அஜித்குமார் கொலை வழக்கு...! பேராசிரியர் மருத்துவ விடுப்பு..! மேலும் ஒரு மோசடி...!

by Vignesh Perumal on | 2025-07-08 07:53 PM

Share:

அஜித்குமார் கொலை வழக்கு...! பேராசிரியர் மருத்துவ விடுப்பு..! மேலும் ஒரு மோசடி...!

சிவகங்கை மாவட்டம், திருப்புவனம் கோவில் காவலாளி அஜித்குமார் கொலை வழக்கில் தொடர்புடையவராகக் கருதப்படும் கல்லூரிப் பேராசிரியர் நிகிதா, இன்று (ஜூலை 8) முதல் ஜூலை 27 ஆம் தேதி வரை 17 நாட்கள் மருத்துவ விடுப்பில் சென்றுள்ளார். இந்நிலையில், அஜித்குமார் வழக்கில் நகை காணாமல் போனதாகப் புகார் அளித்த நிகிதா மீது, 2011 ஆம் ஆண்டு நடைபெற்றதாகக் கூறப்படும் 48 லட்சம் ரூபாய் மோசடி புகார் ஒன்றும் தற்போது வெளிச்சத்திற்கு வந்துள்ளது.

திருப்புவனம் அஜித்குமார் மரணம் தொடர்பாக, திண்டுக்கல்லில் உள்ள எம்.வி.எம். அரசினர் மகளிர் கலைக் கல்லூரியில் பேராசிரியராகப் பணிபுரியும் நிகிதா மீது பல்வேறு குற்றச்சாட்டுகள் நிலவி வருகின்றன. இந்த வழக்கு தொடர்பாக நீதிமன்ற விசாரணை நடைபெற்று வரும் நிலையில், நேற்று (ஜூலை 7) தனது கல்லூரிக்கு வந்த நிகிதா, மாணவிகளுக்குப் பாடம் எடுத்தார். இந்நிலையில், இன்று ஜூலை 8 ஆம் தேதி முதல் வருகின்ற ஜூலை 27 ஆம் தேதி வரை, 17 நாட்கள் அவர் மருத்துவ விடுப்பில் சென்றுள்ளார்.

அஜித்குமார் கொலை வழக்கில், தனது நகை காணாமல் போனதாக முதலில் புகார் அளித்தவரே நிகிதா தான். இந்த நிலையில், நிகிதா மீது ஒரு பழைய மோசடி புகார் தற்போது மீண்டும் வெளிச்சத்திற்கு வந்துள்ளது. 2011 ஆம் ஆண்டில் அரசு வேலை வாங்கித் தருவதாகக் கூறி 48 லட்சம் ரூபாய் மோசடி செய்ததாக, எழும்பூரைச் சேர்ந்த செந்தில்குமார் என்பவர் நிகிதா மீது புகார் அளித்துள்ளார். இந்தப் புகார் குறித்து அப்போது விசாரணை நடத்தப்பட்டதா அல்லது என்ன நடவடிக்கை எடுக்கப்பட்டது என்பது குறித்த விவரங்கள் உடனடியாகத் தெரியவில்லை.

அஜித்குமார் மரண வழக்கு விசாரணையில் நிகிதாவின் பெயர் அடிபடும் நிலையில், அவர் மீதான இந்த மோசடி புகார், மேலும் பல சந்தேகங்களை எழுப்பியுள்ளது. இரு வழக்குகளுக்கும் இடையே ஏதேனும் தொடர்பு உள்ளதா என்பது குறித்தும், நிகிதாவின் பின்னணி குறித்தும் போலீசார் தீவிரமாக விசாரிக்க வேண்டும் என சமூக ஆர்வலர்கள் கோரிக்கை விடுத்துள்ளனர்.

இந்த விவகாரம் தமிழகம் முழுவதும், குறிப்பாகக் காவல் துறை வட்டாரங்களில் பெரும் பரபரப்பை ஏற்படுத்தியுள்ளது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now