அமைச்சர், சட்டமன்ற உறுப்பினர் வீடுகளில் ரெய்டு...!

by Vignesh Perumal on | 2025-08-16 11:01 AM

Share:

அமைச்சர், சட்டமன்ற உறுப்பினர் வீடுகளில் ரெய்டு...!

திண்டுக்கல் துரைராஜ் நகரில் உள்ள தமிழக ஊரக வளர்ச்சித் துறை அமைச்சர் ஐ. பெரியசாமி அவர்களின் வீட்டில், அமலாக்கத்துறை அதிகாரிகள் இன்று காலை முதல் அதிரடி சோதனை நடத்தி வருகின்றனர். இந்த சோதனையானது, அமைச்சர் பெரியசாமியின் மகள் இந்திரா மற்றும் திண்டுக்கல் கிழக்கு சட்டமன்ற உறுப்பினர் ஐ.பி. செந்தில்குமார் ஆகியோரது வீடுகளிலும் ஒரே நேரத்தில் நடைபெற்று வருகிறது.

அமைச்சர் ஐ. பெரியசாமி மீது நில அபகரிப்பு வழக்கு உட்பட சில வழக்குகள் நிலுவையில் உள்ள நிலையில், சட்டவிரோத பணப்பரிவர்த்தனை தடுப்புச் சட்டம் (PMLA) தொடர்பாக இந்த சோதனைகள் மேற்கொள்ளப்பட்டு வருவதாகத் தகவல்கள் தெரிவிக்கின்றன. இந்த சோதனைகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.

திண்டுக்கல் கிழக்கு சட்டமன்ற உறுப்பினர் ஐ.பி. செந்தில்குமார் அவர்களின் வீட்டில் சோதனை நடந்து வரும் நிலையில், சென்னையில் உள்ள சட்டமன்ற உறுப்பினர் விடுதியில் உள்ள அவரது அறையிலும் சோதனை நடத்த அமலாக்கத்துறை அதிகாரிகள் முடிவு செய்துள்ளனர். விடுதி செயலாளர் முன்னிலையில், அறையின் பூட்டை உடைத்து சோதனை நடத்த உள்ளதாகக் கூறப்படுகிறது.

இந்த சோதனைகளை முன்னிட்டு, அமைச்சர் ஐ. பெரியசாமி மற்றும் ஐ.பி. செந்தில்குமார் ஆகியோரின் வீடுகளுக்கு வெளியே துப்பாக்கி ஏந்திய மத்திய காவல் படையினர் பாதுகாப்புப் பணியில் ஈடுபட்டுள்ளனர். அரசியல் கட்சிகளின் நிர்வாகிகள் மற்றும் தொண்டர்கள் யாரும் உள்ளே செல்ல அனுமதிக்கப்படவில்லை.

அமலாக்கத்துறை சோதனைகள் குறித்த முழுமையான விவரங்கள் இன்னும் வெளியாகவில்லை. சோதனையின் முடிவில் சில முக்கிய ஆவணங்கள் மற்றும் தகவல்கள் கைப்பற்றப்படலாம் என எதிர்பார்க்கப்படுகிறது. இது தமிழக அரசியல் களத்தில் மேலும் பல விவாதங்களை ஏற்படுத்தும் என அரசியல் நோக்கர்கள் கருதுகின்றனர்.

நிர்வாக ஆசிரியர்- பா.விக்னேஷ்பெருமாள்

WhatsApp Group Join Now