சபரிமலை பம்பையில் விபத்து...! பக்தர்கள் அச்சம்...!

by Vignesh Perumal on | 2025-04-17 10:00 AM

Share:

சபரிமலை பம்பையில் விபத்து...! பக்தர்கள் அச்சம்...!

சபரிமலைக்குச் சென்ற கேரள மாநில அரசுப் போக்குவரத்துக் கழகத்தின் (KSRTC) பேருந்து மீது மரம் விழுந்த சம்பவம் நேற்று (16.04.2025) பம்பைக்கும் நிலக்கல்லுக்கும் இடையே நிகழ்ந்தது. அதிர்ஷ்டவசமாக, பேருந்தில் பயணித்த ஐயப்ப பக்தர்கள் யாருக்கும் எந்தவித காயமும் ஏற்படவில்லை.

சம்பவம் குறித்து தெரியவருவதாவது: பம்பையிலிருந்து நிலக்கல் நோக்கி ஐயப்ப பக்தர்களை ஏற்றிச் சென்ற KSRTC பேருந்து ஒன்று அடர்ந்த வனப்பகுதி வழியாக சென்று கொண்டிருந்தது. அப்போது திடீரென சாலையோரத்தில் இருந்த பெரிய மரம் ஒன்று வேரோடு சாய்ந்து பேருந்தின் மீது விழுந்தது.

இந்த விபத்தில் பேருந்தின் மேற்கூரை பலத்த சேதமடைந்தது. எதிர்பாராத இந்த சம்பவத்தால் பேருந்தில் இருந்த பக்தர்கள் அதிர்ச்சியடைந்தனர்.

இச்சம்பவம் குறித்து உடனடியாக பம்பையில் இருந்த தீயணைப்புத் துறையினருக்கு தகவல் தெரிவிக்கப்பட்டது. விரைந்து வந்த தீயணைப்பு வீரர்கள், பேருந்தின் மீது விழுந்த மரத்தை வெட்டி அப்புறப்படுத்தும் பணியில் ஈடுபட்டனர். நீண்ட போராட்டத்திற்குப் பிறகு மரத்தை முழுமையாக அகற்றினர்.

இதையடுத்து, பம்பையிலிருந்து மாற்றுப் பேருந்து ஒன்று வரவழைக்கப்பட்டு, அதில் பத்திரமாக அனைத்து பக்தர்களும் நிலக்கல்லுக்கு அனுப்பி வைக்கப்பட்டனர். இந்த சம்பவத்தால் அப்பகுதியில் சிறிது நேரம் பரபரப்பு நிலவியது.

வனப்பகுதியில் திடீரென மரம் விழுந்ததால் இந்த விபத்து நேரிட்டதாக முதற்கட்ட விசாரணையில் தெரியவந்துள்ளது. அதிர்ஷ்டவசமாக பக்தர்கள் உயிர் தப்பிய சம்பவம் அப்பகுதியில் பெரும் நிம்மதியை ஏற்படுத்தியுள்ளது.

WhatsApp Group Join Now