கிணற்றில் கை, கால், வாய் கட்டப்பட்ட நிலையில் ஆண் சடலம் மீட்பு...! பெரும் பரபரப்பு...!

by Vignesh Perumal on | 2025-06-15 09:04 PM

Share:

கிணற்றில் கை, கால், வாய் கட்டப்பட்ட நிலையில் ஆண் சடலம் மீட்பு...! பெரும் பரபரப்பு...!

திண்டுக்கல் மாவட்டம், தாடிக்கொம்பு அருகே உள்ள சென்னமநாயக்கன்பட்டி அடுத்த எஸ்.அம்மாபட்டி பிரிவில் உள்ள ஒரு கிணற்றில், கை, கால்கள் மற்றும் வாய் கட்டப்பட்ட நிலையில், அழுகிய நிலையில் ஒரு ஆண் சடலம் மீட்கப்பட்டது. இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

எஸ்.அம்மாபட்டி பிரிவில் உள்ள ஒரு தனியாருக்கு சொந்தமான விவசாயக் கிணற்றில் இருந்து கடந்த சில நாட்களாக துர்நாற்றம் வீசியுள்ளது. சந்தேகமடைந்த அப்பகுதி மக்கள் கிணற்றுக்குள் எட்டிப் பார்த்தபோது, ஒரு ஆண் சடலம் மிதப்பதைக் கண்டு அதிர்ச்சியடைந்தனர். உடனடியாக இது குறித்து தாடிக்கொம்பு காவல் நிலையத்திற்கு தகவல் தெரிவித்தனர்.

தகவலறிந்து சம்பவ இடத்திற்கு விரைந்து வந்த தாடிக்கொம்பு காவல் ஆய்வாளர் மற்றும் காவல்துறை அதிகாரிகள் கிணற்றை ஆய்வு செய்தனர். தீயணைப்புத்துறையினரின் உதவியுடன் சடலத்தை மீட்கும் பணி நடைபெற்றது. நீண்ட நேர போராட்டத்திற்குப் பிறகு, சடலம் கிணற்றில் இருந்து மேலே கொண்டுவரப்பட்டது.

மீட்கப்பட்ட சடலத்தை ஆய்வு செய்தபோது, அந்த ஆணின் கைகள் பின்னால் கட்டப்பட்டிருந்தன. கால்களும் கட்டப்பட்டிருந்த நிலையில், வாயும் துணியால் கட்டப்பட்டிருந்தது. சடலம் மிகவும் அழுகிய நிலையில் இருந்ததால், அதன் அடையாளம் உடனடியாகத் தெரியவில்லை. சுமார் 35 வயது மதிக்கத்தக்க ஆணாக இருக்கலாம் என போலீசார் தரப்பில் தெரிவிக்கப்பட்டது.

காவல்துறையினர் வழக்குப்பதிவு செய்து தீவிர விசாரணை நடத்தி வருகின்றனர். சடலத்தின் கைகளும், கால்களும், வாயும் கட்டப்பட்டிருந்ததாலும், அழுகிய நிலையில் மீட்கப்பட்டதாலும் இது ஒரு கொலையாக இருக்கலாம் என்ற கோணத்தில் போலீசார் விசாரணையைத் தொடங்கியுள்ளனர். கிணற்றில் வீசப்படுவதற்கு முன் வேறு எங்காவது வைத்து கொலை செய்யப்பட்டு, பின்னர் உடலை மறைக்கும் நோக்கில் கிணற்றில் வீசப்பட்டிருக்கலாம் என்றும் சந்தேகிக்கப்படுகிறது.

சடலத்தை பிரேதப் பரிசோதனைக்காக திண்டுக்கல் அரசு மருத்துவமனைக்கு அனுப்பி வைத்தனர். பிரேதப் பரிசோதனை அறிக்கை வந்த பின்னரே மரணத்திற்கான காரணம் மற்றும் கொலை குறித்த மேலும் பல தகவல்கள் தெரியவரும். சடலத்தின் அடையாளம் காணும் பணியிலும் போலீசார் ஈடுபட்டுள்ளனர். திண்டுக்கல் மற்றும் சுற்றியுள்ள பகுதிகளில் காணாமல் போனவர்கள் குறித்த தகவல்களை சேகரித்து வருகின்றனர். இந்த சம்பவம் சென்னமநாயக்கன்பட்டி பகுதியில் பெரும் பீதியை ஏற்படுத்தியுள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now