மக்கள் குறைதீர்க்கும் நாள்..! மாவட்ட ஆட்சியர் அலுவலகத்தில் பரபரப்பு...!

by Vignesh Perumal on | 2025-04-28 12:46 PM

Share:

மக்கள் குறைதீர்க்கும் நாள்..! மாவட்ட ஆட்சியர் அலுவலகத்தில் பரபரப்பு...!

திண்டுக்கல் மாவட்டம் பட்டிவீரன்பட்டி காவல் ஆய்வாளரை கண்டித்து தும்மலப்பட்டியைச் சேர்ந்த கிராம மக்கள் இன்று (ஏப்ரல் 28, 2025) மாவட்ட ஆட்சியர் அலுவலக நுழைவாயில் முன்பு தரையில் அமர்ந்து போராட்டத்தில் ஈடுபட்டனர். இதனால் அப்பகுதியில் பரபரப்பு நிலவியது.

தும்மலப்பட்டி கிராம மக்கள் திரளாக மாவட்ட ஆட்சியர் அலுவலகத்திற்கு வந்தனர். அவர்கள் பட்டிவீரன்பட்டி காவல் ஆய்வாளர் ஒருதலைப்பட்சமாக செயல்படுவதாகவும், பொதுமக்களை முறையாக நடத்தவில்லை என்றும் குற்றம்சாட்டி கோஷங்கள் எழுப்பினர். மேலும், காவல் ஆய்வாளர் மீது பல்வேறு புகார்களை முன்வைத்து உடனடியாக அவரை பணியிடமாற்றம் செய்ய வேண்டும் என்று வலியுறுத்தினர்.

போராட்டத்தில் ஈடுபட்டிருந்த கிராம மக்கள் கூறுகையில், "பட்டிவீரன்பட்டி காவல் ஆய்வாளர் எங்கள் கிராமத்தில் யார் புகார் அளித்தாலும், முறையாக விசாரணை நடத்துவதில்லை. ஒரு குறிப்பிட்ட தரப்பினருக்கு ஆதரவாக செயல்படுகிறார். பொதுமக்களை மரியாதையாக நடத்துவதில்லை. இதனால் நாங்கள் மிகுந்த மன உளைச்சலுக்கு ஆளாகியுள்ளோம்" என்று தெரிவித்தனர். மேலும், காவல் ஆய்வாளரின் செயல்பாடுகள் குறித்து ஏற்கனவே பலமுறை புகார் அளித்தும் எந்த நடவடிக்கையும் எடுக்கப்படவில்லை என்றும் அவர்கள் வேதனை தெரிவித்தனர்.

தகவல் அறிந்ததும், மாவட்ட ஆட்சியர் அலுவலக அதிகாரிகள் மற்றும் போலீசார் சம்பவ இடத்திற்கு விரைந்து வந்து போராட்டத்தில் ஈடுபட்டவர்களுடன் பேச்சுவார்த்தை நடத்தினர். மக்களின் குறைகளை கேட்டறிந்த அதிகாரிகள், இது குறித்து உரிய விசாரணை நடத்தி நடவடிக்கை எடுப்பதாக உறுதியளித்தனர். இருப்பினும், கிராம மக்கள் தங்களது கோரிக்கைகள் நிறைவேறும் வரை போராட்டத்தை கைவிட மாட்டோம் என்று திட்டவட்டமாக தெரிவித்தனர்.

இந்த திடீர் போராட்டம் காரணமாக மாவட்ட ஆட்சியர் அலுவலக நுழைவாயில் பகுதியில் சிறிது நேரம் போக்குவரத்து பாதிக்கப்பட்டது. போலீசார் போராட்டக்காரர்களுடன் தொடர்ந்து பேச்சுவார்த்தை நடத்தி வருகின்றனர். இந்த சம்பவம் திண்டுக்கல் பகுதியில் பரபரப்பை ஏற்படுத்தியுள்ளது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now