கோவையில் உடல் நசுங்கி...! தந்தை மகன் பரிதாப பலி...!

by Vignesh Perumal on | 2025-06-14 12:08 PM

Share:

கோவையில் உடல் நசுங்கி...! தந்தை மகன் பரிதாப பலி...!

கோவையில் ஸ்கேட்டிங் பயிற்சிக்கு மகனை அழைத்துச் சென்ற தந்தையும், மகனும் டிப்பர் லாரி மோதி உடல் நசுங்கி சம்பவ இடத்திலேயே பலியான சோக சம்பவம் நடந்துள்ளது. இச்சம்பவம் அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.

கோவை காந்திபுரத்தைச் சேர்ந்த ராஜேஷ் (40) என்பவர், தனது 10 வயது மகன் வினீத்தை ஸ்கேட்டிங் பயிற்சிக்கு அழைத்துச் சென்றுள்ளார். பயிற்சி முடிந்து தந்தையும், மகனும் இருசக்கர வாகனத்தில் வீடு திரும்பிக் கொண்டிருந்தனர். கோவை - சத்தி சாலையில், கணபதி அருகே சென்றுகொண்டிருந்தபோது, பின்னால் வேகமாக வந்த ஒரு டிப்பர் லாரி, ராஜேஷ் ஓட்டிச் சென்ற இருசக்கர வாகனத்தின் மீது பயங்கரமாக மோதியது.

டிப்பர் லாரி மோதிய வேகத்தில், தந்தை ராஜேஷும், மகன் வினீத்தும் நிலைதடுமாறி சாலையில் விழுந்தனர். அப்போது, லாரியின் சக்கரங்கள் ஏறி இறங்கியதில், இருவரின் உடல்களும் நசுங்கி சம்பவ இடத்திலேயே பரிதாபமாக உயிரிழந்தனர். இந்த கோர விபத்தை நேரில் பார்த்தவர்கள் அதிர்ச்சியில் உறைந்தனர்.

விபத்து குறித்து தகவல் அறிந்ததும், சம்பவ இடத்திற்கு விரைந்து வந்த போலீசார், உயிரிழந்த தந்தை - மகனின் உடல்களை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும், விபத்தை ஏற்படுத்திய டிப்பர் லாரியை பறிமுதல் செய்த போலீசார், லாரியை ஓட்டி வந்த மனோகர் என்பவரைக் கைது செய்து விசாரணை மேற்கொண்டு வருகின்றனர்.

இந்தச் சம்பவம் கோவையில் பெரும் சோகத்தையும், பரபரப்பையும் ஏற்படுத்தியுள்ளது. சாலை விதிகளை மீறி அஜாக்கிரதையாக வாகனங்களை ஓட்டுபவர்கள் மீது கடும் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now