சென்னையில் போக்குவரத்து அபராதம் மோசடி..! சைபர் கிரைம் தீவிர விசாரணை..!

by Vignesh Perumal on | 2025-06-20 04:22 PM

Share:

சென்னையில் போக்குவரத்து அபராதம் மோசடி..! சைபர் கிரைம் தீவிர விசாரணை..!

போக்குவரத்து காவல் துறையினர் அனுப்புவது போல போலியான குறுந்தகவல் (SMS) அனுப்பி, வாகன விதிமீறல் அபராதம் செலுத்தும்படி கோரி ரூ.12,600 அபகரிக்கப்பட்ட சம்பவம் சென்னையில் அதிர்ச்சியை ஏற்படுத்தியுள்ளது. பாதிக்கப்பட்ட நபர் சைபர் கிரைம் போலீசில் புகார் அளித்துள்ளார்.

சென்னையைச் சேர்ந்த ஒருவர் தனது செல்போனுக்கு, "நீங்கள் வாகன விதிமீறலில் ஈடுபட்டுள்ளீர்கள். அபராதத் தொகையை செலுத்துவதற்கு கீழ்க்கண்ட லிங்கை கிளிக் செய்யவும்" என்ற ஒரு குறுந்தகவலைப் பெற்றுள்ளார். இந்த குறுந்தகவல் போக்குவரத்து காவல்துறை அனுப்புவது போல் தோற்றமளித்துள்ளது.

அந்த லிங்கை அவர் கிளிக் செய்தவுடன், அவரது செல்போன் திடீரென செயலிழந்துள்ளது (hang ஆனது). சில நிமிடங்களுக்குப் பிறகு, அவரது வங்கிக் கணக்கிலிருந்து ரூ.12,600 எடுக்கப்பட்டதாக அவரது செல்போனுக்கு குறுந்தகவல் வந்துள்ளது. தான் மோசடி செய்யப்பட்டதை உணர்ந்ததும், பாதிக்கப்பட்டவர் உடனடியாக சைபர் கிரைம் போலீசில் புகார் அளித்துள்ளார்.

சைபர் கிரைம் போலீசார் வழக்குப்பதிவு செய்து விசாரணை நடத்தி வருகின்றனர். இதுபோன்ற மோசடிகள் அதிகரித்து வருவதால் பொதுமக்கள் எச்சரிக்கையாக இருக்க வேண்டும் என போலீசார் அறிவுறுத்தியுள்ளனர். குறிப்பாக, அறியாத எண்களிலிருந்து வரும் குறுந்தகவல்களில் உள்ள லிங்குகளை கிளிக் செய்ய வேண்டாம் என்றும், போக்குவரத்து அபராதம் தொடர்பான தகவல்களை அதிகாரப்பூர்வ இணையதளங்கள் மூலமாகவோ அல்லது போக்குவரத்து காவல் துறையின் நம்பகமான செயலிகள் மூலமாகவோ சரிபார்த்துக் கொள்ள வேண்டும் என்றும் கேட்டுக் கொண்டுள்ளனர்.

மேலும், சந்தேகத்திற்கிடமான குறுந்தகவல்கள் அல்லது அழைப்புகள் வந்தால், உடனடியாக சைபர் கிரைம் புகார் எண்ணுக்கு (1930) அல்லது தேசிய சைபர் குற்ற புகார் இணையதளத்தில் (www.cybercrime.gov.in) புகாரளிக்கலாம் என்றும் போலீசார் தெரிவித்துள்ளனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now