மேயர் இந்திராணியின் ராஜினாமா கடிதம் ஏற்பு...! மேயர் பதவி காலியானது..!

by Vignesh Perumal on | 2025-10-17 04:53 PM

Share:

மேயர் இந்திராணியின் ராஜினாமா கடிதம் ஏற்பு...! மேயர் பதவி காலியானது..!

மதுரை மாநகராட்சியில் பெரும் சர்ச்சையைக் கிளப்பிய சொத்து வரி முறைகேடு விவகாரத்தின் எதிரொலியாக, தி.மு.க.வைச் சேர்ந்த மேயர் இந்திராணி பொன்வசந்த் தனது பதவியை ராஜினாமா செய்ததை, மாமன்ற உறுப்பினர்கள் இன்று (அக்டோபர் 17, 2025) ஏற்றுக்கொண்டனர்.

மதுரை மாநகராட்சி மேயராகப் பதவி வகித்த இந்திராணி பொன்வசந்த், சொத்து வரி முறைகேடு தொடர்பாக தன் கணவர் கைது செய்யப்பட்ட பின்னணி மற்றும் கட்சித் தலைமையின் அறிவுறுத்தலின் பேரில், கடந்த புதன்கிழமை (அக்டோபர் 15) மாநகராட்சி ஆணையர் சித்ரா விஜயனிடம் தனது ராஜினாமா கடிதத்தை அளித்தார். அதில் அவர் 'குடும்பச் சூழ்நிலை காரணமாக'ப் பதவி விலகுவதாகக் குறிப்பிட்டிருந்தார்.

மேயரின் ராஜினாமாவை ஏற்றுக்கொள்வது தொடர்பாக, இன்று (அக்டோபர் 17, வெள்ளிக்கிழமை) மாநகராட்சியின் 44வது மாமன்ற அவசரக் கூட்டம் கூட்டப்பட்டது.

மாமன்ற மேயர் பதவி காலியானதால், இந்தக் கூட்டத்திற்கு துணை மேயர் தி. நாகராஜன் தலைமை வகித்தார்.

துணை மேயர் தலைமையில் நடைபெற்ற இந்தக் கூட்டத்தில், மேயர் இந்திராணி அளித்த ராஜினாமா கடிதத்தை மாமன்ற உறுப்பினர்கள் பரிசீலித்து, அதனை ஏற்றுக்கொள்வதாகத் தீர்மானம் நிறைவேற்றப்பட்டது. மாமன்றம் ராஜினாமா கடிதத்தை ஏற்றுக்கொண்டதைத் தொடர்ந்து, மதுரை மாநகராட்சி மேயர் பதவி அதிகாரப்பூர்வமாக இன்று முதல் காலியானதாக அறிவிக்கப்பட்டுள்ளது.

மதுரை மாநகராட்சியில் ₹150 கோடிக்கும் அதிகமாகச் சொத்து வரி முறைகேடு நடந்ததாகப் புகார் எழுந்தது. இதில் மேயரின் கணவர் பொன்வசந்த் உட்பட 19க்கும் மேற்பட்டோர் கைது செய்யப்பட்டனர். இந்த விவகாரத்தைத் தொடர்ந்து, முதல்வர் மு.க.ஸ்டாலினின் உத்தரவின் பேரில், ஏற்கெனவே ஐந்து மண்டலத் தலைவர்கள் உட்பட சில நிலைக்குழுத் தலைவர்களும் ராஜினாமா செய்திருந்தது குறிப்பிடத்தக்கது.

மேயர் பதவி காலியானதைத் தொடர்ந்து, மாநகராட்சி சட்ட விதிகளின்படி, அடுத்த மேயரைத் தேர்ந்தெடுப்பதற்கான மறைமுகத் தேர்தல் தேதி விரைவில் அறிவிக்கப்படும் என எதிர்பார்க்கப்படுகிறது. தி.மு.க.வில் இருந்து அடுத்த மேயர் யார் என்பது குறித்து தற்போது மதுரை அரசியல் வட்டாரத்தில் பெரும் பரபரப்பு நிலவுகிறது.

ஆசிரியர்கள் குழு....

WhatsApp Group Join Now