துணை முதலமைச்சர் நிகழ்ச்சியில் பெண் தர்ணா போராட்டம்...! பெரும் பரபரப்பு...!

by Vignesh Perumal on | 2025-06-16 02:18 PM

Share:

துணை முதலமைச்சர் நிகழ்ச்சியில் பெண் தர்ணா போராட்டம்...! பெரும் பரபரப்பு...!

தேனி மாவட்டத்திற்கு அரசு நிகழ்ச்சிக்காக வருகை தந்திருந்த தமிழ்நாடு துணை முதலமைச்சர் உதயநிதி ஸ்டாலின் கலந்துகொண்ட நிகழ்வில், தனது கலைஞர் கனவு இல்லத் திட்ட வீட்டிற்கு அனுமதி மறுக்கப்பட்டதாகக் கூறி பெண் ஒருவர் திடீர் தர்ணா போராட்டத்தில் ஈடுபட்டதால் பெரும் பரபரப்பு ஏற்பட்டது. துணை முதலமைச்சரைச் சந்திக்க வந்த அவரை போலீசார் தடுத்து நிறுத்தி வெளியேற்றினர்.

தேனி மாவட்டம், கடமலைக்குண்டு ஊராட்சி ஒன்றியத்தைச் சேர்ந்த ஷீலா (53) என்பவர், தனக்குச் சொந்தமான இடத்தில் 'கலைஞர் கனவு இல்லத் திட்டம்' திட்டத்தின் கீழ் வீடு கட்டுவதற்காக மனு அளித்திருந்தார். அவரது மனு பரிசீலிக்கப்பட்டு, வீடு கட்டுவதற்கு அரசு அனுமதி வழங்கப்பட்டுள்ளது.

இந்த நிலையில், ஷீலாவின் உறவினரும் காவல் அதிகாரியாகப் பணிபுரியும் ராஜசேகரன் என்பவர், அந்த நிலத்தில் தங்களுக்கும் பங்கு இருப்பதாகக் கூறி, ஷீலாவிற்கு வீடு வழங்கக்கூடாது என தனது அதிகாரத்தைப் பயன்படுத்தி தடுத்து நிறுத்தியதாகக் கூறப்படுகிறது. இதனால், ஷீலாவிற்கு வீடு கட்டும் பணி தொடங்கப்படாமல் கிடப்பில் போடப்பட்டுள்ளது.

தனக்கு இழைக்கப்பட்ட அநீதி குறித்து ஷீலா மாவட்ட ஆட்சியரிடம் பலமுறை புகார் அளித்தும் எந்தவித நடவடிக்கையும் எடுக்கப்படவில்லை எனக் கூறப்படுகிறது. இதனால் மிகுந்த மன உளைச்சலுக்கு ஆளான ஷீலா, தனது கோரிக்கைக்குத் தீர்வு காணும் நோக்கில், இன்று தேனி மாவட்ட அரசு நிகழ்ச்சிக்காக வருகை தந்த துணை முதலமைச்சர் உதயநிதி ஸ்டாலினைச் சந்தித்து மனு அளிக்க வந்தார்.

துணை முதலமைச்சரைச் சந்திக்க முயன்ற ஷீலாவை, அங்கிருந்த காவல்துறையினர் தடுத்து நிறுத்தினர். இதனால் ஆத்திரமடைந்த ஷீலா, தனது ஆவணங்களைத் தரையில் வீசி, கண்ணீருடன் தரையில் அமர்ந்து தர்ணா போராட்டத்தில் ஈடுபட்டார். தனது கோரிக்கைக்கு உடனடியாக நடவடிக்கை எடுக்க வேண்டும் என அவர் வலியுறுத்தி முழக்கமிட்டார்.

துணை முதலமைச்சர் கலந்துகொண்ட முக்கிய அரசு நிகழ்ச்சியில் பெண் ஒருவர் தர்ணா போராட்டத்தில் ஈடுபட்டது அங்கிருந்த அனைவரையும் அதிர்ச்சிக்குள்ளாக்கியது. உடனடியாகச் செயல்பட்ட காவல் அதிகாரிகள், தர்ணாவில் ஈடுபட்ட ஷீலாவைக் குண்டு கட்டாகத் தூக்கி நிகழ்ச்சி வளாகத்தில் இருந்து வெளியேற்றினர்.

இந்தச் சம்பவம் தேனியில் பரபரப்பை ஏற்படுத்தியுள்ள நிலையில், 'கலைஞர் கனவு இல்லத் திட்டம்' போன்ற மக்கள் நலத் திட்டங்களில் இதுபோன்ற தனிப்பட்ட தலையீடுகளும், அதிகார துஷ்பிரயோகமும் நடைபெறுவது குறித்து சமூக ஆர்வலர்கள் கவலை தெரிவித்துள்ளனர். ஷீலாவின் கோரிக்கை மீது அரசு உரிய நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now