ரயில் மறியல்...! 100 பேர் கைது..! திடீர் பரபரப்பு...!

by Vignesh Perumal on | 2025-07-09 12:43 PM

Share:

ரயில் மறியல்...! 100 பேர் கைது..! திடீர் பரபரப்பு...!

பல்வேறு கோரிக்கைகளை வலியுறுத்தி மார்க்சிஸ்ட் கம்யூனிஸ்ட் கட்சி சார்பில் திண்டுக்கல்லில் இன்று (ஜூலை 9) ரயில் மறியல் போராட்டம் நடைபெற்றது. திண்டுக்கல் நாடாளுமன்ற உறுப்பினர் சச்சிதானந்தம் தலைமையில் நடைபெற்ற இந்தப் போராட்டத்தில், 100க்கும் மேற்பட்ட மார்க்சிஸ்ட் கம்யூனிஸ்ட் கட்சியினர் கைது செய்யப்பட்டனர்.

நாடு தழுவிய அளவில் இன்று நடைபெற்று வரும் பொதுவேலைநிறுத்தப் போராட்டத்தின் ஒரு பகுதியாக மார்க்சிஸ்ட் கம்யூனிஸ்ட் கட்சி இந்தப் போராட்டத்திற்கு அழைப்பு விடுத்திருந்தது. மத்திய அரசின் மக்கள் விரோத கொள்கைகள், விலைவாசி உயர்வு, வேலைவாய்ப்பின்மை, பொதுத்துறை நிறுவனங்களைத் தனியார்மயமாக்குதல், பழைய ஓய்வூதியத் திட்டத்தை மீண்டும் கொண்டு வருதல், விவசாயப் பிரச்சனைகள் உள்ளிட்ட பல்வேறு அம்சக் கோரிக்கைகளை வலியுறுத்தி இந்தப் போராட்டம் முன்னெடுக்கப்பட்டது.

திண்டுக்கல் ரயில் நிலையம் அருகே திரண்ட மார்க்சிஸ்ட் கம்யூனிஸ்ட் கட்சியினர், நாடாளுமன்ற உறுப்பினர் சச்சிதானந்தம் தலைமையில் ரயில் மறியல் போராட்டத்தில் ஈடுபட்டனர். ரயிலைத் தடுத்து நிறுத்த முயன்ற அவர்களைப் போலீசார் தடுத்து நிறுத்தினர்.

மறியலில் ஈடுபட்டவர்கள் மத்திய அரசுக்கு எதிராகவும், தங்களின் கோரிக்கைகளை வலியுறுத்தியும் முழக்கங்களை எழுப்பினர். போராட்டத்தைக் கட்டுக்குள் கொண்டுவரும் விதமாக, ரயில் மறியலில் ஈடுபட்ட 100க்கும் மேற்பட்ட மார்க்சிஸ்ட் கம்யூனிஸ்ட் கட்சியினரை திண்டுக்கல் போலீசார் கைது செய்து, திருமண மண்டபத்தில் தங்க வைத்தனர். பின்னர் அவர்கள் மீது வழக்குப் பதிவு செய்து, மாலையில் ஜாமீனில் விடுவிக்கப்படுவார்கள் என எதிர்பார்க்கப்படுகிறது.

திண்டுக்கல்லில் நடைபெற்ற ரயில் மறியல் போராட்டம் காரணமாக, சில நிமிடங்கள் ரயில் போக்குவரத்து பாதிக்கப்பட்டது. இந்த வேலைநிறுத்தப் போராட்டங்கள் மூலம் தங்கள் கோரிக்கைகளை மத்திய அரசின் கவனத்திற்குக் கொண்டு செல்ல மார்க்சிஸ்ட் கம்யூனிஸ்ட் கட்சி முயற்சித்து வருகிறது.

செய்தி-மோகன் கணேஷ் திண்டுக்கல்.

WhatsApp Group Join Now