கொடூர சம்பவம்....! கூட்ட நெரிசல்...! ஏகாதசி தரிசனத்தில் 9 பேர் பலி...!

by Vignesh Perumal on | 2025-11-01 03:38 PM

Share:

கொடூர சம்பவம்....! கூட்ட நெரிசல்...! ஏகாதசி தரிசனத்தில் 9 பேர் பலி...!

ஆந்திரப் பிரதேச மாநிலம், ஸ்ரீகாகுளம் மாவட்டத்தில் அமைந்துள்ள புகழ்பெற்ற வெங்கடேஸ்வரா சுவாமி கோயிலில் ஏகாதசி பண்டிகையை முன்னிட்டு ஏற்பட்ட கடுமையான கூட்ட நெரிசலில் சிக்கி 9 பக்தர்கள் உயிரிழந்தனர் என்ற துயரச் செய்தி வெளியாகி உள்ளது.

ஏகாதசி திருநாளை ஒட்டி, அதிகாலை முதல் ஆயிரக்கணக்கான பக்தர்கள் சுவாமி தரிசனம் செய்வதற்காகக் கோயிலில் திரண்டனர். ஒரு குறிப்பிட்ட நேரத்தில், பக்தர்களை அனுமதிக்கும் வழியில் ஏற்பட்ட கட்டுப்பாடற்ற கூட்ட நெரிசல் காரணமாகத் தள்ளுமுள்ளு ஏற்பட்டது.

இந்தத் தள்ளுமுள்ளுவில் சிக்கி மூச்சுத் திணறல் ஏற்பட்டதாலும், கூட்டத்தில் கீழே விழுந்ததாலும் பெண்கள் மற்றும் குழந்தைகள் உட்பட 9 பேர் சம்பவ இடத்திலேயே உயிரிழந்ததாகத் தகவல்கள் தெரிவிக்கின்றன. மேலும் சில பக்தர்களுக்குக் காயங்கள் ஏற்பட்டுள்ளன.

இந்தச் சம்பவம் குறித்து அறிந்த ஆந்திரப் பிரதேச முதலமைச்சர் என். சந்திரபாபு நாயுடு அவர்கள் தனது அதிர்ச்சியையும் ஆழ்ந்த இரங்கலையும் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், "ஸ்ரீகாகுளம் மாவட்டத்தில் உள்ள காசிபுக்கா வெங்கடேஸ்வரா கோயிலில் ஏற்பட்ட கூட்ட நெரிசல் சம்பவம் அதிர்ச்சியை ஏற்படுத்தியுள்ளது. தெய்வத்தைத் தரிசனம் செய்ய வந்த பக்தர்கள் இவ்வாறு உயிரிழந்தது மிகவும் வருத்தமளிக்கிறது. உயிரிழந்தவர்களின் குடும்பத்தினருக்கு எனது ஆழ்ந்த இரங்கலைத் தெரிவித்துக்கொள்கிறேன். காயமடைந்தவர்களுக்குச் சிறந்த சிகிச்சை அளிக்க அதிகாரிகளுக்கு உத்தரவிட்டுள்ளேன்" என்று கூறியுள்ளார்.

சம்பவ இடத்தில் உடனடியாக மீட்புப் பணிகள் துரிதப்படுத்தப்பட்டு, காயமடைந்தவர்கள் அருகில் உள்ள மருத்துவமனைக்கு அனுப்பப்பட்டுள்ளனர். மேலும், சம்பவம் குறித்துக் கோயில் நிர்வாகம் மற்றும் பாதுகாப்பு ஏற்பாடுகளில் ஏற்பட்ட குறைபாடுகள் குறித்து விசாரணை நடத்தவும் மாவட்ட நிர்வாகம் உத்தரவிட்டுள்ளது. தற்போது கோயிலில் பலத்த போலீஸ் பாதுகாப்புப் போடப்பட்டு, நிலைமை கட்டுக்குள் கொண்டுவரப்பட்டுள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now