சாதி பாகுபாடு...! ஏலத்தில் முறைகேடு...! கண்ணீருடன் ஆட்சியர் அலுவலகத்தில் மனு...!

by Vignesh Perumal on | 2025-04-28 12:32 PM

Share:

சாதி பாகுபாடு...! ஏலத்தில் முறைகேடு...! கண்ணீருடன் ஆட்சியர் அலுவலகத்தில் மனு...!

திண்டுக்கல் மாவட்டம் நிலக்கோட்டை அருகே உள்ள எஸ்.மேட்டுப்பட்டியைச் சேர்ந்த ஆதிதிராவிட பொதுமக்கள் இன்று (ஏப்ரல் 28, 2025) திண்டுக்கல் மாவட்ட ஆட்சியர் அலுவலகத்திற்கு திரண்டு வந்து மனு அளித்தனர். அவர்கள் கையில் பதாகைகளை ஏந்தியிருந்தனர். தங்களை கோயில் திருவிழாக்களில் கலந்து கொள்ளவும், வரி வசூல் செய்யவோ அனுமதிப்பதில்லை என்று அவர்கள் குற்றம்சாட்டினர்.

அவர்கள் அளித்த மனுவில், எஸ்.மேட்டுப்பட்டியில் உள்ள ஆஞ்சநேயர் கோவில் திருவிழாக்களில் தங்களை தொடர்ந்து புறக்கணிப்பதாகவும், விழாக்களில் பங்கேற்கவோ, கோயில் சார்பில் வரி வசூல் செய்யவோ அனுமதி மறுப்பதாகவும் குறிப்பிட்டிருந்தனர். இது சாதிய பாகுபாடு என்றும், தங்களது அடிப்படை உரிமைகளை மீறுவதாகவும் அவர்கள் வேதனை தெரிவித்தனர்.

மேலும், ஆஞ்சநேயர் கோவில் வாகன ஏலத்தை ரத்து செய்யக் கோரியும் அவர்கள் வலியுறுத்தினர். இந்த ஏலத்தை நடத்திய வட்டார வளர்ச்சி அலுவலர் (BDO) மீது நடவடிக்கை எடுக்க வேண்டும் என்றும் அவர்கள் கோரிக்கை வைத்தனர். பல லட்ச ரூபாய் லஞ்சம் பெற்றதாக குற்றம்சாட்டியுள்ள அவர்கள், சம்பந்தப்பட்ட BDO, உதவி வட்டார வளர்ச்சி அலுவலர் (j.BDO) மற்றும் ஊராட்சி எழுத்தர் ஆகியோரை கைது செய்ய வேண்டும் என்றும் வலியுறுத்தினர்.

தங்களது கோரிக்கைகள் அடங்கிய மனுவை மாவட்ட ஆட்சியரிடம் அளித்த பின்னர் செய்தியாளர்களிடம் பேசிய அப்பகுதி மக்கள், "நாங்கள் பல ஆண்டுகளாக இந்த பாகுபாட்டை சந்தித்து வருகிறோம். கோயில் திருவிழாக்களில் எங்களை அனுமதிப்பதில்லை. வரி வசூல் செய்யவும் அனுமதி மறுக்கிறார்கள். இது மிகவும் வேதனை அளிக்கிறது. மேலும், கோவில் வாகன ஏலத்தில் முறைகேடு நடந்துள்ளது. லஞ்சம் பெற்ற அதிகாரிகள் மீது நடவடிக்கை எடுக்க வேண்டும்" என்று கண்ணீருடன் தெரிவித்தனர்.

மாவட்ட ஆட்சியர் அலுவலகத்தில் இந்த விவகாரம் தொடர்பாக பரபரப்பு நிலவியது. மனுவை பெற்றுக் கொண்ட அதிகாரிகள் உரிய விசாரணை நடத்தி நடவடிக்கை எடுப்பதாக உறுதியளித்தனர். இந்த சம்பவம் அப்பகுதியில் சாதிய பாகுபாடு இன்னும் நிலவுவதை காட்டுவதாக சமூக ஆர்வலர்கள் கருத்து தெரிவித்துள்ளனர்.

செய்தி-மோகன் கணேஷ் திண்டுக்கல்.

WhatsApp Group Join Now