வேலைநிறுத்தப் போராட்டம்..! பேருந்துகள், ஆட்டோக்கள் வழக்கம்போல் இயக்கம்..!

by Vignesh Perumal on | 2025-07-09 08:44 AM

Share:

வேலைநிறுத்தப் போராட்டம்..! பேருந்துகள், ஆட்டோக்கள் வழக்கம்போல் இயக்கம்..!

நாடு முழுவதும் இன்று (ஜூலை 9) 17 அம்ச கோரிக்கைகளை வலியுறுத்தி தொழிற்சங்கங்கள் வேலைநிறுத்தப் போராட்டத்தில் ஈடுபட்டுள்ள நிலையில், சென்னையில் பேருந்துகள் மற்றும் ஆட்டோக்கள் வழக்கம்போல் இயங்கி வருகின்றன. தமிழகத்தில் சி.ஐ.டி.யூ., தொ.மு.ச. உள்ளிட்ட 13 தொழிற்சங்கங்கள் இந்தப் போராட்டத்தில் பங்கேற்றுள்ளன.

மத்திய அரசின் மக்கள் விரோத மற்றும் தொழிலாளர் விரோத கொள்கைகளைக் கண்டித்தும், அத்தியாவசியப் பொருட்களின் விலைவாசி உயர்வைக் கட்டுப்படுத்துதல், வேலைவாய்ப்புகளை உருவாக்குதல், பொதுத்துறை நிறுவனங்களைத் தனியார்மயமாக்குவதைத் தடுத்தல், குறைந்தபட்ச ஊதியத்தை உயர்த்துதல் உள்ளிட்ட 17 அம்ச கோரிக்கைகளை வலியுறுத்தியும் நாடு தழுவிய அளவில் இந்தப் பொதுவேலைநிறுத்தப் போராட்டத்திற்கு அழைப்பு விடுக்கப்பட்டுள்ளது.

தமிழகத்தில் சி.ஐ.டி.யூ., தொ.மு.ச. உட்பட சுமார் 13 முன்னணி தொழிற்சங்கங்கள் இந்தப் போராட்டத்தில் பங்கேற்றுள்ளன. இருப்பினும், தமிழக அரசின் "வேலை இல்லை, சம்பளம் இல்லை" (NO WORK, NO PAY) என்ற கடுமையான எச்சரிக்கை காரணமாக, பெரும்பாலான அரசு ஊழியர்கள் மற்றும் அத்தியாவசிய சேவைத் துறைகளில் உள்ள ஊழியர்கள் பணிக்கு வந்துள்ளனர்.

சென்னையில், மாநகரப் பேருந்துகள் மற்றும் ஆட்டோக்கள் வழக்கம்போல் இயக்கப்படுகின்றன. இதனால், பொதுமக்கள் பெரிய அளவில் போக்குவரத்துச் சிரமங்களை எதிர்கொள்ளவில்லை. இருப்பினும், சில பகுதிகளில் தொழிற்சங்கங்களைச் சேர்ந்தவர்கள் ஆர்ப்பாட்டங்கள் மற்றும் மறியல் போராட்டங்களில் ஈடுபட்டு வருகின்றனர்.

இந்தப் போராட்டத்தால் தமிழகத்தில் அத்தியாவசிய சேவைகளில் பெரிய அளவில் பாதிப்பு இல்லை என்றபோதிலும், கோரிக்கைகளை வலியுறுத்திப் பல்வேறு தரப்பினரும் தங்கள் எதிர்ப்பைப் பதிவு செய்து வருகின்றனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now