திடீர் அறிவிப்பு....! நாளை பணிகளைப் புறக்கணிக்க வருவாய்த் துறை சங்கம் முடிவு...!

by Vignesh Perumal on | 2025-11-17 12:23 PM

Share:

திடீர் அறிவிப்பு....! நாளை பணிகளைப் புறக்கணிக்க வருவாய்த் துறை சங்கம் முடிவு...!

அதிகப்படியான பணி நெருக்கடி மற்றும் கூடுதல் பணிப்பளுவைக் களைய வலியுறுத்தி, தமிழ்நாடு வருவாய்த் துறை சங்கம் நாளை (நவம்பர் 18) தொடங்க உள்ள சிறப்பு தீவிர திருத்தப்பணிகள் (Special Intensive Revision – SIR) எனப்படும் வாக்காளர் பட்டியல் திருத்தப் பணிகளை முழுமையாகப் புறக்கணிக்கப் போவதாக அறிவித்துள்ளது. இந்தப் புறக்கணிப்பு, வாக்காளர் பட்டியல் திருத்தப் பணிகளைப் பெரிதும் பாதிக்கக்கூடும் என்ற அச்சத்தை ஏற்படுத்தியுள்ளது.

வாக்காளர் பட்டியலைச் சுத்திகரிப்பதற்காக நவம்பர் 4-ஆம் தேதி முதல் SIR பணிகள் தொடங்கியுள்ளன. இந்தப் பணிகள், வருவாய்த் துறை ஊழியர்களின் வழக்கமான பணிகளுடன் இணைக்கப்பட்டுள்ளன.

வாக்காளர் பட்டியலில் இறந்தவர்கள், இடம்பெயர்ந்தவர்கள், தவறான விவரங்கள் ஆகியவற்றை அகற்றும் இந்த சிறப்புத் திருத்தப் பணிகள், வருவாய்த் துறை ஊழியர்களுக்கு பெரும் கூடுதல் சுமையை ஏற்படுத்துவதாக சங்கம் குற்றம்சாட்டியுள்ளது.

இந்தப் பணி நெருக்கடியைக் களைய வலியுறுத்தி, நாளை (நவம்பர் 18) முதல் தொடங்கவுள்ள SIR பணிகள் தொடர்பான ஆய்வுக் கூட்டங்கள் மற்றும் களப் பணிகளைப் புறக்கணிப்பதாக சங்கம் முடிவு செய்துள்ளது.

போராட்டத்தின் முதற்கட்டமாக, சங்கம் இன்று பல்வேறு நடவடிக்கைகளை அறிவித்துள்ளது.

அனைத்து வருவாய்த் துறை ஊழியர்களும் இன்று மாலை, அந்தந்த மாவட்ட ஆட்சியர்களிடம் பெருந்திரள் முறையீடு செய்ய உள்ளனர். மேலும், மாவட்ட மற்றும் வட்டத் தலைநகரங்களில் கண்டன ஆர்ப்பாட்டம் நடத்தவும் சங்கம் திட்டமிட்டுள்ளதாக தகவல் வெளியாகியுள்ளது.

சங்கத்தின் முக்கிய கோரிக்கைகளில் ஒன்று, வருவாய்த் துறை ஊழியர்களுக்கு ஏற்பட்டுள்ள கூடுதல் பணிப்பளுவைக் கருத்தில் கொண்டு, அவர்களது ஒரு மாத ஊதியத்தை மதிப்பூதியமாக வழங்க வேண்டும் என்பதாகும்.

இந்த SIR பணிகள், டிசம்பர் 9 அன்று வரைவுப் பட்டியல் வெளியீட்டுடன் முடிவடைய உள்ளன.

ஆனால், கிராம நிர்வாக அலுவலர்கள், உதவியாளர்கள் உள்ளிட்ட அனைத்து வருவாய்த் துறை ஊழியர்களும் இந்தப் புறக்கணிப்பில் பங்கேற்பதால், தேர்தல் ஆணையத்தின் வாக்காளர் பட்டியல் திருத்தப் பணிகள் தாமதமாகும் அபாயம் எழுந்துள்ளது.

தமிழ்நாடு அரசு உடனடியாக இந்த விவகாரத்தில் தலையிட்டு, ஊழியர்களின் கோரிக்கைகளை ஏற்று சுமூகமான சூழலை ஏற்படுத்தித் தர வேண்டும் என்று சங்கம் வலியுறுத்தியுள்ளது.

மேலும், தமிழக தலைமைத் தேர்தல் அலுவலர் மற்றும் இந்தியத் தேர்தல் ஆணையம் இந்தப் பிரச்சினையில் தலையிட்டுத் தீர்வு காண வேண்டும் என்றும் கோரிக்கை விடுக்கப்பட்டுள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now