மாநகராட்சி பெண் கவுன்சிலர்களிடம் வழிப்பறி...! திடுக்கிடும் குற்றப்பின்னணி...!

by Vignesh Perumal on | 2025-06-20 12:28 PM

Share:

மாநகராட்சி பெண் கவுன்சிலர்களிடம் வழிப்பறி...! திடுக்கிடும் குற்றப்பின்னணி...!

திண்டுக்கல் மாநகராட்சி மாமன்ற பெண் உறுப்பினர்கள் இருவர், வன்னத்து சின்னப்பர் கோவில் அருகே இருசக்கர வாகனத்தில் சென்றபோது, முகமூடி அணிந்த மர்ம நபர்களால் வழிமறிக்கப்பட்டு கை பைகள் பறித்துச் செல்லப்பட்ட சம்பவம் பெரும் பரபரப்பை ஏற்படுத்தியுள்ளது. இச்சம்பவம், மக்கள் பிரதிநிதிகளுக்கே பாதுகாப்பு இல்லாத நிலையை சுட்டிக்காட்டி, பொதுமக்கள் மத்தியில் கவலையை ஏற்படுத்தியுள்ளது.

திண்டுக்கல் மாநகராட்சியின் 48வது வார்டு மாமன்ற உறுப்பினர் காயத்ரி மற்றும் 47வது வார்டு மாமன்ற உறுப்பினர் சுபாசினி ஆகியோர் இன்று (ஜூன் 20, 2025, வெள்ளிக்கிழமை) மாலை, வன்னத்து சின்னப்பர் கோவில் அருகே இருசக்கர வாகனத்தில் சென்று கொண்டிருந்தனர். அப்போது, முகத்தில் கர்சீப் கட்டிக்கொண்டு மற்றொரு இருசக்கர வாகனத்தில் வந்த இரண்டு மர்ம நபர்கள், திடீரென மாமன்ற உறுப்பினர்கள் சென்ற வாகனத்தை வழிமறித்துள்ளனர்.

அவர்கள் கையில் வைத்திருந்த கை பைகளை மர்ம நபர்கள் பலவந்தமாகப் பிடுங்கிக்கொண்டு, மின்னல் வேகத்தில் தப்பிச் சென்றுள்ளனர். இந்தச் சம்பவத்தால் மாமன்ற உறுப்பினர்கள் அதிர்ச்சியில் உறைந்தனர்.

வழிப்பறி சம்பவத்திற்குப் பிறகு, திண்டுக்கல் 48வது வார்டு மதிமுக மாமன்ற உறுப்பினர் காயத்ரி, தனது ஆதங்கத்தைப் பகிர்ந்துகொண்டார். அவர் கூறுகையில், "பெண் மாமன்ற உறுப்பினருக்கே இந்த நிலை என்றால், பொதுமக்களின் பாதுகாப்பு நிலை என்னவாகும் என்பது கேள்விக்குறியாக உள்ளது. எனது கை பையில் முக்கியமான ஆவணங்கள், செல்போன் ஆகியவை இருந்தன. மேலும், இந்தச் சம்பவத்தின் போது நான் சிறிது சுதாரிக்கவில்லை என்றால், பேருந்தில் விழுந்து பெரும் அசம்பாவிதம் ஏற்பட்டிருக்கும்," எனத் தெரிவித்தார்.

இந்தச் சம்பவம் குறித்து திண்டுக்கல் தாலுகா காவல் நிலையத்தில் மாமன்ற உறுப்பினர்கள் புகார் அளித்தனர். புகாரின் பேரில், தாலுகா காவல் நிலைய போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர். அப்பகுதிகளில் உள்ள சிசிடிவி பதிவுகளை ஆய்வு செய்து, மர்ம நபர்களை அடையாளம் காணும் பணிகளும் முடுக்கி விடப்பட்டுள்ளன.

மக்கள் பிரதிநிதிகளுக்கே பாதுகாப்பு இல்லாத இந்தச் சம்பவம், திண்டுக்கல்லில் சட்டம் ஒழுங்கு நிலைமை குறித்து பொதுமக்களிடையே கேள்விகளை எழுப்பியுள்ளது. போலீசார் துரிதமாகச் செயல்பட்டு குற்றவாளிகளைக் கைது செய்து, இதுபோன்ற சம்பவங்கள் மீண்டும் நிகழாமல் தடுக்க வேண்டும் என பொதுமக்கள் கோரிக்கை விடுத்துள்ளனர்.

செய்தி-மோகன் கணேஷ் திண்டுக்கல்.

WhatsApp Group Join Now