34 தலைமையாசிரியர்களுக்கு பதவி உயர்வு...! பள்ளிக் கல்வித்துறை அறிவிப்பு...!

by Vignesh Perumal on | 2025-07-11 01:03 PM

Share:

34 தலைமையாசிரியர்களுக்கு பதவி உயர்வு...! பள்ளிக் கல்வித்துறை அறிவிப்பு...!

2025-2026 ஆம் நிதியாண்டிற்கான பள்ளிக்கல்விப் பணி விதிகளின்படி, வகை IV-ன்கீழ் வரும் மாவட்டக் கல்வி அலுவலர் மற்றும் அதற்கு இணையான பணியிடங்களுக்கான பதவி உயர்வு மற்றும் பணிமாறுதல் மூலம் நிரப்பப்பட வேண்டிய 60 காலிப்பணியிடங்களுக்கான மதிப்பீடு அரசால் நிர்ணயிக்கப்பட்டது. இதன் தொடர்ச்சியாக, இந்த பணியிடங்களுக்கான தகுதி வாய்ந்தவர்களின் பட்டியல் அரசு ஆணை மூலம் அங்கீகரிக்கப்பட்டு வெளியிடப்பட்டுள்ளது.

பதவி உயர்வு பெற்றோர் விவரம்

இந்த தேர்ந்தோர் பெயர்ப்பட்டியலில் வரிசை எண் 1 முதல் 36 வரையுள்ளவர்களில் (வரிசை எண் 4 மற்றும் 26 இல் உள்ள ஓய்வு பெற்றவர்களைத் தவிர்த்து) மொத்தம் 34 அரசு உயர்நிலை மற்றும் மேல்நிலைப் பள்ளித் தலைமையாசிரியர்களுக்கு, தமிழ்நாடு பள்ளிக்கல்விப் பணி விதிகளின் (Section 8A Tamil Nadu School Educational Service Service Manual Volume II) விதி 2(C)(i)-இன்படி பதவி உயர்வு/பணிமாறுதல் வழங்கப்பட்டுள்ளது.

ஊதிய விவரங்கள் மற்றும் வழிகாட்டுதல்கள்

இந்த மாவட்டக்கல்வி அலுவலர் மற்றும் அதனையொத்த பணியிடங்களுக்கான ஊதிய விகிதம் நிலை-23 (ரூ.56,900/- முதல் ரூ.2,09,200/-) ஆகும். தமிழ்நாடு பள்ளிக்கல்விப்பணி விதிகளின் விதி 2(C)(ii)-இன்படி பதவி உயர்வு பெற்ற அரசு உயர்நிலைப் பள்ளித் தலைமையாசிரியர்கள் அடிப்படை விதி 22(B)-இன்படி ஊதியம் நிர்ணயம் செய்து கொள்ளத் தகுதியுடையவர்கள்.

பணி ஏற்பு மற்றும் உரிமைவிடல் விதிமுறைகள்

உடனடிப் பணி ஏற்பு: பதவி உயர்வு/பணிமாறுதல் பெற்ற தலைமையாசிரியர்கள் தங்கள் பணியிடப் பொறுப்புகளை அப்பள்ளியின் மூத்த முதுகலை/பட்டதாரி ஆசிரியரிடம் ஒப்படைத்துவிட்டு, உடனடியாக புதிய பணியிடத்தில் பணியேற்க வேண்டும். பள்ளிப் பொறுப்பினை ஏற்கும் மூத்த முதுகலை/பட்டதாரி ஆசிரியர், மறு ஆணைகள் பிறப்பிக்கப்படும் வரை உண்டியல் ஏற்பளிப்பு உட்பட அனைத்து கூடுதல் பொறுப்புகளையும் மேற்கொள்ள அனுமதிக்கப்படுவார்.

பொறுப்பு அலுவலர்களுக்கான அறிவுறுத்தல்கள்: ஏற்கனவே மாவட்டக்கல்வி அலுவலர் அல்லது அதற்கு இணையான பணியிடங்களில் பொறுப்பு அலுவலர்களாக நியமிக்கப்பட்டிருந்த தலைமையாசிரியர்கள், சம்மந்தப்பட்ட முதன்மைக்கல்வி அலுவலரால் நியமிக்கப்படும் புதிய பொறுப்பு அலுவலரிடம் பொறுப்பினை ஒப்படைத்துவிட்டு பணிவிடுப்பு பெற்று புதிய பணியிடத்தில் சேர அறிவுறுத்தப்பட்டுள்ளனர்.

பதவி உயர்வு உரிமைவிடல்: இந்த பதவி உயர்வு/பணிமாறுதலை உரிமைவிடல் செய்ய விரும்புபவர்கள், அது தற்காலிகமா அல்லது நிரந்தரமா என்பதைத் தெளிவாகக் குறிப்பிட்டு, உரிய விண்ணப்பத்தைச் சம்மந்தப்பட்ட முதன்மைக்கல்வி அலுவலர் வழியாக உடனடியாக இவ்வியக்ககத்திற்கு அனுப்பி வைக்க வேண்டும்.

அறிக்கை சமர்ப்பிப்பு: பதவி உயர்வு/பணிமாறுதல் பெற்ற தலைமையாசிரியர்கள் பணியிலிருந்து விடுவிக்கப்பட்டமை மற்றும் புதிய பணியிடத்தில் பணியில் சேர்ந்தமை குறித்த உரிய அறிக்கைகளை உடனடியாக இயக்குநருக்கும், தொடர்புடைய பிற அலுவலகங்களுக்கும் அனுப்பி வைக்கக் கேட்டுக்கொள்ளப்பட்டுள்ளனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now