சுரங்கத் திட்டத்திற்கு எதிர்ப்பு..! எம்.பி. சச்சிதானந்தம் கோரிக்கை...!

by Vignesh Perumal on | 2025-07-05 05:29 PM

Share:

சுரங்கத் திட்டத்திற்கு எதிர்ப்பு..! எம்.பி. சச்சிதானந்தம் கோரிக்கை...!

திண்டுக்கல் மாவட்டம், பழனி வட்டத்திற்குட்பட்ட பகுதிகளில் ஒன்றிய பாஜக அரசு உத்தேசித்துள்ள மாலிப்டினம் சுரங்கத் திட்டத்தை ரத்து செய்ய வேண்டும் என்றும், பழனிமலை உள்ளிட்ட மேற்கு தொடர்ச்சி மலைகளின் இயற்கை வளங்களை தமிழக அரசு பாதுகாக்க வேண்டும் என்றும் திண்டுக்கல் நாடாளுமன்ற உறுப்பினர் சச்சிதானந்தம் அவர்கள் தமிழக அரசுக்குக் கோரிக்கை விடுத்துள்ளார்.

பழனி வட்டத்திற்குட்பட்ட நெய்காரப்பட்டி, கரடிக்கூடம், சத்திரப்பட்டி உள்ளிட்ட கிராமங்களில் மாலிப்டினம் கனிம சுரங்கம் அமைக்க ஒன்றிய அரசு திட்டமிட்டுள்ளதாக அறியப்படுகிறது. இது குறித்து வெளிவந்த செய்திகளின்படி, திண்டுக்கல் மாவட்டத்தில் சுமார் 400 சதுர கிலோ மீட்டர் (சுமார் 1 லட்சம் ஏக்கர்) பரப்பளவில் மாலிப்டினம் என்ற அரிய வகை தனிமம் இருப்பதாகக் கூறப்படுகிறது. எளிதில் துருப்பிடிக்காத, மிகவும் உறுதியான, ராணுவப் பயன்பாட்டிற்கு உகந்த இந்த மாலிப்டினம் கனிமத்தை மத்திய அரசு வெட்டி எடுக்க இருப்பதாகவும் செய்திகள் வெளியாகி, பொதுமக்கள் மத்தியில் பெரும் அச்சத்தை ஏற்படுத்தியுள்ளன.

மாலிப்டினம் கனிமம் உள்ளதாக அறியப்படும் பகுதியானது பழனியை ஒட்டி உள்ள மேற்கு தொடர்ச்சி மலை மற்றும் அதனை ஒட்டிய பகுதிகளான இடும்பன் மலை, ஐவர் மலை, ரவிமங்கலம் உள்ளிட்ட பல மலைகளையும் உள்ளடக்கியது. இந்த மேற்குத் தொடர்ச்சி மலையில் உள்ள ஐவர் மலையில் புராதன சமணப் படுகைகள், தொல்லியல் சின்னங்கள், உலகின் மிகப்பெரிய பல்லுயிர் தளங்கள் மற்றும் புலிகள் சரணாலயம் போன்றவை அமைந்துள்ளன. இவை அனைத்தும் இந்த சுரங்கத் திட்டத்தால் பாதிக்கப்படும் அபாயம் உள்ளது.

மாலிப்டினம் சுரங்கம் அமைக்கப்படும் பட்சத்தில், அது சாதாரணமாக அமைந்துள்ள கல்குவாரிகள், கிரானைட் குவாரிகள் போல இல்லாமல் மிகப்பெரிய அளவில் திண்டுக்கல் மாவட்டத்தின் மேற்குப் பகுதியில் உள்ள மக்களின் வாழ்வாதாரத்தின் மீது கொடிய தாக்கத்தை ஏற்படுத்தும் என்று எம்.பி. சச்சிதானந்தம் சுட்டிக்காட்டியுள்ளார்.

இப்பகுதி மக்களின் பிரதான தொழிலான விவசாயம் மற்றும் விவசாய நிலங்கள் அழிக்கப்படும். அந்தப் பகுதியிலுள்ள மக்கள் தங்கள் வாழ்விடங்களை இழந்து அகதிகளாக வெளியேற்றப்படும் நிலை ஏற்படும்.

குறிப்பாக, கொடைக்கானல் உள்ளிட்ட மேற்கு தொடர்ச்சி மலைகளின் சூழலியல் சமநிலையில் (Ecological Balance) மிகப்பெரிய மாற்றத்தை ஏற்படுத்துவதோடு, பூகோள ரீதியாகப் பெரும் பாதிப்புகளை உருவாக்கும். இதனால் மக்களின் வாழ்நிலை வெகுவாகப் பாதிக்கப்படும்.

இதிகாசகாலத்துடன் தொடர்புடைய ஐவர்மலை, ரவிமங்கலம், பழனிமலை ஆகியவை இந்த சுரங்கத் திட்டத்தால் பாதிப்புக்குள்ளாவதால், ஆன்மீக ரீதியாகவும் உலகளவில் மிகப்பெரிய கொந்தளிப்பை மக்கள் மத்தியில் ஏற்படுத்தும் என்றும் எம்.பி. சச்சிதானந்தம் எச்சரித்துள்ளார்.

எனவே, மக்கள் நலன் காக்கும் தமிழக அரசு உடனடியாக மத்திய அரசின் இந்த நடவடிக்கையைத் தடுத்து நிறுத்த வேண்டும் என்று திண்டுக்கல் நாடாளுமன்ற உறுப்பினர் சச்சிதானந்தம் மிக அன்புடன் கேட்டுக்கொண்டுள்ளார். இப்பகுதி மக்களின் வாழ்வாதாரம், விவசாயம், மற்றும் சுற்றியுள்ள மேற்குத் தொடர்ச்சி மலைகளையும், அங்குள்ள பல்லுயிர்களையும், இயற்கை வளங்களையும் பாதுகாத்திட வேண்டும் என்ற தனது தொகுதி மக்களின் கோரிக்கையை நிறைவேற்ற வேண்டும் எனவும் அவர் வலியுறுத்தியுள்ளார்.

இந்த சுரங்கத் திட்டம் குறித்த அச்சம் திண்டுக்கல் மாவட்டம் முழுவதும் பரவி வரும் நிலையில், தமிழக அரசு இந்த விவகாரத்தில் என்ன நடவடிக்கை எடுக்கப் போகிறது என்பது மக்கள் மத்தியில் பெரும் எதிர்பார்ப்பை ஏற்படுத்தியுள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now