பரமக்குடி துப்பாக்கிச்சூடு...! சிபிஐ அறிக்கையை தாக்கல் செய்ய உயர் நீதிமன்றம் அதிரடி உத்தரவு...!

by Vignesh Perumal on | 2025-06-18 08:13 PM

Share:

பரமக்குடி துப்பாக்கிச்சூடு...! சிபிஐ அறிக்கையை தாக்கல் செய்ய உயர் நீதிமன்றம் அதிரடி உத்தரவு...!

கடந்த 2011 ஆம் ஆண்டு அ.தி.மு.க. ஆட்சிக்காலத்தில் நடைபெற்ற பரமக்குடி துப்பாக்கிச்சூடு சம்பவம் தொடர்பான விசாரணை நிலை அறிக்கையை தாக்கல் செய்யுமாறு சி.பி.ஐ.க்கு உயர் நீதிமன்ற மதுரைக்கிளை உத்தரவிட்டுள்ளது. இந்த துப்பாக்கிச்சூட்டில் 6 பேர் கொல்லப்பட்ட நிலையில், 15 ஆண்டுகள் ஆகியும் விசாரணையின் தற்போதைய நிலை என்னவென்று தெரியவில்லை என மனுதாரர் தரப்பில் வழக்கில் சுட்டிக்காட்டப்பட்டது.

2011 ஆம் ஆண்டு செப்டம்பர் மாதம், இமானுவேல் சேகரன் நினைவு தினத்தை முன்னிட்டு பரமக்குடியில் நடைபெற்ற நிகழ்ச்சியின்போது ஏற்பட்ட கலவரத்தில், காவல்துறையினர் நடத்திய துப்பாக்கிச்சூட்டில் ஆறு பேர் உயிரிழந்தனர். இந்த சம்பவம் அப்போது பெரும் பரபரப்பை ஏற்படுத்தியது. இந்த துப்பாக்கிச்சூடு சம்பவம் குறித்து விரிவான விசாரணை நடத்த அப்போதைய அரசு உத்தரவிட்டது. பின்னர், இந்த வழக்கு சி.பி.ஐ. வசம் ஒப்படைக்கப்பட்டது.

இந்த வழக்கு தொடர்பாக தாக்கல் செய்யப்பட்ட மனுவில், துப்பாக்கிச்சூடு சம்பவம் நடைபெற்று 15 ஆண்டுகள் கடந்த பின்னரும், சி.பி.ஐ. விசாரணையின் நிலை குறித்து எந்தவித தகவலும் இல்லை என்று மனுதாரர் தரப்பில் வாதிடப்பட்டது. மேலும், இது தொடர்பாக தகவல் அறியும் உரிமைச் சட்டம் (RTI) மூலம் அனுப்பப்பட்ட மனுவையும் சி.பி.ஐ. நிராகரித்துவிட்டதாகவும் மனுதாரர் குற்றம்சாட்டினார். பல ஆண்டுகளாகியும் உயிரிழந்தவர்களின் குடும்பங்களுக்கு நீதி கிடைக்காமல் இருப்பதாகவும், விசாரணை எந்த அளவுக்கு முன்னேறியுள்ளது என்பது குறித்து தெளிவு தேவை என்றும் வலியுறுத்தப்பட்டது.

மனுதாரரின் வாதங்களை கேட்டறிந்த உயர் நீதிமன்ற மதுரைக்கிளை, பரமக்குடி துப்பாக்கிச்சூடு சம்பவம் தொடர்பான விசாரணையின் தற்போதைய நிலை குறித்து சி.பி.ஐ. பதிலளிக்க உத்தரவிட்டது. இந்த வழக்கின் அடுத்த விசாரணை ஜூலை 7 ஆம் தேதிக்கு ஒத்திவைக்கப்பட்டது.

இந்த உத்தரவு, நீண்டகாலமாக நிலுவையில் உள்ள இந்த வழக்கில் வெளிப்படைத்தன்மையைக் கொண்டுவரும் என்றும், உயிரிழந்தவர்களின் குடும்பங்களுக்கு நியாயம் கிடைக்கும் என்ற நம்பிக்கையையும் ஏற்படுத்தியுள்ளது. சி.பி.ஐ. தனது நிலை அறிக்கையை தாக்கல் செய்த பிறகு, விசாரணையின் அடுத்தகட்ட நகர்வுகள் குறித்து தெரியவரும்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now