விவசாயிகள் கலெக்டருக்கு நூதன எதிர்ப்பு..!

by Vignesh Perumal on | 2025-06-14 02:33 PM

Share:

விவசாயிகள் கலெக்டருக்கு நூதன எதிர்ப்பு..!

திண்டுக்கல் மாவட்டம் பழநியை அடுத்த ஆயக்குடியில், மாம்பழங்களின் விலை வரலாறு காணாத அளவுக்கு கடும் வீழ்ச்சியடைந்ததால், ஏக்கர் ஒன்றுக்கு ஒரு லட்சம் ரூபாய் நிவாரணம் வழங்கக் கோரி விவசாயிகள் நூதனப் போராட்டத்தில் ஈடுபட்டனர். ஆத்திரமடைந்த விவசாயிகள் தாங்கள் விளைவித்த மாம்பழங்களைச் சாலையிலேயே கொட்டி தங்கள் எதிர்ப்பைப் பதிவு செய்தனர்.

பழநி மற்றும் அதன் சுற்றுவட்டாரப் பகுதிகள், குறிப்பாக ஆயக்குடி, மாம்பழ சாகுபடிக்கு பெயர் பெற்றவை. இந்த ஆண்டு நல்ல விளைச்சல் இருந்தும், மாம்பழங்களுக்கு உரிய விலை கிடைக்காததால் விவசாயிகள் பெரும் நஷ்டத்தைச் சந்தித்து வருகின்றனர். தற்போது ஒரு கிலோ மாம்பழம் ரூ.5 முதல் ரூ.10 வரை மட்டுமே விற்பனையாவதால், சாகுபடி செலவைக் கூட ஈடுகட்ட முடியாத நிலை ஏற்பட்டுள்ளதாக விவசாயிகள் வேதனை தெரிவிக்கின்றனர்.

மாம்பழங்களின் விலை வீழ்ச்சியால், ஏக்கர் ஒன்றுக்கு லட்சக்கணக்கில் நஷ்டம் அடைந்துள்ள விவசாயிகள், தமிழக அரசு உடனடியாகத் தலையிட்டு ஏக்கருக்கு ஒரு லட்சம் ரூபாய் வீதம் நிவாரணம் வழங்க வேண்டும் என்று கோரிக்கை விடுத்தனர். தங்கள் வாழ்வாதாரத்தைக் காப்பாற்ற அரசு உரிய நடவடிக்கை எடுக்க வேண்டும் என்றும் அவர்கள் வலியுறுத்தினர்.

தங்களது கோரிக்கையை அரசுக்கு உணர்த்தும் வகையிலும், உரிய விலை கிடைக்காததால் ஏற்பட்ட மன உளைச்சலினாலும், ஆயக்குடி பகுதியில் உள்ள விவசாயிகள் இன்று காலை திரண்டனர். தாங்கள் விளைவித்த மாம்பழங்களைச் சாலைகளில் கொட்டி, அதன் மீது டிராக்டரை ஏற்றி, தங்கள் ஆதங்கத்தையும், எதிர்ப்பையும் வெளிப்படுத்தினர். "உரிய விலை கிடைக்காததால், மாம்பழங்கள் அழுகி வீணாகிப் போவதைக் காட்டிலும், போராட்டத்தின் மூலம் அரசின் கவனத்தை ஈர்க்கலாம்" என்ற நோக்கில் இந்த நூதனப் போராட்டத்தில் ஈடுபட்டதாக விவசாயிகள் தெரிவித்தனர்.

விவசாயிகளின் இந்த நூதனப் போராட்டம் அப்பகுதியில் பெரும் பரபரப்பை ஏற்படுத்தியுள்ளது. சம்மந்தப்பட்ட வேளாண்மைத் துறை அதிகாரிகள் மற்றும் மாவட்ட நிர்வாகம், விவசாயிகளின் இந்த கோரிக்கையை கண்டுகொள்ளுமா, அல்லது மாவட்ட ஆட்சியர் நடவடிக்கை எடுப்பாரா என்ற எதிர்பார்ப்பு எழுந்துள்ளது. மாம்பழ விவசாயிகளின் வாழ்வாதாரத்தைப் பாதுகாக்க அரசு விரைந்து நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now