பழனியில் ரோப் கார் இயங்காது..! திடீர் அறிவிப்பு...!

by Vignesh Perumal on | 2025-07-11 03:40 PM

Share:

பழனியில் ரோப் கார் இயங்காது..! திடீர் அறிவிப்பு...!

திண்டுக்கல் மாவட்டம், பழனியில் அமைந்துள்ள அறுபடை வீடுகளில் ஒன்றான அருள்மிகு தண்டாயுதபாணி சுவாமி திருக்கோயிலில் பக்தர்களின் வசதிக்காக இயக்கப்பட்டு வரும் பயணிகள் கம்பி வட ஊர்தி (Ropecar) சேவை, வருடாந்திர பராமரிப்புப் பணிகள் காரணமாக தற்காலிகமாக நிறுத்தப்பட உள்ளதாகத் திருக்கோயில் நிர்வாகம் அறிவித்துள்ளது.

எதிர்வரும் ஜூலை 15, 2025 (செவ்வாய்க்கிழமை) முதல் கம்பி வட ஊர்தி சேவை, தொடர்ந்து 31 நாட்களுக்கு பக்தர்களின் பயன்பாட்டிற்கு இயங்காது. ஒவ்வொரு ஆண்டும் மேற்கொள்ளப்படும் வழக்கமான பராமரிப்புப் பணிகளைச் செய்வதற்காக இந்த நிறுத்தம் அறிவிக்கப்பட்டுள்ளது.

இந்த காலகட்டத்தில், ரோப்கார் இயந்திரங்கள், கேபிள்கள் மற்றும் பாதுகாப்பு அமைப்புகள் உள்ளிட்ட அனைத்துப் பகுதிகளும் விரிவாகச் சரிபார்க்கப்பட்டு, தேவையான பழுதுபார்ப்பு மற்றும் பராமரிப்புப் பணிகள் மேற்கொள்ளப்படும். பக்தர்களின் பாதுகாப்பை உறுதி செய்வதற்காகவே இந்தப் பணிகள் அவசியமானவை எனத் திருக்கோயில் நிர்வாகம் தெரிவித்துள்ளது.

ரோப்கார் சேவை நிறுத்தப்படும் நாட்களில், பக்தர்கள் மலைக்கோயிலுக்குச் செல்ல மின் இழுவை இரயில் (Winch) அல்லது படிக்கட்டுகள் ஆகிய மாற்று வழிகளைப் பயன்படுத்தலாம் எனத் தெரிவிக்கப்பட்டுள்ளது. 31 நாட்கள் பராமரிப்புப் பணிகள் நிறைவடைந்ததும், கம்பி வட ஊர்தி சேவை மீண்டும் பக்தர்களின் பயன்பாட்டிற்காகத் தொடங்கப்படும். இதனால், பழனிக்கு வரும் பக்தர்கள் அதற்குத் தகுந்தாற்போல் தங்களது பயணத்தைத் திட்டமிட்டுக்கொள்ளுமாறு கேட்டுக்கொள்ளப்படுகிறார்கள்.

செய்தி-மோகன் கணேஷ் திண்டுக்கல்.

WhatsApp Group Join Now