திண்டுக்கல் கலெக்டர் அலுவலக வளாகத்தில்...! நடவடிக்கை இல்லை என நூதனப் போராட்டம்...!

by Vignesh Perumal on | 2025-12-08 04:14 PM

Share:

திண்டுக்கல் கலெக்டர் அலுவலக வளாகத்தில்...! நடவடிக்கை இல்லை என நூதனப் போராட்டம்...!

திண்டுக்கல் மாவட்ட ஆட்சியர் அலுவலகத்தில் மக்கள் அளித்த மனுக்கள் மீது அதிகாரிகள் உரிய நடவடிக்கை எடுக்காமல் அலட்சியம் காட்டுவதாகக் குற்றம் சாட்டி, தாண்டிக்குடியைச் சேர்ந்த சமூக ஆர்வலர் ஒருவர் ஆட்சியர் அலுவலக வளாகத்தின் சாலை நடுவில் "மனுக்கள் மீது தலை வைத்துத் தூங்கும்" நூதனப் போராட்டத்தில் ஈடுபட்ட சம்பவம் பரபரப்பை ஏற்படுத்தியுள்ளது.

திண்டுக்கல் மாவட்டத்தின் தாண்டிக்குடி பகுதியைச் சேர்ந்தவர் சமூக ஆர்வலர் கணேஷ் பாபு. இவர், பல்வேறு பொதுப் பிரச்சினைகள் தொடர்பாக மாவட்ட ஆட்சியர் அலுவலகத்தில் மனுக்கள் அளித்துள்ளார்.

ஆனால், தாம் அளித்த மனுக்கள் மீது அதிகாரிகள் எந்த நடவடிக்கையும் எடுக்காமல் கிடப்பில் போட்டுவிட்டதாகக் கணேஷ் பாபு குற்றம் சாட்டியுள்ளார்.

அதிகாரிகளின் அலட்சியத்தைக் கண்டித்துத் தனது எதிர்ப்பைப் பதிவு செய்ய, கணேஷ் பாபு இன்று (டிசம்பர் 8, 2025) மாவட்ட ஆட்சியர் அலுவலக வளாகத்திற்கு வந்தார்.

அவர், தான் அளித்த மனுக்கள் அடங்கிய கோப்பு மற்றும் ஒரு தலையணை ஆகியவற்றுடன் ஆட்சியர் அலுவலக வளாகத்தின் சாலை நடுவில் அமர்ந்தார். "அதிகாரிகள் மனுக்கள் மீது நடவடிக்கை எடுக்காமல் தூங்குவதால், நானும் மனு மீது தலை வைத்துத் தூங்குகிறேன்" என்று கூறி, மனுக்கள் அடங்கிய கோப்பின் மீது தலையை வைத்துப் படுத்து நூதனப் போராட்டத்தில் ஈடுபட்டார்.

இந்த நூதனப் போராட்டம் ஆட்சியர் அலுவலகத்தில் இருந்த மற்ற அலுவலர்கள் மற்றும் பொதுமக்கள் கவனத்தை ஈர்த்தது. தகவல் அறிந்து வந்த அதிகாரிகள் மற்றும் காவல்துறை கணேஷ் பாபுவிடம் பேச்சுவார்த்தை நடத்தினர். அவரது கோரிக்கைகள் குறித்து விசாரிக்கப்படும் என்று உறுதி அளித்ததைத் தொடர்ந்து, அவர் தனது போராட்டத்தைக் கைவிட்டார்.

செய்தி - மோகன் கணேஷ் திண்டுக்கல்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now