அடுத்தடுத்து அனுமதி...! பாமக கௌரவத் தலைவர் மருத்துவமனையில் அனுமதி..! பெரும் பரபரப்பு...!

by Vignesh Perumal on | 2025-06-18 03:51 PM

Share:

அடுத்தடுத்து அனுமதி...! பாமக கௌரவத் தலைவர் மருத்துவமனையில் அனுமதி..! பெரும் பரபரப்பு...!

பாட்டாளி மக்கள் கட்சியில் அடுத்தடுத்து முக்கிய தலைவர்கள் நெஞ்சுவலி காரணமாக மருத்துவமனையில் அனுமதிக்கப்பட்டிருப்பது கட்சி வட்டாரத்தில் பரபரப்பை ஏற்படுத்தியுள்ளது. சேலம் மேற்கு தொகுதி சட்டமன்ற உறுப்பினர் அருளைத் தொடர்ந்து, தற்போது கட்சியின் கௌரவத் தலைவரான ஜி.கே.மணியும் நெஞ்சுவலி காரணமாக சென்னையில் உள்ள தனியார் மருத்துவமனையில் அனுமதிக்கப்பட்டுள்ளார்.

இன்று (ஜூன் 18, 2025) காலை, சேலம் மேற்கு தொகுதி பாமக எம்.எல்.ஏ. அருள், சென்னை தலைமை செயலகத்தில் சபாநாயகரை சந்திப்பதற்காக வந்திருந்தார். அப்போது திடீரென அவருக்கு நெஞ்சுவலி ஏற்பட்டதாகக் கூறப்படுகிறது. உடனடியாக அவர் ஓமந்தூரார் அரசு பன்னோக்கு மருத்துவமனையில் அனுமதிக்கப்பட்டார். அங்கு அவருக்கு சிகிச்சை அளிக்கப்பட்டு வருகிறது.

இந்நிலையில், பாட்டாளி மக்கள் கட்சியின் கௌரவத் தலைவரும், அக்கட்சியின் சட்டப்பேரவைக் குழுத் தலைவருமான ஜி.கே.மணியும் திடீர் நெஞ்சுவலி காரணமாக சென்னை அண்ணாசாலையில் உள்ள ஒரு தனியார் மருத்துவமனையில் அனுமதிக்கப்பட்டுள்ளார். அவருக்கு அங்கு தீவிர சிகிச்சை அளிக்கப்பட்டு வருகிறது.

பாமக தலைவர் அன்புமணி ராமதாஸ் தலைமையில் நாளை (ஜூன் 19, 2025) கட்சியின் முக்கிய கூட்டம் நடைபெறவிருந்தது. இத்தகைய சூழலில், அடுத்தடுத்து கட்சியின் முக்கிய தலைவர்கள் உடல்நலக் குறைவால் பாதிக்கப்பட்டு மருத்துவமனையில் அனுமதிக்கப்பட்டிருப்பது பாமக வட்டாரத்தில் ஒருவித பரபரப்பை ஏற்படுத்தியுள்ளது. இரு தலைவர்களின் உடல்நிலை குறித்தும் மருத்துவமனை வட்டாரங்கள் இதுவரை விரிவான தகவல்களை வெளியிடவில்லை. அவர்களின் உடல்நிலை குறித்த அறிவிப்புக்காக கட்சியினர் மற்றும் பொதுமக்கள் காத்திருக்கின்றனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now