வண்டல் மணல் கொள்ளை...! ஆளும் கட்சி அமைச்சர், அதிகாரிகள் மீது சமூக ஆர்வலர்கள் குற்றச்சாட்டு...!

by Vignesh Perumal on | 2025-07-26 10:16 PM

Share:

வண்டல் மணல் கொள்ளை...! ஆளும் கட்சி அமைச்சர், அதிகாரிகள் மீது சமூக ஆர்வலர்கள் குற்றச்சாட்டு...!

சிவகங்கை மாவட்டத்தில் உள்ள நீர்நிலைகளில் இருந்து வண்டல் மண் சட்டவிரோதமாகக் கடத்தப்படுவதாகவும், இந்தக் கொள்ளைச் சம்பவத்திற்கு ஆளும் கட்சி அமைச்சர், காவல் துறை மற்றும் மாவட்ட நிர்வாகம் துணை போவதாகவும் சமூக ஆர்வலர்கள் பகிரங்கமாகக் குற்றம் சாட்டியுள்ளனர். கோடை காலத்தில் நீர்நிலைகள் வற்றியுள்ள நிலையில், பல கோடி ரூபாய் மதிப்பிலான வண்டல் மண் சுரண்டப்பட்டு வருவதாகக் கூறப்படுகிறது.

சிவகங்கை மாவட்டம் மற்றும் அதைச் சுற்றியுள்ள பகுதிகளில் உள்ள ஏரி, குளங்கள் உள்ளிட்ட நீர்நிலைகள் தற்போது கோடை காலம் காரணமாக வறண்டு காணப்படுகின்றன. இந்தச் சூழலைப் பயன்படுத்தி, நீர்நிலைகளில் இருந்து வண்டல் மண் குவியல் குவியலாக வெட்டி எடுக்கப்பட்டு வருவதாக அப்பகுதி மக்கள் புகார் தெரிவிக்கின்றனர். இந்தக் கொள்ளைச் சம்பவங்களில் ஈடுபடுபவர்கள் ஆள் பலம், பண பலம் மற்றும் அரசியல் பலம் கொண்ட நபர்கள் என்பதால், யாரும் இவர்களை எதிர்க்க முடியாத நிலை உள்ளதாக மக்கள் புலம்புகின்றனர்.

இந்த வண்டல் மண் கடத்தல் மாஃபியாவிற்கு சிவகங்கை மாவட்ட ஆளும் கட்சி அமைச்சர், சிவகங்கை மாவட்ட ஆட்சியர், கனிமவளத் துறை இணை இயக்குநர், வருவாய்த் துறையின் கோட்டாட்சியர், வட்டாட்சியர், கிராம நிர்வாக அலுவலர்கள் மற்றும் காவல் துறை உயர் அதிகாரிகள் என அனைவரும் ஆதரவாகச் செயல்பட்டு வருவதாகச் சமூக ஆர்வலர்கள் அடுக்கடுக்கான குற்றச்சாட்டுகளை முன்வைக்கின்றனர்.

சமூக ஆர்வலர்களின் கூற்றுப்படி, இந்தக் கும்பல் கொடுக்கும் "மாமூல்" தொகையைப் பங்கு போட்டுக்கொள்வதற்கே அதிகாரிகளுக்கு நேரம் போதவில்லை என்றும், அதனால்தான் பொதுமக்கள் வட்டாட்சியர் மற்றும் வருவாய்த் துறை அதிகாரிகளிடம் பலமுறை புகார் தெரிவித்தும் எவ்வித நடவடிக்கையும் எடுக்காமல் காலதாமதம் செய்து வருவதாகவும் தெரிவிக்கப்பட்டுள்ளது. ஆளும் கட்சியின் தலையீடு மற்றும் காவல் துறையின் ஒத்துழைப்பு இருப்பதால், வண்டல் மண் கடத்தும் மாஃபியாக்களை எதிர்த்து எதுவும் செய்ய முடியவில்லை என்று அப்பகுதி மக்கள் மிகுந்த கவலையுடன் உள்ளனர்.

இந்த வண்டல் மண் கடத்தல் செயலில், சமீபத்தில் தமிழகம் முழுவதும் மணல் வியாபாரத்தில் கொள்ளையடிக்கக் காத்திருக்கும் மயிலாடுதுறை மாவட்டத்தைச் சேர்ந்த ராசப்பா மற்றும் சிவகங்கை மாவட்டத்தைச் சார்ந்த ரகுபாண்டி தலைமையிலான மணல் மாஃபியா கும்பல் ஈடுபட்டு வருவதாகக் கூறப்படுகிறது. இவர்கள் வண்டல் மண்ணைக் குவியல் குவியலாகக் குவித்து விற்பனை செய்து பெரும் லாபம் ஈட்டி வருவதாகவும் குற்றச்சாட்டு எழுந்துள்ளது.

இந்த நிலை நீடித்தால், சிவகங்கை மாவட்டத்தில் உள்ள அனைத்து நீர்நிலைகளிலும் உள்ள பல கோடி ரூபாய்க்கு மதிப்பிலான வண்டல் மண் கொள்ளை அடிக்கப்பட்டு விடும் என்று அப்பகுதியில் உள்ள சமூக ஆர்வலர்கள் கவலையுடன் தெரிவித்துள்ளனர். "இவர்களை இரும்புக்கரம் கொண்டு யார் தடுப்பது?" என்ற கேள்வி தற்போது சிவகங்கை மாவட்டத்தில் பெரும் பரவலாகப் பேசப்பட்டு வருகிறது. மாவட்ட நிர்வாகம் இந்த முறைகேடுகளைத் தடுத்து நிறுத்தி, நீர்நிலைகளைப் பாதுகாக்க உடனடியாக நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.

ஆசிரியர்கள் குழு...

WhatsApp Group Join Now