மதுரையில் பரபரப்பு...! மேயர் இந்திராணி பொன்வசந்த் ராஜினாமா...! புதிய மேயர்...!

by Vignesh Perumal on | 2025-10-15 07:58 PM

Share:

மதுரையில் பரபரப்பு...! மேயர் இந்திராணி பொன்வசந்த் ராஜினாமா...! புதிய மேயர்...!

மதுரை மாநகராட்சியில் ₹150 கோடிக்கும் அதிகமான சொத்து வரி முறைகேடு தொடர்பாக மேலெழுந்த புகார்கள் மற்றும் தன் கணவர் கைது செய்யப்பட்டதன் எதிரொலியாக, தி.மு.க.வைச் சேர்ந்த மேயர் இந்திராணி பொன்வசந்த் இன்று (அக்டோபர் 15, 2025) திடீரென தனது பதவியை ராஜினாமா செய்தார்.

மதுரை மாநகராட்சியில் கடந்த சில மாதங்களாகப் பெரிய அளவில் சொத்து வரி மதிப்பீடுகளில் முறைகேடு நடந்ததாகப் புகார் எழுந்தது.

அதிகாரிகளின் உதவியுடன், சுமார் 150-க்கும் மேற்பட்ட வணிக மற்றும் குடியிருப்புக் கட்டிடங்களின் சொத்து வரி மதிப்பீடு சட்டவிரோதமாகக் குறைக்கப்பட்டதில், மாநகராட்சிக்கு ₹150 கோடி வரை வருவாய் இழப்பு ஏற்பட்டதாகக் கூறப்படுகிறது.

இந்த முறைகேடு தொடர்பாக மத்திய குற்றப்பிரிவு போலீஸார் விசாரணை நடத்தி, மாநகராட்சி அதிகாரிகள், பில் கலெக்டர்கள் உட்பட சுமார் 19க்கும் மேற்பட்டோரை கைது செய்தனர்.

கைது செய்யப்பட்டவர்களில், மேயர் இந்திராணியின் கணவரான பொன்வசந்த் என்பவரும் அடங்குவார். இவர் ஏற்கனவே கட்சிக்கு அவப்பெயர் ஏற்படுத்தியதாக தி.மு.க.வில் இருந்து இடைநீக்கம் செய்யப்பட்டவர். அவர் சமீபத்தில் நிபந்தனை ஜாமீனில் விடுவிக்கப்பட்டார் என்பது குறிப்பிடத்தக்கது.

சொத்து வரி முறைகேட்டில் கணவர் பொன்வசந்த் கைது செய்யப்பட்டதாலும், இச்சம்பவம் ஆளும் தி.மு.க.வுக்குப் பெரும் தர்மசங்கடத்தை ஏற்படுத்தியதாலும், கட்சியின் தலைமை மேயர் இந்திராணி மீது கடும் நடவடிக்கை எடுக்க உத்தரவிட்டதாகத் தகவல் வெளியாகியுள்ளது.

ஏற்கனவே, இந்த முறைகேடு தொடர்பாக மேயர் பதவி விலக வேண்டும் என எதிர்க்கட்சிகள் வலியுறுத்தி வந்த நிலையில், கட்சியின் மேலிட உத்தரவின்பேரில் இந்திராணி ராஜினாமா முடிவை எடுத்ததாகக் கூறப்படுகிறது.

இதைத்தொடர்ந்து, மேயர் இந்திராணி பொன்வசந்த் தனது ராஜினாமா கடிதத்தை இன்று (அக்டோபர் 15) மாநகராட்சி ஆணையர் சித்ரா விஜயனிடம் சமர்ப்பித்தார்.

மேயர் இந்திராணியின் ராஜினாமாக் கடிதம், அக்டோபர் 17, 2025 (வெள்ளிக்கிழமை) அன்று நடைபெறவுள்ள மதுரை மாநகராட்சி மன்ற சிறப்புக் கூட்டத்தில் ஏற்றுக்கொள்ளப்படும் என்று எதிர்பார்க்கப்படுகிறது.

மேயர் பதவி காலியானதைத் தொடர்ந்து, மாநகராட்சி விதிகளின்படி, அக்டோபர் 17 அன்றே புதிய மேயரைத் தேர்ந்தெடுப்பதற்கான மறைமுகத் தேர்தல் நடைபெற உள்ளது.

மதுரை மாநகராட்சியில் தி.மு.க. பெரும்பான்மையில் இருப்பதால், தி.மு.க. சார்பில் ஒருவரே அடுத்த மேயராகத் தேர்ந்தெடுக்கப்படுவார் என எதிர்பார்க்கப்படுகிறது.

மதுரை அரசியலில் பெரும் புயலைக் கிளப்பிய இந்தச் சம்பவம், முதலமைச்சர் மு.க.ஸ்டாலின் ஊழலுக்கு எதிரான கடுமையான நிலைப்பாட்டையே காட்டுகிறது என அரசியல் நோக்கர்கள் கருத்துத் தெரிவிக்கின்றனர்.

ஆசிரியர்கள் குழு.....

WhatsApp Group Join Now