச்சு...! சமாஜ்வாதி கட்சி புகார்..!

பீகார் முதல்வர் நிதீஷ் குமார் ஒரு பெண்ணின் ஹிஜாப்பைத் தொட்ட விவகாரம் சர்ச்சையை ஏற்படுத்திய நிலையில், அவருக்கு ஆதரவாக உத்தரப் பிரதேச அமைச்சர் சஞ்சய் நிஷாத் பேசியுள்ள அநாகரிகமான கருத்துக்கள் நாடு முழுவதும் பெரும் கொந்தளிப்பை ஏற்படுத்தியுள்ளன. இது தொடர்பாக இருவர் மீதும் லக்னோ காவல் நிலையத்தில் புகார் அளிக்கப்பட்டுள்ளது.

பீகாரில் நடைபெற்ற ஒரு அரசு நிகழ்ச்சியின் போது, அங்கிருந்த ஒரு பெண்ணின் ஹிஜாப்பை (தலைக்கவசம்) முதல்வர் நிதீஷ் குமார் திடீரெனத் திறந்து பார்த்ததாகக் கூறப்படுகிறது. இந்தச் செயல் சமூக வலைதளங்களில் வெளியாகி, ஒரு மாநிலத்தின் முதல்வர் பெண்ணிடம் அநாகரிகமாக நடந்துகொண்டதாகக் கடும் விமர்சனங்களைச் சந்தித்தது.

இந்த விவகாரம் குறித்து செய்தியாளர்கள் கேள்வி எழுப்பியபோது, உத்தரப் பிரதேச அமைச்சரும், நிஷாத் கட்சியின் தலைவருமான சஞ்சய் நிஷாத் மிகவும் தரம் தாழ்ந்த முறையில் பதிலளித்துள்ளார். அவர் கூறுகையில்: "நிதீஷ் குமார் ஹிஜாப்பைத் தொட்டதற்கே இவ்வளவு பேசுகிறீர்களே? அவர் வேறு எங்கேனும் தொட்டிருந்தால் என்னவாகி இருக்கும்?"

ஒரு பொறுப்பான அமைச்சராக இருந்துகொண்டு, பெண்களின் கண்ணியத்தைக் குறைக்கும் வகையில் அவர் பேசியுள்ள இந்த அநாகரிகமான பேச்சு, அரசியல் வட்டாரத்தில் அதிர்ச்சியை ஏற்படுத்தியுள்ளது.

சஞ்சய் நிஷாத்தின் இந்தப் பேச்சுக்குச் சமாஜ்வாதி கட்சி கடும் கண்டனம் தெரிவித்துள்ளது. இது தொடர்பாக லக்னோவில் உள்ள காவல் நிலையத்தில் அக்கட்சியினர் புகார் அளித்துள்ளனர்.

அரசு நிகழ்ச்சியில் பெண்ணிடம் முறையற்ற வகையில் நடந்துகொண்ட நிதீஷ் குமார் மற்றும் அதற்கு ஆதரவாகப் பெண்களை இழிவுபடுத்தும் வகையில் பேசிய அமைச்சர் சஞ்சய் நிஷாத் ஆகியோர் மீது உரியச் சட்டப்பிரிவுகளின் கீழ் வழக்குப் பதிவு செய்ய வேண்டும் என வலியுறுத்தப்பட்டுள்ளது.

"பெண்களின் பாதுகாப்பு குறித்துப் பேசும் பாஜக மற்றும் அதன் கூட்டணிக் கட்சியினர், ஒரு அமைச்சரின் இத்தகைய பேச்சை எப்படி அனுமதிக்கிறார்கள்?" எனச் சமூக ஆர்வலர்களும் எதிர்க்கட்சியினரும் கேள்வி எழுப்பி வருகின்றனர்.

அமைச்சர் சஞ்சய் நிஷாத்தின் பேச்சுக்குச் சமூக வலைதளங்களில் கண்டனங்கள் குவிந்து வருகின்றன. ஒரு பெண்ணின் தனிப்பட்ட சுதந்திரம் மற்றும் மத உணர்வுகளுடன் தொடர்புடைய ஹிஜாப் விவகாரத்தைக் கொச்சைப்படுத்தும் விதமாகப் பேசிய அமைச்சர் உடனடியாகப் பதவி விலக வேண்டும் என்ற கோரிக்கையும் வலுத்து வருகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now