17 ஆண்டுகளுக்குப் பிறகு...! 7 பேரும் விடுதலை...! என்.ஐ.ஏ. நீதிமன்றம் தீர்ப்பு...!

by Vignesh Perumal on | 2025-07-31 01:22 PM

Share:

17 ஆண்டுகளுக்குப் பிறகு...! 7 பேரும் விடுதலை...! என்.ஐ.ஏ. நீதிமன்றம் தீர்ப்பு...!

மகாராஷ்டிராவின் மாலேகான் நகரில் 2008 ஆம் ஆண்டு நடைபெற்ற குண்டுவெடிப்பு வழக்கில் குற்றம் சாட்டப்பட்டிருந்த முன்னாள் எம்.பி. சாத்வி பிரக்யா சிங் தாக்கூர் உட்பட 7 பேரையும் மும்பை தேசிய புலனாய்வு முகமை (என்.ஐ.ஏ.) சிறப்பு நீதிமன்றம் இன்று விடுதலை செய்து உத்தரவிட்டுள்ளது. 17 ஆண்டுகளாக நடைபெற்று வந்த இந்த வழக்கில், குற்றச்சாட்டுகளுக்குப் போதுமான ஆதாரங்களை அரசுத் தரப்பு சமர்ப்பிக்கத் தவறியதாலேயே அனைவரும் விடுதலை செய்யப்பட்டுள்ளனர்.

கடந்த 2008 ஆம் ஆண்டு செப்டம்பர் 29 ஆம் தேதி, ரம்ஜான் மற்றும் நவராத்திரி தினத்தன்று, மாலேகானில் உள்ள ஒரு மசூதி அருகே நிறுத்தப்பட்டிருந்த மோட்டார் சைக்கிளில் வைக்கப்பட்டிருந்த வெடிகுண்டு வெடித்தது. இந்தத் தாக்குதலில் 6 பேர் கொல்லப்பட்டனர் மற்றும் 100-க்கும் மேற்பட்டோர் காயமடைந்தனர். இந்தச் சம்பவம் நாடெங்கும் பெரும் அதிர்வலைகளை ஏற்படுத்தியது.

இந்த வழக்கை முதலில் மகாராஷ்டிரா பயங்கரவாத எதிர்ப்புப் படை (ATS) விசாரித்தது. பின்னர் 2011 ஆம் ஆண்டில் இந்த வழக்கு தேசிய புலனாய்வு முகமையிடம் (என்.ஐ.ஏ.) ஒப்படைக்கப்பட்டது. பாஜக எம்.பி. பிரக்யா சிங் தாக்கூர், லெப்டினன்ட் கர்னல் பிரசாத் புரோஹித் உள்ளிட்டோர் மீது கடுமையான சட்டவிரோத நடவடிக்கைகள் (தடுப்பு) சட்டம் (UAPA) மற்றும் இந்திய தண்டனைச் சட்டம் (IPC) ஆகியவற்றின் கீழ் வழக்குத் தொடரப்பட்டது.

மொத்தம் 323 சாட்சிகளிடம் விசாரணை நடத்தப்பட்டு, கடந்த ஏப்ரல் மாதத்தில் 130 சாட்சிகளிடம் விசாரணை முடிவடைந்தது. இந்த வழக்கில் குற்றம் சாட்டப்பட்ட அனைவரும் ஜாமீனில் உள்ள நிலையில், சிறப்பு நீதிபதி ஏ.கே. லஹோட்டி இன்று பரபரப்புத் தீர்ப்பை அறிவித்தார்.

தீர்ப்பில், மாலேகானில் நடந்த குண்டுவெடிப்பு குறிப்பிட்ட மோட்டார் சைக்கிளில் தான் இருந்தது என்பதை நிரூபிக்க அரசுத் தரப்பு தவறிவிட்டதாக நீதிபதி சுட்டிக்காட்டினார். அத்துடன், காயமடைந்தவர்களின் எண்ணிக்கை குறித்தும், சில மருத்துவச் சான்றிதழ்களில் முறைகேடு செய்யப்பட்டிருப்பது குறித்தும் நீதிமன்றம் சந்தேகம் எழுப்பியுள்ளது. மேலும், குண்டுவெடிப்பில் பயன்படுத்தப்பட்டதாகக் கூறப்படும் வாகனத்தின் சேசிஸ் எண் தெளிவாகத் தெரியவில்லை என்றும் நீதிபதி குறிப்பிட்டுள்ளார்.

இந்தத் தீர்ப்பு, நீண்டகாலமாகப் பல அரசியல் விவாதங்களுக்கும் சர்ச்சைகளுக்கும் காரணமாக இருந்த மாலேகான் குண்டுவெடிப்பு வழக்கில் ஒரு முக்கிய முடிவை எட்டியுள்ளது.

நிர்வாக ஆசிரியர்- பா.விக்னேஷ்பெருமாள்

WhatsApp Group Join Now